1Ninanda juyaj Mandaj Diostaca, causaita causaicamanmi candajusha.
Tucuita Can pactachishcataca, mirai miraicunacamanmi, villajusha.
2Ñucaca cashnami nijurcani: “Causaita causaicamanmi juyahuangui.
Can na llullaj cashcataca, jahua pachami ricuchinga” nircanimi.
3Ñuca agllashpami shuj mandajta churarcani.
Ñucapajta ruraj Davidmanmi, cashna nishpa juramenturcani:
4“Cambaj miraicunataca, causaita causaicamanmi mirachisha.
Can mandashpa tiyajunapash, causaita causaicamanmi canga” nishcanguimi. Selah
5Mandaj Dioslla,
juyaillacunata Can rurashcamandaca, jahua pachapash cushijungami.
Can na llullaj cajtapash, jucha illajcunapaj tandanajuipimi villanajunga.
6Jahua pachapica, ¿Pita Mandaj Dioshuan chimbapurai ushangayari?
Diospaj huahuapurapica, ¿Pita Mandaj Dioshuan chimbapurangapaca, tiyangayari?
7Jucha illajcuna tandanajushcapica, Taita Diostami manllanajunga.
Paipaj muyundipi ima tiyajcunapash, tucuicuna ninanda manllana Diosmi.
8Tucuita Mandaj Taita Dioslla,
¿Pita Canshnaca tiyangayari?
Ninan ushaita charij Mandaj Dioslla, Canmi tucuita pactachij cangui.
9Mama cucha ninanda jatarijujtapash, Canmi mandai ushangui.
Yacucuna jatarijujtapash, casilla saquirichunmi mandangui.
10Canmi, Rahab shuti llactatapash tucuchircangui.
Canda fiñajcunataca, Cambaj ninan ushaihuanmi calpachircangui.
11Jahua pachapash, cai pachapash Cambajmi.
Cai pachatapash, chaipi tucui imalla tiyajcunatapash, Canmi churarcangui.
12Vichaitapash, uraitapash Canmi churarcangui.
Tabor shuti, Hermón shuti urcucunapash, Cambaj shutitami candanajunga.
13Canmi ninan ushaita charingui.
Ninan shinlli Cambaj maquipash, alicachi tucushcami.
14Can mandangapa tiyarinaca, alitalla rurashpa, aliguta ricushpa mandanami.
Canmi llaquij canatapash, na llullaj canatapash ricuchingui.
15Canda ninanda alicachij gentecunaca, ninandami cushijun.
Mandaj Dioslla,
Can punchayachijpimi purinajunga.
16Cambaj shutipimi, tucui punllacuna cushijunajunga.
Can alitalla rurashcamandami, jatunyachinga.
17Canmi, paicunapaj ushaitaca shinlliyachijungui.
Canmi, ñucanchitaca ashtahuan shinllichijungui.
18Mandaj Diosmi, ñucanchi jarcarina escudoshna tiyajun.
Jucha illaj Diosmi, Israel ñucanchipaj Jatun Mandaj.
19Can agllashca gentecunamanga, muscuipishnami cashna nishpa villarcangui:
“Ninan ushaita charij shuj runatami yanaparcani.
Ñuca agllashca gentecunamandaca, shuj runatami jatumbi churarcani.
20Ñucapajta ruraj Davidtami tarircani.
Paitami, ñucapajlla cachun agllarcani.
21Tucui causaipimi Paitaca yanapasha.
Ñuca ushaihuanmi Paitaca shinllichisha.
22Paita fiñajcunapash, na llaquichi ushangachu.
Na alita ruraj runapash, na mishangachu.
23Ashtahuangarin paita fiñajcunataca, Ñucami llaquichisha.
Paita na ricunayachij runacunataca tucuchishami.
24Tucuita pactachinapash, Ñuca juyaipash paihuanmi canga.
Ñuca shutipimi, paica tucuita mishai ushanga.
25Mama cuchatapash, paipaj maquipimi churasha.
Jatun yacucunatapash, paimi mandanga.
26Paica: ‘Canga, ñuca Taitami cangui,
Jatun rumishna ñucata pacashpa quishpichij, ñuca Taita Diosmi cangui’ nishpami mañahuanga.
27Paitaca, punda churishna cachunmi agllasha.
Cai pachapi tucui jatun mandajcunata, yali cachunmi churasha.
28Paitaca, paipaj tucui causaipimi juyashpa charisha.
Paihuan ari nishcataca, causaita causaicaman pactachijushallami.
29Paipaj miraitapash, causaita causaicaman mandanajuchunmi churasha.
Pai mandangapa tiyarinapash, causaita causaicamanmi canga.
30Paipaj churicuna ñuca mandashcata saquishpa,
ñuca yachachishcata na cazushpa,
31pactachinajuchun ñuca cushca shimicunata yangapi churashpa,
ñuca mandashcacunatapash na cazujpica,
32paicuna na cazushcamandami, varahuan llaquichisha.
Na alita rurashcamandaca, astishpami llaquichisha.
33Ashtahuangarin Davidta juyanataca, napacha saquishachu.
Ñuca na llullashpa villashcataca, pactachishapachami.
34Ñuca ari nishcataca, na cungashachu.
Ñuca shimihuan villashcataca, pactachishapachami.
35Ñucaca jucha illaj cashpami, shujtalla juramenturcani.
Davidtaca, napacha llullashachu.
36Paipaj miraicunapash, causaita causaicamanmi causanga.
Paicuna mandangapa tiyarinapash, ñuca ñaupajpica indishnami canga.
37Lunashnami, tucui causaicaman tiyajungalla.
Jahua pachapica, na llullashpa villajshnami canga” nircanguimi. Selah
38Can agllashpa churashca jatun mandajtaca, Canllatami yangapi churashpa shitashcangui.
Canllatami paitaca fiñashcangui.
39Cambajta rurajhuan ari nijushcataca yangapimi churashcangui.
Paipaj coronataca, alpapimi shitashcangui.
40Pueblo muyundi pircacunatapash shitashcanguimi.
Shinlli torrecunatapashmi urmachishcangui.
41Ñanda yalijcunaca, tucuicunami shuhuashpa yalinajun.
Muyundi causajcunapash, asishpami ricunajun.
42Ashtahuangarin paita fiñajcunamanmi, ushaita cushcangui.
Paita na ricunayachij gentecunatarami cushichishcangui.
43Paipaj espadataca, filo illajtami rurashcangui.
Jatun macanajuipipash, na yanapashcanguichu.
44Pai ushaitapash tucuchircanguimi.
Pai mandangapa tiyarinataca, alpapimi shitarcangui.
45Pai causana punllacunatapashmi quichijishpa saquishcangui.
Paitaca, ninandapachami pingaichishcangui. Selah
46Mandaj Dioslla,
¿ima punllacamanda ñucataca cungashpa saquigrihuangui?
¿Ñucataca, ninanda fiñashpachu saquigrihuangui?
47Ñuca causana huatacuna ñapash yalijujtaca yaripayari.
Huañuna aichayuj runacunataca, ¿Imapata yangallataca churarcangui?
48¿Maijan runashi, huañuita na ricushpa causajungalla?
Seolman rinamandaca, ¿pita quishpiringayari? Selah
49Jatun Dioslla,
¿ñaupa punllacunashna Cambaj juyaica maipitayari?
Na llullashpami, Davidman juramenturcangui.
50Jatun Dioslla,
Cambajta rurajcunata na alicachishpa rimanajushcataca yaripayari.
Ashtaca gentecuna na alicachishpa rimashcatami, ñuca shungupi charijuni.
51Mandaj Dioslla,
Canda fiñajcunaca, ñucanchitaca yangapimi churanajun.
Canda fiñajcunaca, Can agllashca jatun mandaj alicachi tucushcataca yangapimi churanajun.
52Mandaj Diosca, causaita causaicaman alicachi tucushca cachun.
Chashna cachun. chashna cachun.
Who We AreWhat We EelieveWhat We Do
2025 by iamachristian.org,Inc All rights reserved.
