1Job runaca, alitallami rurashpa causashcani nijujpimi, chai quimsa runacunaca imatapash na tigrachi ushashpa, upalla uyanajurca.
2Job runaca, Taita Diospaj ñaupajpica, ima pandatapash na rurarcanichu nijujpimi, Eliú shuti runaca ninanda fiñarirca. Eliú shuti runaca, Baraquel shuti runapaj churimi carca. Baraquel shuti runaca, Ram shuti runapaj ayllupura, Buz shuti runapaj churimi carca.
3Shinallata Job runapash, paipaj quimsa cumbacunahuanga, ninandapachami fiñarirca. Job runata juchachinajushpapash, imatapash na tigrachi ushashcamandami chashna fiñarirca.
4Eliú shuti runaca, chairalla viñai cashpami, caishuj rucucuna Jobhuan parlashpa tucuchingacaman upalla shuyajurcalla.
5Shina cajpipash chai quimsa runacunaca, imatapash na ashtahuan ni ushanajujpimi, Eliú shuti runaca, ninandapacha fiñarirca.
6Chaimandami, Baraquel buzita shuti runapaj churi Eliú runaca, cashna nijurca:
“Ñucaca, chairalla viñaimi cani. Cangunaca, ña rucucunami canguichi.
Shinamandami manllashpa, ñuca imatalla yarijushcataca nara nircani.
7Ñucaca: ‘Unaita causaj, rucu taitacunami, ali yachashpa rimanga’ yajurcanimi.
8Runaca, Dios carashca espiritutami charin.
Tucuita rurai ushaj Diospaj Samaimi, imatapash yachachin.
9Unai huatacunata charij rucucuna cashpapash, na alipacha yachanllachu.
Rucu cashpapash, aliguta mandaitaca na ali yachanllu.
10Shinamandami, ñucapash cangunataca:
‘Uyahuaichi, ñuca ali yachashcata villangapami munani’ nircani.
11Canguna aliguta yarishpa rimachunmi shuyajurcani.
Canguna rimajtapash alimi uyajurcani.
Imata rimangapa yarinajujtapash yacharcanimi.
12Ñucaca alimi uyajurcani.
Cangunaca, Job runataca na chashnachu nitaca, maijambash na ushashpami,
Pai ali yarishpa rimashcatapash, napacha tigrachi usharcanguichi.
13Cangunaca: ‘Ali yachajmi canchi’ ninataca, saquinami canguichi.
Taita Diosllami imatapash ninga.
Runaca na imata ni ushangachu.
14Cunanga Job runaca, ñucataca na fiñashpa imatapash rimahuarcachu.
Ñucapash, paitaca na cangunashnaca rimashachu.
15Paicunaca manllarishpami, na imatapash nishpa upalla saquirirca.
Paicuna imata ali yarinajushcapash chingarcami.
16Imatapash rimangami yashpa shuyajujpipash, paicunaca upalla tiyanajurcallami.
Paicunaca upalla cashpami, imatapash na ashtahuan ninajurca.
17Shinamandami ñucapash, imatallapash rimangapa munani.
Ñucapash, ñuca yachashcata rimangapami munani.
18Ñucapash, ashtaca rimanacunatami charini.
Chaimandami, uchalla rimangapa munani.
19Ñuca yuyaipica, rimanayaica jundaitami jundariyan.
Cara muchilapi samai jundashpa ña tugyanashnami cani.
20Imatallapash rimashpami, samaita aisai ushasha.
Imatallapash tigrachishpami ali casha.
21Cunanga, maijandapash na ñavita ricushpalla rimashachu.
Maijandapash jatumbi churashpaca na rimashachu.
22Ñucaca, pitapash jatumbi churashpa parlanataca na yachanichu.
Shina rurajpica, ñucaman causaita cuj Diosca ñapashmi llaquichihuanman.
Who We AreWhat We EelieveWhat We Do
2025 by iamachristian.org,Inc All rights reserved.
