1Jerusalenmanda shamushca fariseocunapash, mandashca Shimita yachachijpuramanda huaquingunapashmi, Jesushuan tandanajumurca.
2Paicunaca, Jesuspaj yachajujpuramanda huaquingunaca, mapa maquihuan tandata micunajujta ricushpami, na alicachishpa ricunajurca.
3Fariseocunapash, judiocunapash, ñaupa taitacuna yachachishcata catishpami, imashpapash maquita na maillashca cashpaca, na micunajun carca.
4Plazamanda tigramushpaca, maquita na maillashca cashpaca na micunllu carca. Shinallata, ashtahuan shuj pactachinacunatapash ruranarami carca. Shina cashpami: ufiana vasocunata, jarracunata, jirruta rurashca ima charishcacunatapash, camacunatapash maillana carca. Shinallata, imata tajshana cajpipash tajshanapachami carca.
5Shina cajpimi fariseocunapash, mandashca Shimita yachachijcunapash cashna tapunajurca:
“¿Imashpata Cambaj yachajujcunaca, ñaupa taitacuna yachachishcataca na cazushpa, mapa maquicunahuan tandata micunajun?” ninajurcami.
6Shina tapujpimi Jesusca, cashna nirca:
“Mishqui shimi, jayaj shungucunami canguichi. Canguna shina cashcamandami, profeta Isaiasca cashna nishpa quilcashca:
‘Cai gentecunaca, shimihuanllami ninanda alicachihuan.
Ashtahuangarin, paicunapaj shunguca, Ñucamandaca carupimi.
7Ñucataca yangatallami alicachinchi ninajun.
Ashtahuangarin gentecuna mandashcatallami,
Ñuca yachachishcatashna yachachinajun’ nishpami quilcashca.
8Cangunaca, Taita Dios mandashcata saquishpami, punda taitacuna yachachishcatara napacha saquishpa catinajunguichi.” nijurcami.
9Paicunataca cashnatapashmi nijurca:
“Taita Dios mandashcataca yangapi churashpami, ñaupa taitacuna yachachishcatara cazunajunguichi.
10Moisesca cashnami nirca: ‘Cambaj taitata, cambaj mamataca, alicachishpa cazungui. Taitata, mamata fiñashpa, na ali shimicunata rimajtaca, llaquitapash na llaquishpami huañuchina’ nircami.
11Ashtahuangarin cangunaca, cashnami ninajunguichi: ‘Maijan cashpapash, paipaj taitata, paipaj mamataca: Caica Corbanmi’ ninajunguichimi (Corbán nishpaca: ‘Taita Diosman carangapa shicanyachishcami’ nijunmi). Chaita juchachishpami cangunaca na yanapanguichi.
12Chashna nishpami, taitaman mamaman carachunga na saquinguichi.
13Chashna rurashpami, Taita Diospaj Shimita yangapi churashpa, cangunapaj ñaupa taitacuna yachachishcatara yachachishpa catinajunguichi. Chashnallata, ashtahuan shuj imatapashmi rurashpa causanguichi” nijurcami.
14Shina nishpallami, chai tucui gentecunata cayashpa cashna nijurca:
“Ñuca villajujtaca, tucuicuna uyashpa aliguta yuyaita japinguichi.
15Runata mapayachingapa canllamanda ima yaicunapash na tiyanllu. Ashtahuangarin, paipaj ucumanda llujshijuj yuyaicunami runataca mapayachin.
16[Maijambash uyangapa rinrita charishpaca, aliguta uyaichi]” nijurcami.
17Chai tucui gentecunata saquishpami, huasiman yaicurca. Chaipimi paipaj yachajujcunaca, chai yarichishpa yachachinaca ima cajta tapunajurca.
18Jesusca, paicunataca cashnami nijurca:
“¿Cangunapashchu Ñuca villajushcataca, nara yuyaipi japinguichi? Canllamanda ima yaicushpapash, runata na mapayachijtaca, ¿narachu yachanguichi?
19Imata micujpipash shungumanga na rinllu, vijsaman rishpami, jipamanga urai llujshinlla” nircami.
Chashna nishpaca, ima micunapash na mapa cajtami yachachishca.
20Ashtahuangarin cashnami nijurca: “Shungu ucumanda yuyai llujshijujmi runataca mapayachin.
21Gentecunapaj shungu ucumandami, na alicunata rurana yuyaicunaca llujshin. Chaimandami, cazarashca jahua shujcunahuan causanajun, huainayanajun, huañuchinajun,
22shuhuanajun, charijyanatalla munanajun, imapash na alicunatalla ruranajun, umachinajun, aicha munai mishajpi causanajun, shujcuna imata charishcata munashpa ricunajun, ‘imapash tucushpami ali canman’ ninajun, ninanda jariyanajun, juizu illaj causanajun.
23Tucui chai na ali yuyaicuna shungu ucumanda llujshishpami, runataca mapayachin” nijurcami.
Sirofenicia llactapi causaj huarmi alipacha crishcamanda(Mat. 15:21-28)24Chaimanda Jesús jatarishpaca, Tiro, Sidón llactacunamanmi chayagrirca. Chaipi shuj huasiman yaicushpami, chaipi cajtaca pipash ama yachachun munarca. Ashtahuangarin na pacajui usharcachu.
25Ashtahuangarin shuj huarmica, mapata rurachij aya jundashca ushita charishpami, Jesús chaipi cajta yachashpa, paipaj chaqui ñaupajpi cunguringapa shamurca.
26Paica, Sirofenicia shuti llactamanda, griego shimita rimaj huarmimi carca. Paimi:
“Ñuca ushimanda, ayata llujchishpa cachapai” nishpa, ninanda mañajurca.
27Shina nijpimi Jesusca:
“Huahuacunara punda micuchun shuyapai. Huahuacuna micunajuj tandata quichushpa, alcucunaman shitanaca na alichu” nirca.
28Shina nijpimi chai huarmica, cashna nirca:
“Chashnapachamari capan, Apunchi Jesús. Shina cajpipash huahuacuna micunajushpa jichashcataca, alcucunapash micupanllamari” nirca.
29Shina nijpimi Jesusca:
“Cunanga rilla. Can chashna nishcamandami, cambaj ushimandaca, ayaca ña llujshirca.” nirca.
30Shina nijpimi huasiman chayashpaca, aya llujshijpi, ali tucushca camapi sirijujta paipaj ushitaca japigrirca.
Na uyaj upa runatami, Jesusca alichishca31Tiro llactamanda tigramushpaca, Sidón llactata, Decápolis llactatapash yalishpami Jesusca, Galilea cuchaman shamurca.
32Chaimanmi, rinripash na uyajuj, shimipash na rimajuj runata, Jesuspajman pushashpa shamunajurca. Chaipimi, chai runapaj uma jahuapi, maquita churachun nishpa ninanda mañanajurca.
33Shina mañanajujpimi Jesusca, chai runata gentecunamanda carullaman pushashpa, rinricunapi maqui dedocunata satishpa, t'ucashpa, jallupipash tacarirca.
34Shina rurashpallami Jesusca, jahua pachata vichai ricushpa, ninanda llaquirishpaca:
“Efata” nirca.
Efata nishpaca: “Pascarichun ninimi” nijunmi.
35Shina nijhuanmi, chai runapaj rinricunaca pascarirca. Shinallata, jallu huatarishcapash pascarijpimi ali rimajurca.
36Ña alichishpaca: “Cashna rurashcataca pimambash na villanachu canguichi” nishpami mandarca. Ashtahuangarin chashna nishpa mandajpipash, ninandami ashtahuan villanajurca.
37Chashna cajpimi, ninanda manllarishpa cashna ninajurca:
“Tucuitami ali rurashca. Rinricuna na uyajujtapash pascashcami. Rimaita na ushajtapash rimachishcami” ninajurcami.
Who We AreWhat We EelieveWhat We Do
2025 by iamachristian.org,Inc All rights reserved.
