EZEQUIEL 26 - Quichua Imbabura 2016

Tiro shuti pueblota llaquichinata villashcamanda

1Chunga shuj huatapaj, callari quilla, punda punllapimi, Mandaj Diosca cashna nihuarca:

2“Huañuna aichayuj runa, Tiro shuti puebloca, Jerusalenda fiñashpami, cashna nijurca:

‘Llactacunapaj pungushna puebloca, tucuchi tucushcami.

Shinamandami ñucapajmanllata tigramurca.

Ñucaca, gentecunahuan jundami casha, paica jichui tucushcami canga’ nijurcami.

3Shinamandami Mandaj Jatun Dios Ñucaca, cashna nini:

Tiro shuti pueblopi causajcuna, Ñucaca canhuan fiñarishcami cani.

Imashna mama cuchaca, yacuta ninanda jatarichin,

chashnallatami Ñucapash ashtaca llactacunata vichai pushamusha.

4Paicunami, Tiro shuti pueblo pircacunata ñutushpa, torrecunatapash shitanajunga.

Chaitami, ñutu alpacaman fichashpa, jaca llambu rumitashna saquisha.

5Mama cucha manñapi puebloca, linllicunata chaquichina pambami tucunga.

Mandaj Jatun Dios Ñucami, chashna nini.

Shuj llactacunamanda shamujcunami, tucuita quichushpa apanajunga.

6Pambacunapi causaj gentecunaca, espadahuanmi huañuchi tucunga.

Chaita ricushpami Ñucataca, Mandaj Dios cajta yachanajunga” nijurcami.

7Mandaj Jatun Diosca, cashnatapashmi nin:

“Tiro shuti pueblota llaquichinajuchunmi,

janajmandaca, Babilonia llactata jatun mandaj Nabucodonosor runata pushamusha.

Paica, jatun mandajcunatapash jatun mandajmi.

Paica, ashtaca caballocunahuan, carretacunahuan,

caballopi tiyarij macanajuj runacunahuan, ashtaca gentecunahuanmi shamunga.

8Paicunami, pambapi causajcunataca, espadahuan huañuchinajunga.

Canda llaquichingapaca, torrecunatami muyundipi shayachinajunga.

Jatun chacanacunahuan, jarcarina jirruhuan shinllipacha shayarishpami macanajunajunga.

9Canda fiñashpami, cambaj jatun pircacunata urmachingapaca,

jatun chacanacunata shayachinajunga.

Cambaj torrecunatapash, hachacunahuanmi tucuchinajunga.

10Paicunapaj ashtaca caballocunahuan shamujpimi,

cangunataca ñutu alpalla quilpanga.

Paicunapaj caballocunapash, carretacunapash culunlla shamunajujpimi,

muyundi cambaj pircacunapash cuyuringa.

Tucuchi tucushca pueblopi, pirca utujurishcata yaicunshna yaicushpami tucuchinga.

11Caballocunaca, tucui ñangunapimi purinajunga.

Gentecunataca, espadahuanmi huañuchinajunga.

Shinllitapacha shayachishca pilarcunapash, alpamanmi urmanga.

12Can imatalla charishcacunatapash shuhuashpami,

jatunacunatapash quichushpa apanajunga.

Pircacunatapash tucuillata urmachishpami,

cambaj juyailla huasicunatapash tucuchinajunga.

Can charishca rumicunatapash, caspicunatapash, ñutu alpatapash yacu chaupipimi shitanajunga.

13Caparishpa candashcapash na ashtahuan uyaringachu.

Shinallata cítaracunahuan taquishcapash, na ashtahuan uyaringachu.

14Candaca, jaca llambu rumitashnami saquisha.

Canga, linllicunata chaquichina pambami tucungui.

Candaca, cutinga pipash na callarichingachu.

Mandaj Dios Ñucami, chashna nini” ninmi Mandaj Jatun Diosca.

15Mandaj Jatun Diosca, Tiro shuti pueblotaca cashnatapashmi nijurca: “Mama cucha manñapi causajcunaca, culunlla can urmajpica, ¿nachu manllaringa? Chugrichi tucushpa caparinajujpi, ninanda huañuchinajujpica, ¿nachu manllaringa?

16Chai llaquita uyashpaca, mama cucha manñapi causajcunata mandajcunaca, paicuna mandashpa tiyajujmanda uriajushpami, jahualla churajushcata anchuchishpa, juyaillaguta sirashca churajunacunatapash llujchishpa lluchulla saquiringa. Ninanda manllarishpami, alpapi tiyarishpa, paicunapaj tucui causaipi ninan manllaihuanlla causanajunga.

17Canmandaca, ninanda llaquirishpa huacashpami, cashna ninajunga:

‘¿Imashnata canga tucurircangui?

Canga, mama cucha muyundi pueblocunapi causanajuj runacunahuan jundamari carcangui.

Alicachi tucushca pueblomari carcangui.

Mama cucha muyundipica, canllamari ninanda alicachi tucushpa causarcangui.

Cambash, cambi causajcunapash, ninan shinllicunamari carcanguichi.

¿Nachu candaca, tucui llactacuna manllashpa causarca?’ ninajungami.

18Can llaquichi tucujui punllapica, yacu chaupipi tiyaj llactacunapash ninanda manllarinajunga.

Can tucurijpica, mama cucha chaupicunapi tiyaj alpacunapashmi ninanda manllarinajunga” nijurcami.

19Mandaj Jatun Diosca, cashnatapashmi nirca: “Candaca, pipash na causanajuj llactacunatashnami, llaquichishpa saquisha. Manllanayai ucumanda yacu llujchimushpami, candaca tucuilla quilpanga.

20Pambana utujuman urai rijcunahuanmi, candapash pacta cachasha. Punda tiyashca pueblocunata, chaquishca alpa quilpashcashnami, candapash alpa ucuman cachasha. Pipash ña na chaipi causajpimi, huañushcacunata pambana pambashna saquiringui. Chashna rurashpami, can ninanda alicachi tucushpa causajushcataca tucuchisha.

21Candaca, chashna illajta ricushpami ninanda manllarinajunga. Candaca mascashpapash, napacha cutinga taringachu” nircami Mandaj Jatun Diosca.