EZEQUIEL 11 - Quichua Imbabura 2016

Na ali mandajcunata shinllita rimashcamanda

1Diospaj Espiritumi, Mandaj Diospaj huasipi, indi llujshimujman tiyajuj punguman apahuarca. Chai punguca, indi llujshimujmanmi tiyajurca. Chai pungu yaicunapica, ishcai chunga picha runacuna shayajujtami ricurcani. Chaipica, Azur runapaj churi Jaazanías runatapash, Benaía runapaj churi Pelatías runatapashmi ricurcani. Paicunaca, Israelcunata mandajcunami carca.

2Chaipica, cashnami nihuarca: “Huañuna aichayuj runa, cai runacunami na ali yuyaicunata cushpa, cai pueblopi causajcunataca, jatun na alita ruranata yachachinajun.

3Paicunaca, cashnami ninajun: ‘Huasicunata rurashunchilla, llaquicunaca na ñapash chayamungachu. Cai puebloca mangashnami, ñucanchitaca quilpashpa charinga’ ninajunmi.

4Huañuna aichayuj runa, shina cashcamanda, paicunata imashna llaquichinata villagrilla” nihuarcami.

5Mandaj Diospaj Espíritu, ñucapajman shamushpami, cashna nihuarca: “Israelcunaman cashna nishpa villagri: Mandaj Diosca, cashnami nin: ‘Israel gentecuna, cangunaca imata yarishpa rimanajushcatapash alimi yachani.

6Cai pueblopica, cangunallata ashtacata huañuchijpimi, ñangunapipash, ashtacacuna huañushca sirinajun.

7Chaimandami Mandaj Jatun Dios Ñucaca, cashna nini: Jerusalen puebloca tucuita jarcaj mangashnami canga. Ashtahuangarin, canguna huañuchishcacunallami chaipi saquiringa. Cangunataca Ñucallatami cai pueblomanda llujchishpa cachasha.

8Macanajuipi huañunatami cangunaca, ninanda manllashpa causarcanguichi. Ashtahuangarin, huañuchina macanajuitami cangunamanga cachamugrini. Mandaj Jatun Dios Ñucallatami, chashna nini.

9Cangunataca, cai pueblomanda llujchishpami, na rijsishca runacunapaj maquipi churasha. Chashna rurashpami, cangunata llaquichisha nishcataca pactachisha.

10Cangunaca espadahuanmi huañuchi tucunguichi. Cangunataca Israel llacta mujungunapimi llaquichisha. Shina rurajpimi, Mandaj Dios cajta yachanguichi.

11Cai puebloca, cangunataca na huacaichingachu. Cangunataca, Israel llacta mujungunapimi llaquichisha.

12Shina rurajpimi Ñucataca, Mandaj Dios cajta yachanguichi. Cangunaca, Ñuca shimicunataca na pactachishpa causashpami, imata rurachun ñuca mandashcacunatapash na cazurcanguichi. Ashtahuangarin muyundi llactacunapi causajcuna, imatalla rurashcatami catishpa rurashcanguichi’ nishpa villai” nihuarcami.

13Shina villajujpillatami, Benaía runapaj churi Pelatías runaca huañurca. Chaimandami ñucaca, alpaman chayajta urai cumurishpaca: “¡Aij, Mandaj Jatun Dioslla! Huaquinlla puchushca Israelcunataca, ¿tucuillachu tucuchigripangui?” nishpa ninanda caparircani.

Taita Diosca, cutin alichishami nishcamanda

14Mandaj Diosca cai shimicunatami, cashna nishpa villahuarca:

15“Huañuna aichayuj runa, cambaj huauquicunatallata, cambaj huasi ucupuratallata, Israelpuratallatami, Jerusalenbi causajcunaca: ‘Mandaj Diosmanda caruyaichi, ñucanchipajlla cachunmi cai llactataca cararca’ ninajurca.

16Chaimanda, cashna nishpa villagri: Mandaj Jatun Diosca, cashnami nin: ‘Paicunataca, caru llactacunaman cachashca cashpapash, shuj llactacunaman caita chaita cachashca cashpapash, chai llactacunaman chayajpica, Ñucallatami paicunapaca, Ñucata yarina huasishna casha’ nishpa villai.

17Cashnatapash villangui: Mandaj Jatun Diosca cashnami nin: ‘Cangunataca, shuj llacta runacunapajman caita chaita cachai tucushca causanajujpipash, Ñucami tandachimusha. Shina tandachimushpami, Israel llactapi cutin causachun saquisha.

18Chaiman tigrashpaca, rurashcalla dioscunatapash, tucui imalla na ricunayaicunatapash anchuchinajungami.

19Paicunapica, mushuj shunguta, mushuj espiritutami churasha. Paicunapaj rumi shunguta anchuchishpami, aicha shunguta carasha.

20Ñuca mandashcacunata cazushpa causachun, imata rurachun ñuca mandashcacunata uyashpa pactachinajuchunmi, chashna rurasha. Paicunaca, Ñuca agllashcacunami canga, Ñucapash paicunapaj Taita Diosmi casha.

21Ashtahuangarin paicunapaj shungupi, rurashcalla dioscunata mañanata yariajlla, na alicunatalla ruranata yariajlla causanajujpica, paicuna imashna na alita rurashcashnami llaquichisha’ ninmi Mandaj Jatun Diosca ningui” nihuarcami.

22Chai jipaca, querubín angelcuna paicunapaj alasta alsajpimi, pirurucunapash paicunata catishpa rinajurca. Israelcunapaj Taita Diospaj ninan ushaihuan punchapamba ricurijujca, paicunapaj jahuapimi carca.

23Mandaj Diospaj ninan ushaihuan punchapamba ricurijujca, chai pueblo chaupimanda vichai jatarishpami, indi llujshimujman tiyajuj urcu jahuapi saquirirca.

24Chai jipami Diospaj Espirituca, muscuipishna vichai apahuarca. Taita Diospaj Espiritumi, caldeo gentecuna causanajuj llactapi tiyaj prezu apai tucushcacunapajman apahuarca. Chai jipaca, muscuipishna ricujushcapash chingarcallami.

25Chaipica, Mandaj Dios tucui imatalla ricuchishcatami, chai prezucunaman villarcani.