JUECES 11 - Quichua Imbabura 2016

1Galaad llactamanda Jefté shuti runaca, macanajunata ali yachaj shinlli runami carca. Paica, culquimanda huainayaj huarmipaj churimi carca. Paipaj taitaca, Galaad shutimi carca.

2Galaad runa, paipaj huarmihuan charishca churicuna viñashpami: “Canga, shuj huarmipaj churi cashcamandaca, ñucanchi taitapaj huasi ucupurapica, imata japinatapash na charinguichu” nishpami Jefté runataca llujchishpa cacharca.

3Chaimandami Jefté runaca, paipaj huauquicunamanda pacajushpa rishpa, Tob shuti pambacunapi causajurca. Chaipica, shuhua runacunahuan tandanajushpami purijurca.

4Huaquin huatacuna yalishca jipami, Amón llacta gentecunaca, Israelcunahuan macanajungapa rirca.

5Amón llacta gentecuna Israelcunahuan macanajuj shamujpimi, Galaad llactata mandaj ancianocunaca, Tob shuti pambacunapi causajuj Jefté runata pushamungapa rinajurca.

6Chaipimi Jefté runataca, cashna ninajurca: “Can, ñucanchita mandaj tucushpa, Amón llacta gentecunahuan macanajungapa ringapa shamui” ninajurcami.

7Shina nijpimi Jefté runaca, Galaad llactata mandaj ancianocunataca cashna nirca: “¿Nachu ñucataca na ricunayachishpa, ñuca taitapaj huasimanda llujchishpa cachahuarcanguichi? ¿Imashpata cunanga llaqui japijpilla, ñucapajman shamunguichi?” nircami.

8Shina nijpimi, Galaad llactata mandaj ancianocunaca, Jefté runataca cashna ninajurca: “Ari shinamandami, cunanga cambajman cutin shamupanchi. Ñucanchihuan rishpa, Amón llacta gentecunahuan macanajushpa, Galaad llactapi causanajuj ñucanchita mandaj tucuchunmi, pushaj shamupanchi” ninajurcami.

9Shina nijpimi Jefté runaca, Galaad llactata mandaj ancianocunataca cashna nirca: “Amón llacta gentecunahuan macanajungapa, canguna ñucata tigrachijpi, Mandaj Diospash, paicunata ñuca maquipi churajpica, ñucapash cangunata mandajpachami tucusha” nircami.

10Shina nijpimi, Galaad llactata mandaj ancianocunaca Jefté runataca: “Can nishcata ñucanchi na pactachijpica, Mandaj Diosllatami, ñucanchitaca ricushpa llaquichinga” ninajurcami.

11Shina nijpimi Jefté runaca, Galaad llactata mandaj ancianocunandi shamurca. Shina shamujpimi, chai llactapi causajcunaca, paicunata mandaj cachun churanajurca. Jefté runaca, Mizpa shuti pueblopica, Mandaj Diospaj ñaupajpimi tucuita rimajurca.

12Jefté runaca villaj runacunatami, Amón llactata jatun mandajpajman cashna nichun cacharca: “Canga, ¿imamandata ñucata fiñashpa, ñuca llactapi causajcunahuan macanajungapa shamugrijungui?” nichunmi cacharca.

13Shina nijpimi, Amón llactata jatun mandajca, Jefté runa cachashca villaj runacunataca, cashna nirca: “Israelcuna Egiptomanda vichai shamushpami, Arnón shuti jatun yacumanda callarishpa, Jaboc shuti yacucaman, Jordán yacucamambash, ñuca llactata quichurca. Cunanga, na macanajushpallata chai llactataca uchashpa tigrachihuailla” nircami.

14Shina nijpimi Jefté runaca, cutin shuj villaj runacunata, Amón llactata jatun mandajpajman cacharca.

15Paicunataca, cashna nichunmi cacharca: “Jefté runaca, cashnami nin: ‘Israelcunaca, Moab llactapi, Amón llactapi tiyaj alpacunataca na quichushcachu.

16Paicunaca, Egipto llactamanda llujshimushpaca, Israel gentecunaca jichushca pambata shamushpami, Puca Cuchata yalishpa, Cades shuti pueblocaman chayamurca.

17Chaiman chayashpami, Edom llactata jatun mandajtaca: Cambaj llactata yalingapa ñanda mañachihuai nichun, villajcunata cacharca. Ashtahuangarin, Edom llactata jatun mandajca na uyangapa munarcachu. Moab llactata jatun mandajmambash, chashnallata nichun cachajpica, paipash na uyangapa munarcachu. Chaimandami Israelcunaca, Cades shuti pueblopillata saquirishca.

18Chai jipaca, jichushca pambata rishpami, Edom llactata, Moab llactata muyushpa, indi llujshimujta rishpa, Arnón shuti jatun yacu chimbaman, carpacunata shayachishpa tiyanajurca. Arnón shuti yacuca, Moab llactapaj cajpimi, chaipilla saquirinajurca.

19Chaipi cashpami Israelcunaca, Hesbón pueblopimi, amorreo gentecunata jatun mandaj Sehón shuti runapajman, villajcunata cacharca. Paitaca: “Ñucanchi llactaman yalingapa, cambaj llacta ñanda mañachi nipanimi” nichunmi cacharca.

20Sehón shuti runaca, Israelcunataca llullanajunmi yashpami, paipaj llactata yalichunga na saquirca. Ashtahuangarin Sehón shuti runaca, macanajunata ali yachaj tucuilla runacunata tandachishpami, Jahaza shuti pueblopi carpacunata shayachishpa, Israelcunahuanga macanajui callarirca.

21Shina cajpipash, Israelcunata Mandaj Taita Diosca, Sehón shuti runatapash, paipaj tucuilla gentecunatapash, Israelcunapaj maquipi churajpimi, Israelcunaca, chai llactapi causanajuj amorreo gentecunapaj tucui llactata quichurca.

22Amorreocunapaj tucui llactatapash, Arnón shuti jatun yacumandaca, Jaboc shuti jatun yacucaman, shinallata, jichushca pambamandaca, Jordán yacucamanmi quichurca.

23Shina cashpaca, ¿Israelcunata Mandaj Taita Diosllata, pai agllashca Israelcunapaj ñaupajpi, amorreo gentecunata quichushca alpata quichungapachu cunanga munangui?

24Quemos shuti cambaj dios canman cujpica, ¿nachu cambash japinguiman? Shinallatami, ñucanchita Mandaj Taita Diosca, alpata quichushpa, ñucanchiman curca.

25Canga, Zipor shuti runapaj churi, Moab llactata jatun mandaj Balac runataca, ¿imapillapash yalichu cangui? ¿Paica, Israelcunataca imatallapash juchachishpa, paicunahuan macanajurcachu?

26Israelcunaca, Hesbón shuti, Aroer shuti pueblocunapi, chai muyundi uchilla pueblocunapi, Arnón shuti yacu manñapi tiyaj tucui pueblocunapica, quimsa patsaj huatatami causashca. Shina cashpaca, ¿imashpata chai huatacunapillata cutin na quichui usharcanguichi?

27Shina cashpaca, candaca ima na alitallapash na rurashcanichu. Ashtahuangarin, canmi, fiñashpa macanajungapa shamushpa, ñucata llaquichijungui. Cunanga, Mandaj Dios ñucanchita ricushpa, ñucanchi Israelcunatapash, Amón llacta gentecunatapash, ishcandita ali ricushpa, Paillata llaquichijuchun’ ninmi” nichunmi cacharca.

28Ashtahuangarin Amón llactata jatun mandaj runaca, Jefté runa aliguta yarishpa villachun cachashcataca, na cazurcachu.

29Mandaj Diospaj Espiritumi, Jefté runapajman shamurca. Shinamandami, Galaad llactata, Manasés llactatapash yalishpa, Galaad llactapillata tiyajuj, Mizpa shuti puebloman tigrashpa, amonita gentecunapajman yalirca.

30Chaipi cashpami Jefté runaca, Mandaj Diosman ofrendata cushami nishpa, cashna nijurca: “Amón llacta gentecunata, ñuca maquipi churajpi,

31amonitacunata mishashpa tigrajujpi, ñucata tuparingapa ñuca huasimanda maijan punda llujshimujmi, Mandaj Diospaj canga. Chaitaca, canman cushpami tucuillata rupachisha” nijurcami.

32Amón llacta gentecunahuan Jefté runa macanajugrijpimi, Mandaj Diosca paipaj maquipi churarca.

33Jefté runaca ashtacacunata huañuchishpami, Aroer shuti pueblomanda, Minit shuti, Abel Queramín shuti pueblocunacaman, ishcai chunga pueblocunata quichurca. Uva tarpushca, yacu tiyaj juyailla alpacunatapashmi quichurca. Shinami Israelcunaca, Amón llacta gentecunata mandashpa causanajurca.

34Macanajuita mishashpa, Mizpa shuti pueblopi tiyaj paipaj huasiman Jefté runa tigrajujpica, paipaj ushimi panderocunata huactashpa, tushushpandi tuparingapa llujshimurca. Jefté runaca, na ashtahuan huahuacunata charishpami, chai ushigutalla charirca.

35Paipaj ushigu llujshimujta ricushpami Jefté runaca, pai churajushcata liquishpa, cashna nirca: “¡Aij ñuca ushigulla, jatun llaquipipachamari churahuangui! Canllatami, ñucataca jatun llaquipi churahuangui. Mandaj Diosman cushapachami nishcataca, na saqui ushanichu” nircami.

36Shina nijpimi paipaj ushica, cashna nirca: “Ñuca taitalla. Mandaj Diosman cushpa pactachishami nishca cashpaca, can nishcashna, ñucata cushpa pactachinallami cangui. Canda fiñaj Amón llacta gentecunataca, imashna paicuna llaquichishcashna, paicunatapash llaquichishpami, Mandaj Diosca pactachishca” nircami.

37Paipaj taitataca, cutinmi cashna nirca: “Cai mañaigutallami charipani: Jarihuan nara tacarishca cashcamanda, ñucapaj cumba cuitsacunahuan, huacashpa, ishcai quillata urcucunata purijungapa shuyapai” nircami.

38Shina nijpimi Jefté runaca, rilla nishpa ishcai quillacaman saquirca. Shina cachajpimi paipaj cumba cuitsacunahuan rishpa, jarihuan nara tacarishca cashcamanda, urcucunapi huacajurca.

39Ishcai quilla yalijpi, paipaj taitapajman tigramujpimi, paipaj ushita Diosman cushami nishcataca pactachirca. Jefté runapaj ushica, jarihuan nara tacarishcami carca.

40Galaad llactapi causaj Jefté runapaj ushi shina tucushcamandami, jarihuan nara tacarishca Israel cuitsacunaca, chaita yarishpa huacangapa, huatapi chuscu punllacaman, huatandi llujshinajuj carca.