1Bel shuti, Nebo shuti dioscunapash alpamanmi urmashca.
Chai rurashcalla dioscunataca, aparij animalcunamanmi apachirca.
Shaijushca animalcunamanmi, chai dioscunataca apachirca.
2Chai dioscunataca gentecunahuan tandachishpami, prezu aparca.
Paicunaca, quishpirita na ushashpami, chashna apai tucurca.
3Jacobpaj miraicunalla, uyahuaichi.
Israel gentecunamanda, huaquin puchushcacunaca, tucuicuna uyahuaichi.
Mamapaj vijsapi cajpillatami, cangunataca ricujurcani.
Candaca, huahuamandapachami, pushamurcani.
4Rucuyashpa, yuraj ajcha tucungacamanmi cangunataca ricuriajusha.
Ñucallata, cangunaman causaita cushca cashpami, Ñuca maquipi huacaichishpa, ricuriasha.
5Ñucataca, ¿pihuanda chimbapuranguichi?
¿Piman rijchajmi yanguichita?
Ñucataca, ¿piman rijchaj yashpata chimbapurahuanguichi?
6Curitapash, culquitapash, muchilamanda llujchishpami, balanzacunapi pezanajun.
Chai jipaca, culquita yacuyachishpa imamambash rijchajta ruraj runamanmi, culquita cushpa, rurashcalla diosta rurachinajun.
Chai diostami, cungurishpa mañan.
7Chai diostaca, rigra jahuapi churashpa apashpami, shuj pushtupi churanajun.
Chai pushtupica tiyajunllami, chai pushtumandaca maimambash na cuyurinllu.
Caparishpa mañajpipash, na tigrachinllu.
Jatun llaquimandapash, na quishpichinllu.
8Chaita rurashcata yarishpaca, ninandami llaquirina canguichi.
Yachashpata na cazuj runacuna, ali yuyaita japinami canguichi.
9Yalishca punda huatacunapi, Ñuca imata rurashcacunataca yarinami canguichi.
Ñucami Taita Dios cani. Ñucamanda shuj Taita Diosca na tiyanllu.
Ñucaman rijchajca, imapash na tiyanllu.
10Jipa punllacuna ima tucunatapash, Ñucami callarimandapacha villani.
Nara imapash tiyajpillatami, pundamandapacha imata ruranatapash villani.
Ñucami cashna nini: Ñuca yachachishcacunaca, tucui causaipajmi canga.
Ñuca imata ruranataca, pactachishapachami.
11Ñucami, indi llujshimujmanda, alasyu animalta cayanshna,
caru llactamanda, Ñuca yarishca shuj runata cayarcani.
Ñucami cayashpa, paitaca pushamusha.
Ñuca yarijushcataca, pactachishapachami.
12Shinlli shungucuna, uyahuaichi.
Cangunaca, alitalla ruranamandaca, anchurishcami causanguichi.
13Llaquichina punllacunaca ñami chayamujun.
Cangunata quishpichina punllapash, ñami chayamujun.
Sion shuti pueblopi causajcunataca quishpichishami.
Ñuca ninan ushaita charishcatapash, Israel llactapimi ricuchisha.
Who We AreWhat We EelieveWhat We Do
2025 by iamachristian.org,Inc All rights reserved.
