NEHEMÍAS 9 - Quichua Imbabura 2016

Israelcunapaj juchata, Esdras villashcamanda

1Chai quillapajllata ishcai chunga chuscu punllapimi Israelcunaca na micushpa, cañamuta churajushpa, ñutu alpata umapi churashpa tiyanajurca.

2Israelpaj miraicunaca, shuj llacta gentecunamandaca, ña shicanyarishca cashpami, chaipi shayanajushpallata paicunapaj juchatapash, paicunapaj ñaupa taitacuna na alita rurashcatapash Diosman villanajurca.

3Paicuna shayanajushca pushtupillatami, paicunata Mandaj Dios mandashpa quilcashcata quimsa horascaman quilca catijta uyanajurca. Shuj quimsa horastaca, paicunapaj juchacunata villashpami, paicunata Mandaj Diosta alicachinajurca.

4Chai jipami, Jesúa, Bani, Cadmiel, Sebanías, Buni, Serebías, Bani, Quenani shuti levitacunaca, paicunapaj rurashca gradacuna jahuapi shayarishpa, paicunata Mandaj Diosta caparishpa mañanajurca.

5Shina mañashca jipami Jesúa, Cadmiel, Bani, Hasabnías, Serebías, Hodías, Sebanías, Petaías shuti levitacunaca, cashna ninajurca: “Cangunata Mandaj Taita Diostaca, causaita causaicaman alicachingapa jatarichi. Paipaj shutitaca, tucuita yali ninanda jatunyachishpami alicachina canguichi.

6Canllami Mandaj Dios cangui. Canllami jahua pachatapash, ashtahuan jahuaman jahua pachatapash, chaipi imalla tiyajcunandi, cai pachatapash, caipi imalla tiyajcunandi, mama cuchatapash, chaipi imalla tiyajcunandi rurashcangui. Tucui chaicunaman causaita cushcamandami, jahua pachapi causanajuj angelcunapash, candaca ninanda alicachinajun.

7Mandaj Dioslla, Canmi taita Abramda agllashpa, caldeocunapaj Ur shuti pueblomanda llujchishpa, Abraham shutita shutichij Taita Dios cangui.

8Paitaca, tucui shunguhuan Cambaj ñaupajpi cazujujta ricushpami, cananeo, heteo, amorreo, ferezeo, jebuseo, gergeseo shuti gentecunapaj llactata, paipaj miraicunaman carangapa paihuan ari nishcangui. Ali cashcatalla ruraj cashpami, chaitaca pactachishcangui.

9Ñucanchi ñaupa taitacunataca, Egipto llactapi llaquinayaita causanajujta ricushpami, Puca Cucha manñapi cashpa caparishpa mañajta uyashcangui.

10Faraondapash, paipajta rurajcunatapash, paipaj llactapi tucui causajcunatapash ninanda llaquichishpami, shuj ricuchinacunata, jatun manllarinacunata rurashpa, tucuicuna rijsishca tucushcangui. Canga, Israelcunata ninanda jariyashpa llaquichinajujta yachashpami, chashna rurarcangui.

11Israelcuna ricujta, mama cucha chaupita ñanda pascajpimi, paicunaca chaquishca alpata yalinajushca. Ashtahuangarin paicunata llaquichingapa catijcunataca, jatun rumitashnami, yacu ucuman shitashpa saquishcangui.

12Israelcunataca, punllapica pilarshnalla shayajuj fuyuhuan, tutaca pilarshnalla shayajuj ninahuan punchayachishpami, maita rinatapash ñanda ricuchishpa pushashcangui.

13Sinaí urcuman shamushpami, paicunahuanga jahua pachamanda rimamushcangui. Chaipica, ali yachachishcacunata, na llullaj mandashcacunata, pactachinajuchun cushca shimicunata, aligutalla mandashcacunatami cushcangui.

14Samana punllatapash Cambajlla shicanyachishca cachunmi mandashcangui. Chai tucui mandashca shimicunataca, canbajta ruraj Moisesmanmi cushcangui.

15Yarjachinajujpica, jahua pachamanda tandatami caramushcangui. Yacunayachijujpica, jaca rumimanda yacuta llujchishpami carashcangui. Chai llactata carashami nishpa juramentushca cashpami, llactata japinajuchun mandashcangui.

16Ashtahuangarin paicunapash, ñucanchi ñaupa taitacunapashmi jariyashpa, shinlli shungucuna tucushpa, can mandashcacunataca na cazushca.

17Uyangapa na munashpami, juyaillacunata Can rurashcacunataca, yaritapash na yarinajushca. Ashtahuangarin shinlli shungucuna tucushpa na cazushpami, cutin gañan causangapa pushachun munashpa, shuj pushajta churangapa munanajurca. Shina cajpipash Canga, perdonaj, llaquij, alitalla ruraj, ima na alita rurajpipash na ñapash fiñarijlla Taita Dios cashpami, na jichushpa saquishcangui.

18Shina cajpipash, jirruta yacuyachishpa, shicu diosta rurashpami, cashna ninajushca: ‘Caimi, Egiptomanda cangunata vichai pushamuj Taita Dios’ nishpami, na ricunayaicunata ruranajushca.

19Chashna ruranajujpipash, ninanda juyaj cashpami, jichushca pambapica na saquishcangui. Punllapi paicunata pushaj pilarshnalla shayajuj fuyutapash, tutapi paicunata punchayachishpa pushaj pilarshnalla shayajuj ninatapash, na anchuchishcanguichu.

20Ashtahuangarin paicunata yachachingapami, cambaj juyailla Espirituta cachamushpa, Maná shuti micunatapash, yacutapash carajushcanguilla.

21Canga, jichushca pambapipash chuscu chunga huatatami juyashpa charishcangui. Imapash na illajpimi causanajushca. Paicunapaj churajunapash na maucayashca, paicunapaj chaquipash na punguishcachu carca.

22Llactacunatapash, chaipi causaj gentecunandi cujpimi, Jatun mandaj Sehón shuti runa mandajuj Hesbón shuti pueblotapash, jatun mandaj Og shuti runa mandajuj Basán shuti llactatapash japinajushca.

23Paicunapaj huahuacunatapash, jahua pachapi tiyaj luzerocunatashnami mirachishcangui. Shinamandami paicunataca, paicunapaj punda taitacunaman carashami nishca llactata japishpa causanajuchun, chai llactaman pushashcangui.

24Paicunapaj miraicuna shamushpami, chai llactataca japinajushca. Paicunapaj ñaupajpimi, chai llactapi causanajushca cananeo gentecunatapash, chai llactata jatun mandajcunatapash llaquichishpa pingaichishcangui. Paicuna munashcata rurashpa llaquichinajuchunmi saquishcangui.

25Shinallata muyundi pircashca pueblocunata, ali fucuj alpacunata, tucui ima alicunahuan junda huasicunata, yacuta tandachingapa rurashca jatun utujucunata, uva chagracunata, olivo yuracunata, tucui tiyashca fucuj yuracunatapashmi japinajushca. Shina japishpaca, na munangacaman micushpami, Can juyashpa carashcamanda cushijushpa causanajushca.

26Ashtahuangarin paicunaca, Can mandashcata na cazushpa, na alita rurashpami Candaca fiñachishca. Can mandashcatapash saquishpami, Cambajman tigrachingapa rimaj profetacunatapash huañuchishpa, jatun na alita ruranajushca.

27Chashna causanajushcamanda, paicunata fiñajcunapaj maquipi churajpimi, paicunaca ninanda llaquichinajushca. Shina llaquichinajujpi, canda caparishpa mañanajujpimi, Canga jahua pachamanda uyashcangui. Shina uyashpami, ninanda llaquij cashcamanda, chai fiñajcunapaj maquimanda cacharichinajuchun quishpichijcunata cachamushcangui.

28Shina cajpipash, ima llaquipash illaj ali causanajushpaca, cutinmi Cambaj ñaupajpica na alita ruranajushca. Chaimandami, paicunata mandashpa charij, fiñajcunapaj maquipi saquishcangui. Chaimandami paicunaca, cutin Canda mañanajujpi jahua pachamanda uyashpa, Canga llaquij cashcamanda cutin cutin cacharichishcangui.

29Can mandashcata tigrashpa cazunajuchunmi, shinllita tacurishcangui. Ashtahuangarin paicunaca ninanda jariyashpa, can mandashcacunatapash, can yachachishcacunatapash na cazushpami juchata ruranajushca. Chai mandashcacunata cazujcunaca, cazushcamandami causanga. Shina cajpipash, paicunaca jariyashpa, shinlliyashcapacha tucushpami na uyanajushca.

30Chashna cajpipash, paicunataca tauca huatacamanmi na llaquichishcangui. Ashtahuangarin cambaj Espirituhuan, Cambaj profetacunahuan villachun cachajpipash na uyangapa munajpimi, shuj llactamanda gentecunapaj maquipi churashcangui.

31Ashtahuangarin Canga, ninandapacha juyaj, llaquij Taita Dios cashpami, na tucuchishcangui. Paicunataca, na jichushpa saquishcangui.

32Cunanga, ñucanchi Taita Dioslla. Canga, ninan ushaita charij, tucuicuna manllana Taita Dios cashpami, imatalla nishcatapash pactachij, ninanda llaquij Taita Dios capangui. Ñucanchita jatun mandajcuna, cati mandajcuna, ñucanchi sacerdotecuna, profetacuna, ñucanchi punda taitacuna, tucuilla Cambaj gentecuna llaquita apanajushcataca, ama yanga saquipaichu. Asiria llactata jatun mandajcuna mandanajushca punllamanda cunangaman ninan llaquita apanajushcataca, ama saquipaichu.

33Ashtahuangarin canga, ali cashcatalla ruraj cashpami, ñucanchitaca chashna llaquichishcangui. Ashtahuangarin Canga, imatapash aligutalla rurajujpipash ñucanchimi na alita rurashcanchi.

34Ñucanchita jatun mandajcuna, cati mandajcuna, ñucanchi sacerdotecuna, ñucanchi punda taitacunaca, paicuna ali tucuchun Can shinlli tacurishpa mandashcacunataca na pactachishcachu. Tucui Can mandashca shimicunata villajpipash, na uyanayachishcachu.

35Llactacunata paicuna mandanajujpica, ashtaca alicunata carashpami, ali fucuj ashtaca alpacunata carashcangui. Chashna carajpipash, na Cambajta ruranajushcachu. Paicunaca na alita ruranatapash na saquishcachu.

36Cunanga cai llactapi fucushcacunata, imalla tiyajcunata micushpa causachun, ñucanchi ñaupa taitacunaman carashca cai llactapillatami, gañanguna tucushpa causanajunchi.

37Ñucanchi juchacunamandaca, llactapi ninanda fucushca granocunatapash, ñucanchita mandachun churashca jatun mandajcunami micunajun. Paicunaca ñucanchitapash, ñucanchi animalcunatapash, paicuna munashcatami mandashpa llaquichinajun. Chaimandami ñucanchica, jatun llaquipi causanajunchi” ninajurcami.

Israelcunaca, mandashca Shimicunata pactachingapa ari nishcamanda

38Tucui chai llaquicunamandami, ñucanchica pactachingapapacha ari nishpa quilcarcanchi. Chaipica, ñucanchita mandajcunapash, ñucanchi levitacunapash, ñucanchi sacerdotecunapashmi paicunapaj shutita churarca.