PROVERBIOS 7 - Quichua Imbabura 2016

Na ali huarmicuna imashna umachij cashcamanda

1Ñuca huahualla,

ñuca yachachishca yuyaicunataca, aliguta huacaichingui.

Ñuca mandashcacunataca, shungupi aliguta alichingui.

2Ñuca mandashcacunata pactachishpaca ali causaitami charingui.

Ñuca mandashca shimicunataca, ricujuj cambaj ñavitashna huacaichingui.

3Cai mandashcacunataca, maquipi ali huatashcashna,

shungupi quilcashcashna charingui.

4Cai ali yachanataca: “Canmi ñuca pani cangui” niyari.

Ali yuyaitaca: “Ñuca ayllupurami cangui” niyari.

5Na ali huarmi ama umachi ushachunmi, chashna nina cangui.

Na rijsishca huarmi, mishquilla shimicunahuan parlashpa,

ama umachi ushachunmi, chashna nina cangui.

6Ñucaca, huasi ucu ventanamandami ricujurcani.

7Chaipimi, juizu illaj huambracunata ricurcani.

Chai huambracunamandaca, shuj huambratami ashtahuan juizu illaj cajta ricurcani.

8Chai huambrami ñanda chimbashpa, chai huarmipaj huasiman rijurca.

9Paica, ña chishashpa amsayajujpimi, ña yanayashca tutapi rijurca.

10Chaipimi, shuj na ali huarmica tuparirca.

Chai na ali huarmica, ninanda alichirishca,

umachinatapash alipacha yachaj huarmimi carca.

11Chai na ali huarmica, carumandallata juyailla ricurijunmi carca.

Puringuicha huarmi cashpami, huasipi tiyaitaca na usharca.

12Huaquimbica ñangunapi, huaquimbica plazacunapimi carca.

Ñan tigranacunapimi, pacalla chapajun carca.

13Chai na ali huarmica, chai huambrataca, ugllashpa, muchashpami,

imatallapash na pingashpami, cashna nijurca:

14“Dioshuan ali cangapa ofrendacunata cungapa pactachingapami ari nijurcani.

Chaitaca, cunanmari pactachircani.

15Chaimandami, canda tuparingapa llujshimurcani.

Cambaj ñavita ricunayaimanda mascaj shamushpami, cunanga tuparini.

16Ñuca camataca, fachacunahuanmi juyaillaguta alichircani.

Egiptomanda apamushca, caupushca lino puchahuan ahuashca juyailla fachacunahuanmi alichircani.

17Ñuca puñuna ucupica, juyaillagu ashnajuchunmi,

mirra, áloe, canelata churarcani.

18Shamuilla, pacaringacaman ninandapacha juyarishun.

Ninanda juyarishpa cushijunajungapa shamuilla.

19Ñuca cusaca na huasipichu,

caru llactamanmi rirca.

20Culqui muchilatapash apashpami rirca.

Paica shamuna punllapimi shamunga” nijurcami.

21Juyailla shimicunahuan rimajushpallata,

juyaillata nirijushpallatami, ari nichirca.

22Chai huambraca, huarmita catishpa rircallami.

Huagrata huañuchingapa apajpishnami rirca.

Shinlli shungu runata llaquichingapa apajpishnami rirca.

23Alasyu animal linllipi urmagrinshnami,

huañuiman apai tucujushcataca na yachashpa,

shungupi flecha chayajpira yachaj chayarca.

24Huahuacuna, cunanga uyahuaichi.

Ali yuyaicunata ñuca cushcataca, aliguta uyahuaichi.

25Chai na ali huarmitaca, yaritapash na yarinachu cangui.

Napacha paita catishpa pandarinachu cangui.

26Chai na ali huarmica, ashtacacunatami umachishca.

Paica, shinlli runacunatapashmi umachishpa huañuiman apashca.

27Chai huarmipaj huasiman rijcunaca Seolmanmi rinajun.

Chai ñanga, huañuimanmi apajun.