EZEQUIEL 10 - Quichua Imbabura 2016

Diospaj ninan ushaimi Diospaj huasimanda anchurishca

1Querubín angelcunapaj uma jahuapica, zafiro rumitashnallami ricurcani. Chai rumica, mandangapa tiyarinashnami carca.

2Lino churajunata churajushca runataca, cashnami nirca: “Querubín angelcunapaj ucupi tiyajuj pirurucunapaj chaupiman yaicushpa, rupajuj carbonda maqui jundata japinguilla. Chaitaca, pueblo jahuapi shitagrilla” nijpimi, chai runaca ñuca ricujta yaicurca.

3Chai runa yaicujujpica, querubín angelcunaca, Diospaj huasi ali ladomanmi shayanajurca. Chai huasi ucu patiopica, fuyumi jundajurca.

4Shinamandami Mandaj Diospaj ninan ushaihuan punchapamba ricurijujca, querubín angelpaj jahuamanda, pungu umbralman vichai rirca. Chai huasipica, fuyu jundami carca. Shinallata patiopipash, Mandaj Diospaj ninan ushaimi punchapamba jundarca.

5Chai querubín angelcunapaj alas huajtarinajujca canllacamanmi uyarijurca. Tucuita Rurai Ushaj Dios rimajpishnami, canlla patiocaman shinllitapacha uyarirca.

6Lino churajunata churajushca runataca, cashna nishpami mandarca: “Querubín angelcunapaj piruru chaupimanda ninata japi” nishpa cachajpimi, paica chaipi shayarirca.

7Chai querubín angelcunapaj chaupimanda shuj angelca, paicunapaj chaupipi tiyaj ninata japishpami, lino churajunata churajushca runaman curca. Chai runaca, ninata japishpami llujshishpa rirca.

8Querubín angelcunapaj alas ucupica, runapaj maquishnallami ricurirca.

9Querubín angelcunapaj chaupipica, chuscu pirurucunatapashmi ricurcani. Chaicunaca, crisólito rumiman rijchajmi carca.

10Chuscundi pirurucunami, chashnallata carca. Chaicunaca, shujllashnallami ricurijurca.

11Chaicuna purishpaca, chuscundimi ñaupajmanlla purinajurca. Punda piruru maita rijpipash, chaitallatami catinajurca. Maimambash na tigrarishpami, ñaupajmanlla rinajurca.

12Chai querubín angelcunaca, huashapipash, maquipipash, alascunapipash, pirurucunapipash, ñavicunashnalla punchapamba jundami carca. Chuscundi pirurucunapimi chashnallata carca.

13Chai pirurucunataca, ñuca uyajtami: “Carreta” nishpa cayarca.

14Chai querubín angelcunaca, tucuicunami chuscu ñavita charirca. Shuj ñavica querubín angelpaj, shujca runapaj, shujca leonbaj, shujca jatun angapaj ñavishnami carca.

15Chai querubín angelcunaca jahuaman rircallami. Chaicunaca, Quebar shuti yacu manñapi ñuca ricushca, causaita charijcunallatami carca.

16Chai querubín angelcuna rijpica, pirurucunapash pajtami rinajurca. Shinallata chai querubín angelcuna, alpamanda jahuaman ringapa paicunapaj alasta pascajpica, pirurucunapash paicunamandaca na anchurircachu.

17Paicuna shayarijpica, pirurucunapash shayarinllami carca. Paicuna jahuata rijpica, pirurucunapash paicunahuan jahuata rircallami. Causaita charijcunapaj espiritullatami, pirurucunapipash carca.

18Chai jipami, Mandaj Diospaj ninan ushai punchapamba ricurijujpash, huasi umbral jahuamanda jatarishpa, querubín angelcunapaj jahuapi tiyarirca.

19Ñuca ricujtami querubín angelcunaca, alascunahuan jahuata jatarishpa rinajurca. Alpamanda jahuata jatarishpa rijpica, pirurucunapash jatarishpami, paicunahuan rinajurca. Paicunaca, indi llujshimujta yaicuna, Mandaj Diospaj huasi pungupimi shayarinajurca. Israelcunapaj Taita Diospaj ninan ushaipash, paicunapaj jahuapimi punchapamba ricurirca.

20Chaicunaca, Quebar shuti yacu manñapi, Israelcunapaj Taita Dios tiyajuj ucupi ñuca ricushca causaita charijcunallatami carca. Chaimandami, querubín angelcunallata cajta rijsircani.

21Tucuicunallatami, chuscu ñavita, chuscu alasta charirca. Paicunapaj alas ucupica, runapaj maquiman rijchajmi carca.

22Paicunaca, Quebar shuti yacu manñapi ñuca ricushcashnallatami carca. Tucuicunallatami, ñaupajmanlla rinajurca.