OSEAS 10 - Quichua Imbabura 2016

1Israelcunaca, fanga junda uva yurashnami.

Ashtaca granocunata, fucujunshnami.

Chashna fucunshnallatami, altarcunatapash ninanda ruranajurca.

Paicunapaj alpacunapi ashtaca fucushcashnallatami,

rurashcalla dioscunatapash mirachinajurca.

2Paicunaca, ishcai shungumi causanajun.

Cunanga, paicunaca llaquichi tucunapachami.

Mandaj Diosmi, rurashcalla dioscunatapash, altarcunandi ñutushpa tucuchinga.

3Chaimandami cunanga, cashna ninajunga:

“Ñucanchica, Mandaj Diosta na manllashcamandami, jatun mandajta na charinchi.

Jatun mandajca ñucanchimandaca, ¿imatashi ruranman?” ninajungami.

4Pactachingapa ari ninajushpapash, llullashpallami imatapash ninajun.

Chaimandami llaquicunaca, huachushca alpacunapi jayaj ajenjoshna ashtahuan miranga.

5Samaria pueblopi causajcunaca,

Bet-avén shuti pueblopi tiyaj shicu dioscunamandami llaquirinajunga.

Gentecunaca, chai shicu diosmandami huacanajunga.

Chai dios juyailla cashpapash, tucuchi tucushcata ricushpami, sacerdotecunapash huacanajunga.

6Chai shicu diostaca, Asiria llactata Jareb shuti jatun mandaj runaman carangapami apanga.

Chaimandami Efraín aylluca, pingaichi tucunga.

Israelcunapash, paillata na ali yuyaita cushcamandami, pingai tucunajunga.

7Samaria pueblota jatun mandajca, yacupi huambujuj uchilla caspishnami chingarca.

8Avén shuti pueblo lomacunapi tiyaj altarcunaca tucuchi tucungami.

Chaipimi, Israelcunaca juchata ruranajurca.

Chai altarcunapica casha yuracunami viñanga.

Chaimandami lomacunatapash, urcucunatapash:

“Ñucanchita llapishpa quilpahuaiyari” nishpa caparinajunga.

9Israel gentecunalla,

Gabaa shuti pueblopi causanajui punllamandapachami juchata ruranajunguichi.

Chai juchatami rurashpa catinajunguichi.

Cunanga, Gabaa pueblopimi jatun llaquicuna japinga.

10Paicunataca, Ñuca munashca punllapimi llaquichisha.

Paicuna jatun na alita rurashcamandaca,

shuj gentecuna tandanajushpa shamushpami llaquichinga.

11Efraín aylluca, trillanata alicachishpa yachajushca malta shicushnami.

Efraín ayllumanga, llashaj yuguta apachinshnami paipaj cungapi churarcani.

Judá shuti runapaj miraicunami yapunga.

Jacobpaj miraicunaca, curpacunatami ñutunga.

12Cangunaca, tarpujshna alitalla ruraichi.

Diospaj juyaitaca, granota tandachijshna chasquichi.

Tarpungapa alpata alichinshnami, alichirina canguichi.

Mandaj Dios shamushpa, alitalla rurachun,

Paita mascana punllacunami chayamushca.

13Cangunaca, na alita rurashcamandami,

granota tandachijshna na alitalla japircanguichi.

Llulla shimicunatami, imapash fucushcata micunshna chasquinguichi.

Cangunaca, ninan shinllicunami canchi yarcanguichimi.

Macanajunata ali yachaj runacunatalla yariashpa causashcamandami, chashna tucunguichi.

14Cangunapaj pueblocunapica, ninanda caparinajuimi tiyanga.

Shinlli muyundi pircashcacunatapashmi, tucuilla urmachishpa tucuchinga.

Bet-arbel shuti pueblopi causajcunahuan macanajui punllapi,

Salmán shuti jatun mandaj tucuchishcashnami tucuchinga.

Chaipica, mamacunataca, huahuacunandimi huañuchishpa tucuchirca.

15Bet-el shuti pueblopi causajcunalla,

canguna yapa na alita rurashcamandaca, chashnallatami llaquichinga.

Israelcunata jatun mandajpash, tutamandatami huañuchi tucunga.