1 CRÓNICAS 17 - Quichua Imbabura 2016

Taita Diosca, Davidhuan tucuita pactachingapami ari ninajushca(2 Sam. 7:1-29)

1Davidca, ña paipaj huasipi causajushpami, profeta Natandaca cashna nirca:

“Ricui ñucaca, cedro caspicunahuan rurashca huasipimi causajuni. Ashtahuangarin, Mandaj Dioshuan ari ninajushpa quilcashcata alichishca arcarami, cortina ucupilla tiyajun” nirca.

2Shina nijpimi Natanga, Davidtaca:

“Tucuita rurangapa cambaj shungupi yarijushcataca rurailla. Taita Diosca canhuanmi” nirca.

3Taita Diosca, chai tutallatami Natán runataca cashna nirca:

4“Ñucapajta ruraj Davidpajman rishpa, cashna nigri: Mandaj Diosca, cashnami nin: ‘Ñuca causana huasitaca, canga na shayachinguichu.

5Ñucaca, Israelcunata Egipto llactamanda llujchimushca punllamandapacha cunangaman, na huasicunapica causashcanichu. Ashtahuangarin, yangalla carpacunapi, jatun carpacunapimi, caipi chaipi causajurcani.

6Israelcunahuan maita purijushpapash, Israelcunapaj juezcunataca, ¿shuj shimitallapash rimashcanichu? Paicunatami, Ñuca agllashca Israelcunata michishpa pushachun churarcani. Paicunataca: ¿Imashpata cedro caspicunahuan ñucaman huasita na shayachinguichi nishcanichu?’ ninmi ningui.

7Shina cashcamanda cunanga, Ñucapajta ruraj Davidtaca cashnatapash ningui: Tucuita Mandaj Diosmi, cashna nin: ‘Ñucami candaca, llamacunata ricushpa, michishpa purijushcamanda llujchishpa, Ñuca agllashca Israelcunata mandachun churarcani.

8Shinallata, can maita purijujpipash, tucuipimi canhuan carcani. Canda ñaupashpa rishpami, canda fiñajcunatapash tucuchircani. Imashnami, cai pachapi tucuicuna rijsishca runacuna tiyan, chashnallatami candapash tucuicuna rijsishca cachun churarcani.

9Ñuca agllashca Israelcuna causachumbash, Ñucami alpata cusha. Chaimandaca pipash na anchuchi ushangachu, na ali runacunapash cutinga na llaquichingachu.

10Ñuca agllashca Israelcunata juezcuna mandajui punllamandapachami llaquichinajurca. Ashtahuangarin, canda fiñajcunataca ninanda llaquichishpami pingaichisha. Shinallata, cambaj huasi ucupuratapash mandajcuna cachun, Ñucallata churanata can yachachunmi, Mandaj Dios ñucallata villajuni.

11Can huañuna punlla chayajpi, cambaj ñaupa taitacunahuan tandanajujpipash, cambaj miraimanda shujtami, can mandajushca llactapi mandachun churasha.

12Paimi, Ñuca huasita shayachinga. Pai mandashpa tiyarinatapash, Ñucami causaita causaicaman churasha.

13Ñucami, paipaj Taita casha, paica Ñuca churimi canga. Ñuca juyaitaca, cambaj punda mandajmanda anchuchishcashnaca, na anchuchishachu.

14Ashtahuangarin, Ñuca huasipipash, Ñuca mandanapipash, causaita causaicaman ali shinllipacha cachunmi churasha. Pai mandashpa tiyajunataca, causaita causaicamanmi churasha’ ninmi nigri” nijurcami.

15Profeta Natanga, tucui imata uyashcata, muscuipishna ricushcatami, Davidman villajurca.

16Chaita villajpimi, jatun mandaj Davidca, Mandaj Dios uyajujpi, cashna nijurca: “Mandaj Taita Dioslla, ñucata chashnapacha juyashpa charijuchunga, ñucapash, ñuca huasi ucupurapash, ¿ima alitata rurapashcanchiyari?

17Taita Dioslla, cai tucuita rurashami nijushcapash, cambica ashallami ricuripanga. Shinallata, cambajta ruraj ñucapaj huasi ucupuracuna, jipa punllacunapi imashna canamandapashmi villashcangui. Mandaj Taita Dioslla, ñucatapash ali runatashnami ricuhuashcangui.

18Cambajta ruraj ñucata cashna alicachijujpica, ¿imatata ashtahuanga ni ushapashayari? Cambajta ruraj ñucataca, canllata alimi rijsihuangui.

19Mandaj Dioslla, cambajta ruraj ñucataca, tucui shunguhuan juyashpami, Can jatun cajta ricuchingapa cashna jatun alicunata rurapashcangui.

20Mandaj Dioslla, Canshnaca pipash na tiyanllu. Shuj Taita Diospash napacha tiyanllu. Canllami Taita Dios cangui. Chaitaca, ñucanchi rinricunahuan uyashpami, chashna cajta yachanchi.

21Cai pachapica, ¿Can agllashca Israel llactashnaca maipita tiyangayari? Can Taita Diosmi, paicunataca, Cambaj agllashcacuna cachun Egipto llactamanda llujchimurcangui. Jatun ruraicunata, imapash juyaillacunata rurashpa, Cambaj shuti rijsishca cachunmi, chashna llujchimushcangui.

22Can agllashca Israelcunataca, causaita causaicaman, Cambajlla cachun agllashpami, Can Mandaj Diosca, paicunapaj Taita Dios tucurcangui.

23Cunanga Mandaj Dioslla, cambajta ruraj ñucamambash, ñuca miraicunamambash, imatalla rurasha nishcataca, causaita causaicaman pactachipailla.

24Cambaj shutica causaita causaicaman jatunyachi tucushca cachun. ‘Tucuita Mandaj Diosmi, Israelcunapajca Taita Dios’ ninajuchun. Cambajta ruraj Davidpaj miraicunapash, Candaca alipacha cazushpa causachun.

25Ñuca Taita Dioslla, Canllatami, ñuca huasi ucupuracuna mandaj cachun churanata villahuashcangui. Chaimandami, cambajta ruraj ñucaca, Canda ninanda alicachishpa mañanata charipani.

26Mandaj Taita Dioslla, Canllami Taita Dios capangui. Cambajta ruraj ñucaman cashna aliguta ruranataca Canllatami villahuashcangui.

27Cunanga, cambajta ruraj ñucapaj huasi ucupurataca, causaita causaicaman, Cambaj ñaupajpi alita ruranajuchunmi bendiciangapa munashcangui. Can Mandaj Diosllata bendiciajpimi, causaita causaicaman bendiciai tucunajunga” nijurcami.