1¡Jatun Diosca, ninanda fiñarishpami, Sion pueblotaca ninanda llaquichirca!
Israelcuna juyaillagu cashcata tucuchijuchunga, jahua pachamandami cachamurca.
Pai fiñarishca punllapica, Pai causana Sion pueblotaca, na yarircachu.
2Jatun Diosca, paicunapaj juchata na cungashpami llaquichishpa tucuchirca.
Ninanda fiñarishpami, Jacobpaj miraicuna causana huasicunataca tucuchirca.
Judá llactapi causajcunapaj shinlli pircacunataca, alpamanmi shitarca.
Jatun mandajtapash, cati mandajcunatapashmi, ninanda pingaichirca.
3Ninanda fiñarishpami, Israelcuna ninan ushaita charishcatapash tucuchirca.
Fiñajcuna llaquichinajujpipash, Diosca na yanaparcachu.
Nina japirinshna fiñarishpami, Jacobpaj miraicunataca tucuillata tucuchijurca.
4Paita fiñaj runa arcohuan llaquichijshnami llaquichirca.
Ima juyailla tiyashcataca, tucuillami tucuchirca.
Pai fiñarishpaca, nina japirinshnami Sion pueblopi huasicunataca tucuchirca.
5Jatun Diosca, fiñaj runashnami, Israelcunataca tucuchirca.
Mandashpa tiyajuna tucui huasicunatapash, shinlli pircacunatapashmi urmachirca.
Shinami, Judá llactapi causajcunapaj llaquicunatapash, huacaicunatapash ashtahuan mirachirca.
6Paicunapaj tandanajuna huasitaca, chugllatashnami urmachirca.
Paicuna tandanajuj pushtutapashmi tucuchirca.
Sion pueblopi causajcunataca, cushijuna punllacunatapash,
samana punllacunatapashmi Mandaj Diosca cungachirca.
Nina japirinshna fiñarishpami, jatun mandajtapash, sacerdotetapash llujchishpa shitarca.
7Jatun Diosca, Paipaj altartapash, Paipajlla huasitapash yangapimi churarca.
Mandashpa tiyajuna paicunapaj huasi jatun pircacunata urmachinajuchunga, fiñajcunapaj maquipimi churarca.
Chai runacunaca, cushijuna punllapishnami, Mandaj Diospaj huasipica caparinajurca.
8Mandaj Diosca, Sion pueblo muyundi jatun pircataca, urmachinatami yarijurca.
Paica, imashna llaquichinata yarijushcataca, tucuitami pactachirca.
Canllaman jatun pircatapash, ucuman jatun pircatapash, ñutushpami tucuchirca.
9Chai pueblo yaicuna pungucunatapash,
chai pueblota jarcanacunatapash, tucuillatami tucuchirca.
Jatun mandajpash, cati mandajcunapashmi, shuj llactaman apai tucushca.
Chai llactapica, Dios rimashca shimicunaca na tiyanllu.
Paicunapaj profetacunamambash, Mandaj Diosca na ashtahuan rimanllu.
10Sion pueblopi causajcunata mandaj ancianocunapash, alpapimi upalla tiyanajun.
Umapipash alpata churarishpami, cañamuta churajushca tiyanajun.
Jerusalenbi causaj cuitsacunapash, cungurishpami, alpaman chayajta cumurinajurca.
11Ninanda llaquirishpa huacajushpami, ñavipash amsayajpi, ninandapacha llaquirijuni.
Sion pueblopi causajcuna jatun llaquita apanajujta ricushpami, shungumandapacha, ninanda llaquirircani.
Tucui uchilla huahuacuna, pueblo plazacunapi huañunajujpimi chashna llaquirircani.
12Paicunapaj mamacunataca:
“¿Tandapash, vinopash maipishi tiyanga?” nishpami tapunajurca.
Ña huañunallacunami, pueblo ñangunapi sirinajurca.
Mamacunapaj migllapimi, samai tucurishpa huañunajurca.
13Jerusalenbi causajcunalla, ¿Imahuanda chimbapurashayari?
¿Na cashpaca, pihuanda chimbapurashpa rimashayari?
Sion pueblopi, chairalla viñai cuitsashna causajcunalla.
Cangunata cushichishpa rimangapaca, ¿pihuanda chimbapurashayari?
Cambaj llaquica, mama cuchashna jatunmari.
¿Pita candaca alichi ushangayari?
14Cangunapaj profetacunaca, yanga pandacunatallami ricunajurca.
Chaimandami, canguna juchata rurashcamanda prezu apai tucunamandaca na quishpichi usharca.
Ashtahuangarin, yanga villanacunata, pandarinacunatallami villanajurca.
15Ñanda yalijcuna ricushpaca, cushijushpami maquita huajtarinajurca.
Silbashpa, umata cuyuchishpami, Jerusalendaca cashna ninajurca:
“¿Cai pueblotachu, ima pandatapash na ruraj, juyaillagu, tucui cai pachapi causajcuna cushijuna pueblo ninajun carca?” ninajurcami.
16Canda tucui fiñajcunami, ninandapacha rimanajurca.
Asishpa ricushpa, quirucunatapash canirishpami, cashna ninajurca:
“Paicunataca, langajshna tucuchishunchi,
cunanga ñucanchi shuyajushca punllapachami chayamushca.
Ña pactamushcamari, ñamari caipi” ninajurcami.
17Mandaj Diosca, Pai imatalla rurangapa yarijushcatami pactachirca.
Ñaupa huatamandapacha pai villachun cachamushcatami pactachirca.
Paica, juchacunata na cungashpami, tucuillata tucuchirca.
Canda fiñajcuna canda ricushpa cushijuchunmi, chashna rurarca.
Canda fiñajcunamanmi, ashtahuan ushaita curca.
18Paicunapaj shungupica, Jatun Diostami caparinajurca.
Sion pueblopi causajcunalla, larca yacu rijujshna, tutapash punllapash viquita jichaichiyari.
Cangunapaj ñavitaca, ama samachishpa huacanajuichilla.
19Chishimanda callarishpa, tucui tuta jatarishpa, unaipi unaipi ninanda caparichiyari.
Taita Diospaj ñaupajpica, tucui shungu llaquirichiyari.
Cangunapaj huahuacunaca, tucui ñan pungucunapimi, yarjaimanda huañunalla sirinajun.
Paicunaman causaita cuchun, maquita vichai churashpa, Diosta mañaichiyari.
20Mandaj Dioslla. Picunata chashna llaquichijushcata yaripayari.
Huarmicunaca, ¿paicuna ungushpa, juyaihuan viñachishca huahuatachu micunga?
¿Sacerdotepash, profetapash, can Jatun Diospaj huasipillatachu huañuchi tucunga?
21Huahuacunapash, rucucunapash pueblo ñangunapimi huañushca sirinajurca.
Chairalla viñai cuitsacunapash, huambracunapash espadahuanmi huañuchi tucunajurca.
Can fiñarishca punllapica, na llaquishpami, cungata fitichun saquircangui.
22Ñucata llaquichinajuchunga, cushijui punllacunapaj cayanshnami, tucui maimandapash cayamurcangui.
Can Mandaj Dios fiñarishca punllapica, pipash na pacajushpa causaj saquirircachu.
Ñuca viñachishca huahuacunataca, ñucata fiñajcunami huañuchishpa tucuchirca.
Who We AreWhat We EelieveWhat We Do
2025 by iamachristian.org,Inc All rights reserved.
