JOSUÉ 24 - Quichua Imbabura 2016

Tucuri shimicunata Josué yachachishcamanda

1Josueca, tucuilla Israel ayllucunatami, Siquem shuti pueblopi tandachirca. Shinallata paicunata mandaj ancianocunata, pushajcunata, juezcunata, catij mandajcunatapash cayajpimi, Taita Diospaj ñaupajpi tandanajurca.

2Josueca, tucui Israelcunatami cashna nijurca:

“Israelcunata Mandaj Taita Diosca, cashnami nin: ‘Cangunapaj ñaupa taitacunaca, jatun yacu chimbapimi, punda huatacunaca causanajurca. Chaipimi, Taré shuti Abrahambaj, Nacorpaj taitapash causarca. Paicunaca, shuj dioscunata alicachishpami causanajurca.

3Shina cajpipash, chai jatun yacu chimbamandami, cangunapaj taita Abrahamdaca tucui cai Canaán llactaman pushamurcani. Isaac shuti churita carashpami, paipaj miraicunataca ashtacata mirachircani.

4Isaac runamambash, Jacob shuti, Esaú shuti churicunatami cararcani. Esaú shuti runa japichunga, Seir shuti llacta urcutami cararcani. Ashtahuangarin Jacobca, paipaj churicunandimi, Egipto llactaman urai rirca.

5Ñucaca, Moisesta, Aaronda cachashpami, Egiptopi causajcunataca, ninan llaquicunahuan llaquichircani. Chai jipami, cangunataca llujchimurcani.

6Cangunapaj taitacunataca, Egipto llactamandami llujchimurcani. Shina llujshishpa mama cuchaman ña chayamujpimi, Egipto llactapi causajcunaca, cangunapaj taitacunataca, carretacunahuan, caballocunahuan, Puca cuchacaman catimurca.

7Mandaj Dios ñucata Israelcuna caparishpa mañajpimi cangunahuan, Egipto llactamanda runacunahuan chaupipi yana fuyuta churarcani. Shinallata paicunapaj jahuapi, mama cuchata cacharijpimi paicunataca quilparca. Egipto llactapi chashna rurajtaca, cangunapaj ñavihuanmi ricurcanguichi. Chai jipaca, tauca punllacunatami jichushca pambacunapi causarcanguichi.

8Chaimandaca Ñucami, Jordán yacu chimbaman causaj amorreo gentecunapaj llactaman pushamurcani. Paicunami, cangunahuan macanajurca. Ashtahuangarin paicunataca, cangunapaj maquipi Ñuca churajpi mishashpami, chai alpacunataca japircanguichi. Shinallata paicunataca, cangunapaj ñaupajpimi tucuchircani.

9Chai jipaca, Zipor shuti runapaj churi, moab llactata jatun mandaj Balac shuti runami, Israelcunahuan macanajungapa jatarirca. Chai Balac shuti runami, Beor shuti runapaj churi Balaam shuti runataca, llaquichina shimicunata rimachun, cayachun cacharca.

10Shina cajpipash Balaam runa mañashcata na uyashpami, cangunataca cutin cutin bendiciarcani. Chashnami cangunataca, paicunapaj maquimanda quishpichircani.

11Chai jipami, Jordán yacuta chimbashpa Jericó puebloman chayamurcanguichi. Shinallata chai Jericó pueblopi causajcunapashmi, cangunahuan macanajurca. Paicunaca: Amorreo, ferezeo, cananeo, heteo, gergeseo, heveo, jebuseo gentecunami carca. Paicunatapash, cangunapaj maquipi Ñuca churajpimi misharcanguichi.

12Amorreo gentecunata ishcai jatun mandajcunataca, cangunapaj espadahuan, cangunapaj arcohuanga na mishashcachu canguichi. Ñucami, canguna nara chayamujpi, tábano shuti chuspicunata cacharishpa, paicunataca llujchishpa cacharcani.

13Shina cajpimi, canguna na tarpushca chagracunatapash, alpacunatapash, canguna na shayachishca pueblocunatapash curcani. Chai pueblocunapi causanajushpami, canguna na tarpushca uvata, olivota micunajunguichi’ ninmi.

14Cunanga, Mandaj Diosta manllashpa, ima na alitapash na rurashpa, na llullashpa, paipajta rurashpa causaichi. Cangunapaj ñaupa taitacuna jatun yacu chimbaman causanajushpa, Egipto llactapi causanajushpa alicachinajushca dioscunataca anchuchinami canguichi. Shina anchuchishpami, Mandaj Diostalla jatunyachishpa causana canguichi.

15Mandaj Diospajta rurashpa causana cangunapi na ali ricurijpica, maijan diospajta ruranatapash cangunallata agllaichilla. Cangunapaj ñaupa taitacuna, jatun yacu chimbaman causanajushpa alicachinajushca dioscunata, na cashpaca cunan canguna causanajuj amorreo gentecunapaj dioscunata alicachina cashpapash agllaichilla. Shina cajpipash ñuca huasi ucu ayllucunahuanga, Mandaj Diostami alicachishpa causashun” nijurcami.

16Shina nijpimi Israelcunaca, cashna ninajurca:

“Mandaj Diosta saquishpa, shuj dioscunatara alicachishpa causanaca, ima punllapash amapacha chayamushpami ali canman.

17Ñucanchita Mandaj Taita Diosmi ñucanchitapash, ñucanchi taitacunatapash, Egipto llactapi gañan causanajujpi llujchimushca. Paimi, pipash na rurai ushanallacunata rurashpa ñucanchitaca, tucui pueblocunata yalinajujpi, ñangunata shamunajujpipash, ricushpa aliguta pushamushca.

18Mandaj Diosmi, chai llactacunapi causaj gentecunatapash, amorreo gentecunatapash, ñucanchi ñaupamanda llujchishpa calpachirca. Chaimandami ñucanchipash, Mandaj Diostalla alicachishpa causashun. Paica, ñucanchi Taita Dios cajpimi, Paitalla alicachishpa causana canchi” ninajurcami.

19Shina ninajujpimi Josueca, cashna nirca: “Cangunaca, Mandaj Diospajta rurashpa causaitaca, na ushanachu canguichi. Paica, jucha illaj Taita Diosmi. Shinallata, Paipajlla causachun munaj Taita Diosmi. Chaimandami, Paita na cazushpa, juchacunata rurashcamandaca, na cungashpa llaquichinga.

20Mandaj Diosta saquishpa, shuj dioscunatara alicachishpa catinajujpica, cangunahuan alitalla rurashca cashpapash, Paica ninanda fiñarishpami llaquichishpa tucuchinga” nijurcami.

21Shina nijpimi Israelcunaca, Josuetaca:

“Napacha chaitaca rurashunllu. Ashtahuangarin, Mandaj Diostallami alicachishpa causapashun” ninajurca.

22Shina ninajujpimi Josueca:

“Mandaj Diosta alicachishpa causanataca, cangunallatami tucuipi pactachingapa agllashcanguichi” nirca.

Shina nijpimi Israelcunaca:

“Ari, tucuipimi pactachipashun” ninajurca.

23Josueca, cashnatapashmi nirca:

“Shina cashpaca, canguna charishca shuj dioscunata anchuchishpa, Israelcunata Mandaj Taita Diostalla tucui shunguhuan alicachishpa causaichi” nircami.

24Shina nijpimi Israelcunaca, Josuetaca:

“Ñucanchica, ñucanchita Mandaj Taita Diostallami alicachipashun. Pai imata mandashcatallami pactachipashun” ninajurca.

25Shina ninajujpimi Josueca, pactachingapa Israelcunahuan chai punllallata ari ninajurca. Shinallata, Siquem shuti pueblopimi, mandashca Shimicunata pactachinajuchun curca.

26Josueca, cai shimicunataca, Taita Dios mandashca shimicunata quilcashca fangapillatami quilcajurca. Chai jipaca, shuj jatun rumita japishpami, Mandaj Diospajlla huasi quimiriapi shayajuj shuj jatun quiru ucupi churarca.

27Chaipimi Josueca, tucui Israelcunata cashna nirca:

“Mandaj Dios yachachishpa ñucanchiman tucui imatalla mandashcataca, cai jatun rumimi ricuchijunga. Ñucanchipaj Taita Diosta na cazushpa, ama llullanajuchunmi, cai rumica tucuicunaman yarichishpa ricuchijunga” nircami.

28Chai jipaca, Josueca tucui Israelcunatami, paicunapaj alpacunaman tigrachun mandarca.

Josué huañushcamanda(Jue. 2:6-10)

29Chai tucuita rurashca jipami, Mandaj Diospajta ruraj Josueca huañurca. Josueca, Nun shuti runapaj churimi carca. Paica, patsaj shuj chunga huatata charishpami huañurca.

30Josuetaca, Efraín shuti urcupi Timnat-sera shuti paipaj alpapillatami pambarca. Chai alpaca, Gaas shuti urcumandaca janajmanmi carca.

31Israelcunaca, Josué causajui huatacunapipash, Josué huañushca jipaman, mandaj rucucuna mandanajui huatacunapipashmi, Mandaj Diosta cazushpa causanajurca. Chai mandaj rucucunaca, Israelcunaman, Mandaj Dios tucui imatalla rurashcataca alimi yacharca.

Siquem shuti pueblopi Josepaj tullucunata pambashcamanda

32Israelcuna Egipto llactamanda Josepaj tullucunata apamushcataca, Siquem shuti pueblopimi pambarca. Siquem shuti runapaj taita, Hamor shuti runata, taita Jacob patsaj culquipaj randishca alpapimi chashna pambarca. Chai alpataca, Josepaj churicunami japinajurca.

Eleazar huañushcamanda

33Shinallata, Aaronbaj churi Eleazarpashmi huañurca. Paitaca, Efraín shuti urcu alpacunapi, paipaj churi Finees shuti runaman cushca quimiriapimi pambarca.