1Caitaca, Taita Diostapash, Apunchi Jesucristotapash cazushpa, Tesalónica pueblopi tandanajuj crijcunamanmi, Pablohuan, Silvanohuan, Timoteohuan, “alillachu capanguichi” ninajunchi.
2Ñucanchi Taita Diospash, Apunchi Jesucristopash ninanda juyashpa, ali causaiguta carachunmi munanchi.
Juchata rurajcunataca, Cristo tigramujpimi Taita Diosca llaquichinga3Juyashca crijcuna, cangunamandaca punllandi Taita Diosta “pashi” nina cajpimi mañanajunchi. Cangunaca, ashtahuan crishpa, caishuj chaishuj ninan juyaihuan, shujcunatapash juyashpa miranajujpimi, chashna mañanajunchi.
4Cangunaca, catiriyashpa llaquichijpipash, na ñapash fiñarishpa, alipacha crishpa, shinlli tucushpami, jatun llaquicunataca mishanajunguichi. Chaitami maipi cashpapash, Diosta tucui crijcunaman, cangunamandaca alicachishpa villanajunchi.
5Shina llaquita apashpami, alitalla ruraj Taita Dios, cangunata, Pai mandajuj llactaguman pushanapacha cashcataca ricuchinajunguichi.
6Cangunata llaquichijcunataca, chashnallata llaquichina cashcamandami, Taita Diosca llaquichinga.
7Canguna jatun llaquicunata apashcamandaca, ñucanchindimi, Apunchi Jesús jahua pachamanda, Paipaj ninan ushaita charij angelcunandi tigramujpi, Taita Diosca samachinga.
8Shinallata, Taita Diosta na crijcunatapash, ñucanchi Apunchi Jesucristo quishpichij cashcata na chasquijcunatapashmi, ninashna punchapamba shamushpa llaquichinga.
9Chai na crijcunaca, chingaita chingangapa shitai tucushpami, Apunchi Jesús ninan ushaihuan tiyajujpaj ñaupajmandapash anchuchi tucushca canga.
10Apunchi Jesús shamui punllapi, Diospajlla causaj tucui crijcuna, cushijushpa Paita alicachinajuchunmi, tucui chaicunaca pactanga (Cangunapash, ñucanchi villanajushcata crishcamandami, Diospajlla causanajunguichi).
11Ñucanchi Taita Dios, cangunata, Pai munashpa agllashcashna causachunmi, cangunamandaca punllandi mañanajunchi. Shinallata, Paita crishpa, tucuita rurashpa pactachinajuchunmi, Paipaj ushaita carachun cangunamandaca Diosta mañanajunchi.
12Shina cashpami, Apunchi Jesucristopaj shutitaca ninanda jatunyachijpi, Paipash cangunataca alicachinga. Taita Diospaj ninan juyaimandami, Jesucristohuan chashna pactachinga.
Who We AreWhat We EelieveWhat We Do
2025 by iamachristian.org,Inc All rights reserved.
