1Diospaj arcata filisteocuna quichushpaca, Eben-ezer pueblomandaca, Asdod pueblomanmi aparca.
2Diospaj arcata filisteocuna apashpaca, Dagón shuti diospaj huasi ucupimi, Dagón shuti rurashcalla dioshuan tandachishpa churarca.
3Asdod pueblopi causajcunaca cayandi tutamandata rishpami, Dagón shuti dios urmashca, Mandaj Diospaj arca ñaupajpi sirijujta ricurca. Chaita jatarichishpaca, pai tiyajushca pushtupillatami cutin churanajurca.
4Chai cayandi tutamandata rishpapash, Dagón shuti diostaca, Mandaj Diospaj arca ñaupajpimi cutin alpapi sirijujtami ricurca. Dagón shuti diospaj, umapash, ishcandi maquipash, pungu caspi jahuapimi sirinajushca carca. Shinallata, cungamanda uraimanga na faquirishcachu carca.
5Chaimandami Dagón shuti diospaj sacerdotecunapash, Dagón shuti diospaj huasiman chayajcunapash, Asdod pueblopi tiyajuj Dagón shuti diospaj huasi pungupi quinraiman churashca caspipica, cunangaman na sarunajun.
6Mandaj Diosca, Asdod pueblopi causajcunataca, ashtahuanmi llaquichi callarirca. Shinamandami, Asdod pueblopipash, chai muyundi llactacunapipash, chupu ungüita cachamushpa ninanda llaquichirca.
7Chaita ricushpami Asdod pueblopi causajcunaca, cashna ninajurca: “Israelcunapaj Taita Diospaj arcataca, na caipi charinachu canchi. Chai Diosmi, ñucanchitapash, Dagón shuti diostapash, ninanda llaquichijun” ninajurcami.
8Chaimandami, mandaj filisteocunata cayashpa, cashna ninajurca: “Israelcunapaj Taita Diospaj arcataca, ¿imatata rurashunchi?” ninajurcami. Shina ninajujpimi: “Israelcunapaj Diospaj arcataca, Gat pueblomanmi yalichina canchi” ninajurca. Shinamandami, Israelcunapaj Diospaj arcataca, chai puebloman yalichinajurca.
9Gat puebloman yalichijpimi, Mandaj Diosca, chai pueblopi causajcunatapash ninandapacha llaquichijurca. Chai pueblopi causajcunataca, uchillacunamanda callarishpa, rucucamanmi, chupu ungüihuan ninanda llaquichijurca.
10Chaimandami, Taita Diospaj arcataca, Ecrón shuti puebloman cacharca. Taita Diospaj arcata, Ecrón puebloman cachajpimi, chaipi causajcunaca cashna nishpa caparinajurca: “Israelcunapaj Diospaj arcataca, ñucanchitapash, ñucanchi gentecunatapash huañuchijuchunmi, caiman yalichimushca” ninajurcami.
11Chaimandami, mandaj filisteocunata cayachun cachashpa, cashna ninajurca: “Ñucanchitapash, ñucanchi gentecunatapash ama huañuchijuchunga, Israelcunapaj Diospaj arcataca, maimanda apamushca cajpipash, chaipillata saquigrichun cachaichi” ninajurcami. Chai pueblopi causajcunaca, Diospaj ushaihuan llaquichishpa huañuchinatami, ninanda manllanajurca.
12Chupu ungüihuan nara huañushpaca ninandami caparinajurca. Chaimandami, chai pueblopi causajcuna caparishcapash jahua pachacaman uyarijurca.
Who We AreWhat We EelieveWhat We Do
2025 by iamachristian.org,Inc All rights reserved.
