1Ninan ushaita charij shuj angeltami, jahua pachamanda fuyu pillujpi urai shamujujta ricurcani. Paipaj umapica, shuj cuichimi ricurirca. Ñavipash, indishna punchapamba, chaquipash, rupajuj ninashnami carca.
2Chai angelca, pillushca uchilla fangatami pascashca charijurca. Aliman chaquihuanga, mama cuchapi, lluquiman chaquihuanga, alpa jahuapimi shayajurca.
3Paica, león huacanshnami shinllitapacha caparijurca. Shina caparijujpimi, culun nijshna rimashcacunaca, canchiscaman uyarijurca.
4Shina culun nijshna, chai rimashcacuna canchiscaman uyarijpimi, quilcangapa munajurcani. Ashtahuangarin, jahua pachamandaca: “Chai canchiscaman culun nijshna rimashca uyarishcataca, na quilcashpa pacalla saquinallami cangui” nijtami uyarcani.
5Shuj chaquihuanga, mama cuchapi, shuj chaquihuanga, alpa jahuapi shayajujta, ñuca ricushca angelmi, paipaj maquitaca jahua pachaman vichai churarca.
6Jahua pachata, cai pachata, mama cuchata, chaicunapi ima tiyachumbash churaj, causaita causajuj Diospaj shutipimi, chai angelca juramentushpa cashna nirca: “Cunanga, ña na ashtahuan shuyangachu,
7ashtahuangarin suctapaj cati ángel trompetata huacachi callari punllacunapimi, Taita Diosca, pipash na yachai ushashcataca pactachinga. Chaitaca, paipajta ruraj profetacunaman villashcashnami pactachinga” nircami.
8Jahua pachamanda rimaj uyarishcallatami, cutin cashna nishpa rimahuarca: “Mama cuchapi, alpa jahuapi shayajuj ángel pascashca charijuj uchilla librota japingapa rilla” nihuarcami.
9Shina nijpi, chai angelpajman rishpaca: “Chai uchilla librota cuhuai” nishpami mañarcani. Chashna nijpimi chai angelca, cashna nihuarca: “Jaica, micuilla. Cambaj vijsapica, jayaj jayajmi tucunga, shina cashpapash, cambaj shimipica, balun mishquishna mishqui mishquimi canga” nihuarcami.
10Shina nijpimi chai uchilla librotaca, angelpaj maquimanda japishpa micurcani. Ñuca shimipica balun mishquishna, mishqui mishquimi carca. Ashtahuangarin micushca jipaca, ñuca vijsapica, jayaj jayajmi tucurca.
11Chai angelca, cashnami nihuarca: “Ashtaca gentecuna, ashtaca llactacuna, shuj shuj shimita parlajcuna, jatun mandajcuna ima tucunatapash Dios villashcataca, cutin villagrinapachami cangui” nihuarcami.
Who We AreWhat We EelieveWhat We Do
2025 by iamachristian.org,Inc All rights reserved.
