1 REYES 17 - Quichua Imbabura 2016

Na tamianata Elías villashcamanda

1Eliasca, Galaad llactapi tiyajuj Tisbe shuti pueblomandami carca. Paimi, Acab runataca: “Ñucaca, Israelcunata Mandaj Taita Diosta cazushpa causashpami, Paipaj shutipi cashna nini: Cai huatacunapica, na tamiangachu, jamzi paramullapash na urmangachu. Ashtahuangarin ñuca mandajpillami tamianga ninimi” nirca.

2Chai jipami Mandaj Diosca, Eliastaca cashna nirca:

3“Caimandaca, indi llujshimujman rishpa, Jordán yacu chimbapurapi tiyajuj Querit shuti jatun larca yacuman chayanapi pacajugri.

4Chaipica, jatun larca yacutami ufiana cangui. Shinallata, chaipi micunata canman carachunga, cuervo shuti alasyu animalcunatami ña mandarcani” nircami.

5Shina nijpimi Eliasca, Mandaj Dios mandashcashna, Jordán yacu chimbapi tiyaj Querit shuti jatun larca yacu chayanaman rishpa, chaipi causagrirca.

6Chai cuervo shuti alasyu animalcunami, tutamandapash chishipash, tandata aichata apamunajun carca. Yacutapash, chai jatun larcamandami ufiajurca.

7Ña tauca punllacuna yalishca jipa, chai llactapi na tamiajpimi, chai jatun larca yacupash chaquirca.

Eliasmandapash, Sarepta pueblopi causaj sapalla huarmimandapash

8Chai jipami Mandaj Diosca, cashna nirca:

9“Sidón shuti llactapi tiyaj Sarepta shuti puebloman rishpa, chaipi causagri. Chaipi canman micunata carashpa charichunga, shuj sapalla huarmitami mandarcani” nircami.

10Shina nijpi, Sarepta puebloman rijushpami Eliasca, chai puebloman yaicuna punguman chayajushpaca, yamdata tandachishpa purijuj shuj sapalla huarmihuan tuparirca. Chai huarmita cayashpami:

“Ufiangapa asha yacuguta carahuai” nirca.

11Chai huarmica, yacuta apamungapa ña rijujpimi, Eliasca cutin cayashpa:

“Asha tandagutapash apamupangui” nirca.

12Shina nijpimi chai huarmica, cashna nirca:

“Canda Mandaj Taita Diospash ricujunmi. Cusashca tandataca na charinichu, maqui jundashnalla jacugutallami mangapi charini. Aceitetapash, ashagutallami uchilla fundupi charini. Cunanga, yarjaimanda nara huañushpallata tandata rurashpa ñuca churiguhuan micungapami, cai ishcailla yamdata tandachijurcani”. nircami.

13Shina nijpimi Eliasca, cashna nirca:

“Ama manllaichu. Can nishcashna chai jacutaca, shuj uchilla tortillata rurashpa tulpapi cusashpa, ñucamanra apamugripai. Chai jipaca canmambash, cambaj churimambash tortillata ruranguillami.

14Israelcunata Mandaj Taita Diosmi, cashna nin: ‘Mandaj Dios Ñuca tamiachina punllacamanmi, chai mangapi jacupash, uchilla fundupi aceitepash na tucuringa’ ninmi” nircami.

15Shina nijpimi chai huarmica, Elías imashna nishcashna rurangapa rirca. Chashna rurashpami Eliaspash, chai sapalla huarmipash, paipaj huahuapash, tauca punllacunata micushpa causanajurca.

16Eliasman Mandaj Dios villashcashnami, chai mangamanda jacupash, uchilla fundumanda aceitepash na tucurirca.

17Chai jipacunami, chai huasimanda huarmipaj churica, ungüi japijpi huañunalla sirijurca. Chashna sirijushpami, ashtahuan anllayashpa huañurca.

18Chaimandami chai huarmica, Eliasta cashna nirca:

“Taita Diospajta ruraj runa, candaca, ¿ima na alitata rurashcaniyari? ¿Ñuca juchacunata yarichishpa, ñuca churita huañuchingapachu shamurcangui?” nirca.

19Shina nijpimi, Eliasca:

“Cambaj churita caiman apamui” nirca.

Shina nijpi chai huahuata apamujpimi Eliasca, chai huarmipaj rigramanda japishpa, pai causajuj ucuman aparca. Chai ucuman apashpami, Elías puñuj camapi sirichirca.

20Chaipi sirichishpami Eliasca, ninanda caparishpa, Mandaj Diostaca mañashpa cashna nirca: “Ñucata Mandaj Taita Dioslla, ¿sapalla huarmipaj huasipimi, mingarishpa tiyajuni. Shina cajpitachu cai huarmipaj huahuata causaita quichushpa llaquichingui?” nircami.

21Eliasca, chai huahuapaj jahuapi quimsaman siririshpami, Mandaj Diostaca: “Ñucata Mandaj Taita Dioslla, cai huahuapaj almata paipajman tigrachipai nipanimi” nishpa, caparishpa mañarca.

22Elías mañajujta Mandaj Dios uyashpa, chai huahuapaj almata tigrachijpimi, cutin causarirca.

23Eliasca, pai causajuj ucumanda huahuata apamushpami:

“Ricui, cambaj churica causarircami” nishpa, chai huahuapaj mamaman curca.

24Chaimandami chai huarmica, Eliastaca cashna nirca:

“Taita Diospaj runagu cajtaca, cunanmi yachani. Mandaj Diospacha paipaj shimita villachun mandajpi, na llullashpa villajushcatapashmi yachanimi” nircami.