1Gentecunapaj rimaipi, angelcunapaj rimaipi rimajushpapash, juyaita na charishpaca, tsilin nijuj jirrushna, na cashpaca címbalo nishca huacajunshnami uyarijuiman.
2Dios ima nishcata villajushpapash, pipash na yachashcata tucuita yachashpapash, ninanda yachajushca cashpapash, urcucunata shujmanda yalichingapa tucui shunguhuan crij cashpapash, juyaita na charishpaca, imapash na canichu.
3Imagutapash na charijcuna micuchun, tucui ñuca charishcata carajushpapash, ñucata ninapi rupachinajuchun saquishpapash, juyaita na charishpaca, imapapash na ali cahuanllu.
4Juyaita charishpaca, llaquichijpipash alita rurajunllami. Juyaita charishpaca, shujcuna imata charishcataca na munashpa ricunllu. Juyaita charishpaca, shujcunata yali alimi cani nishpaca na jariyanllu.
5Juyaita charishpaca, na alitaca napacha ruranllu, na paipajlla alita mascanllu, na ñapash fiñarinllu, na fiñashcalla causanllu.
6Ima na alitaca napacha chasquinllu. Ashtahuangarin, na llullashpami cushijuita charin.
7Ima llaquitapash apanllami, tucuita crinllami, ima nishcatapash crishpa shuyanllami, ima na alita rurajpipash na ñapash fiñarinllu.
8Juyaica napacha tucuringachu. Ashtahuangarin, Dios ima nishcata villanapash, shuj rimaicunata rimanapash, imata yachajunapash tucuringallami.
9Cunanbica, ashatallami rijsinchi. Dios ima nishcatapash, ashatallami villanajunchi.
10Ashtahuangarin, ima pandatapash na rurana punllacuna chayamujpimi, chai ashalla yachashcacunaca tucuilla tucuringa.
11Huahua cashpaca, parlangapapash, imata yaringapapash huahuashnallatami carcani. Huahua cashpami, maitapash rurangapa munajlla carcani. Ashtahuangarin ña rucuyashpaca, huahuashna causanataca saquircanimi.
12Cunanbica, espejopi chingaj chingajlla ricujujshnami ricunajunchi. Ashtahuangarin chai punllapimi, ñavi ñavi ricunajushun. Cunanbica, ashatallami yachani. Ashtahuangarin chai punllapica, Dios imashna ñucata rijsishcashnallatami ñucapash rijsirisha.
13Cunanga crinapash, shuyanapash, juyanapash tiyanmi. Cai quimsamanda ricujpica, juyaimi ashtahuan yali ali tiyan.
Who We AreWhat We EelieveWhat We Do
2025 by iamachristian.org,Inc All rights reserved.
