1Hebrón pueblopi, Abner runata huañuchishcata yachashpami, Saulpaj churica shungu junda llaquirirca. Shinallata Israelcunapash, tucuillami ninanda llaquirinajurca.
2Saulpaj churica, shuhuacunata mandaj ishcai runacunatami charirca. Shujca Baana shuti, caishujca Recab shutimi carca. Paicunaca, Benjaminbaj mirai Beerot shuti pueblopi causanajuj, Rimón shuti runapaj churicunami carca. (Beerot pueblopash, Benjaminbaj miraicuna causanajuj llactapillatami tiyajun.
3Beerot pueblopi causajcunaca, Gitaim shuti pueblomanda pacajushpa rishpami, shuj llactamanda shamushcacunashna, cunan punllacaman chaipi causanajun).
4Saulpaj churi Jonatanga, suchu churitami charirca. Chai churi, picha huatata charijpimi, “Saulpash, Jonatanbash huañushcami” nishpa, Jezreel pueblomanda villaj shamurca. Shinamandami, viñachij mamaca, paita marcashpa pacajungapa calpajushpa urmachijpi, chai huahuaca suchu saquirirca. Paica, Mefi-boset shutimi carca.
5Beerot shuti pueblopi causanajuj, Rimón shuti runapaj Recab shuti, Baana shuti churicunami, ninandapacha indishpa rupajujpi, Is-boset shuti runa paipaj huasipi puñujujpi, chaiman yaicurca.
6Shinallata huasipi ricuj huarmipash, trigota huairachijushpami, puñushpa saquirishca carca. Shina puñujujpimi Recab shuti runapash, paipaj huauqui Baana shuti runapash, huasiman pacalla yaicurca.
7Shina yaicushpa, Is-boset runa, paipaj huasi ucupi puñujujpimi huañuchishpa, umata fitirca. Chai umata apashpami, Arabá shuti pambapi tiyajuj ñandaca, tucui tuta shamunajurca.
8Is-boset runapaj umataca, Hebrón shuti pueblopi Davidpajmanmi apashpa shamurca. Chaipimi, jatun mandaj Davidtaca, cashna ninajurca:
“Saulca canda fiñashpami, huañuchisha nishpa purirca. Chaimandami, paipaj churi Is-boset runapaj umataca apamunchi. Ñuca amu, can jatun mandajta llaquichishcamandami, Saultapash, paipaj miraicunatapash Mandaj Diosca chashnallata llaquichijun” ninajurcami.
9Shina nijpimi Davidca, Beerot pueblomanda Rimón shuti runapaj churi Recab shuti, paipaj huauqui Baana shuti runatapash cashna nijurca:
“Tucui llaquimanda ñuca almata quishpichij, Mandaj Diosca ricujunmi.
10‘Saulca huañushcami’ nishpami, shuj runapash villaj shamuhuarca. Paica, alitami villaj shamuni yashpami, chashna villahuarca. Ashtahuangarin, chashna villashcamandami, Siclag shuti pueblopi huañuchircani.
11Huasi ucupi puñujuj ali runata huañuchij, cangunatacarin, huañuchinapachami cani. Chai runata huañuchishcamandaca ¿Nachu cangunatapash, cai pachamanda anchuchina cani?” nijurcami.
12Chashna nishpami Davidca, paipajta rurajcunataca, chai runacunata huañuchinajuchun mandarca. Chashna huañuchishpami, maquitapash, chaquitapash fitishpa, Hebrón shuti pueblopi tiyaj cuchayashca yacu jahuapi huarcurca. Chai jipami, Is-boset runapaj umataca, Hebrón pueblopi Abner runata pambashcapi pambarca.
Who We AreWhat We EelieveWhat We Do
2025 by iamachristian.org,Inc All rights reserved.
