MATEO 18 - Quichua Imbabura 2016

“¿Maijanshi ashtahuan yali jatun canchi?” ninajushcami(Mar. 9:33-37; Luc. 9:46-48)

1Chai punllacunapimi paipaj yachajujcunaca, Jesuspajman shamushpa cashna ninajurca:

“¿Jahua pachamanda Dios mandajujpica, maijanshi ashtahuan yali alicachi tucushca?” ninajurcami.

2Shina nijpimi Jesusca, shuj huahuata cayashpa, paicunapaj chaupipi shayachishpa,

3cashna nirca:

“Na llullashpami, cangunataca cashna nini: Huahuacunashnalla yarishpa causangapa na tigrashpaca, jahua pachamanda Dios mandajuj llactaman yaicuitaca napacha ushangachu.

4Maijambash cai huahuagushna, ali shunguhuampacha causashpami, jahua pachamanda Dios mandajuj llactapica, ninanda alicachi tucujunga.

5Maijambash Ñuca shutipi cai huahuatashna chasquishpaca, Ñucatami chasquihuan.

Juchapi urmachinaca, jatun llaquimi(Mar. 9:42-48; Luc. 17:1-2)

6Maijambash cai huahuagushna Ñucata crijcunata pandachijcunataca, burru aisana jatun molino rumita cungapi huatashpa, mama cuchapi shitashpachari ashtahuan ali canman.

7Cai pachapi nitijachijshna pandachijcunaca ¡aij imachari tucunga!, imapash juchapi pandarinaca tiyanapachami. Chashna nitijachijshna pandachij runaca ¡aij imachari tucunga!

8Chaimi, maqui cashpa, chaqui cashpapash, imatapash na alita rurachingapa munajpica, muchushpa shitana cangui. Chashna shujlla maquihuan, shujlla chaquihuan causaita causangapa rinami, cambajca ashtahuan ali. Ashtahuangarin, ucu pachapi na huañushpa rupajuj ninaman ishcandi maquihuan, ishcandi chaquihuan shitai tucunaca, napacha alichu.

9Shinallata, cambaj ñavi, imatapash na alita ricushpa rurachingapa munajpica, surcushpami shitana cangui. Chashna shujlla ñavihuan causaita causangapa rinami, cambajca ashtahuan ali. Ashtahuangarin, ucu pachapi rupajuj ninaman ishcandi ñavihuan shitai tucunaca napacha alichu.

Chingashca llamaguhuan yarichishpa yachachishcamanda(Luc. 15:3-7)

10Cai uchillacunatara maijandapash na ricunayanllu ninguichiman. Cangunataca, cashnami nini: Paicunata huacaichij angelcunaca, jahua pachapimi tiyanajun. Chai angelcunami, jahua pachapi tiyajuj Ñuca Taitapaj ñavitaca ricushpa, causaita causaicaman tiyanajun.

11Runa Aichayuj tucushca Ñucami, chingashca causajcunataca quishpichingapa shamurcani.

12Cangunaca, ¿imata yanguichiman? Patsaj llamata shuj runa charishpa, shuj llamagu chingajpica, ¿nacha iscun chunga iscun llamacunataca chai urcupi saquishpa, chai chingashca llamagutara mascangapa rinman?

13Na llullashpami, cangunataca cashna nini: Chai chingashca llamaguta tarishpaca, chai na chingashca, iscun chunga iscun llamamandapash yalimi ninanda cushijunman.

14Shinallatami, jahua pachapi tiyajuj cangunapaj Taitaca, cai uchillapuramanda maijanllapash chingagrichunga na munan.

Crijpura imashna ali tucunatami yachachijun(Luc. 17:3)

15Maijan huauquipash, canda fiñashpa juchata rurajpica, paipajman rishpami ñavi ñavi jarcashpa rimana cangui. Canda cazushpa ali tucujpica, cambaj huauquitami cutin ali causaipi churangui.

16Ashtahuangarin, canda na cazungapa munajpica, shujtalla cashpa, ishcaita cashpapash pushashpami, cutin rina cangui. Ishcai cashpa, quimsa cashpapash, paicunami imata uyashcatapash tucuita aliguta villanajunga.

17Paicunatapash na cazungapa munajpica, tandanajuj crijcunamanmi villana cangui. Tandanajuj crijcunatapash na cazujpica, na Israel runatashna, impuestota japishpa causaj runatashnami ricuna cangui.

18Na llullashpami, cangunataca cashna nini: Cai pachapi tucui imatapash huatashpa saquijpica, jahua pachapipash huatashcami canga. Shinallata, cai pachapi tucui imatapash cacharijpica, jahua pachapipash cacharishcami canga.

19Cashnatapashmi nini: Cai pachapi, ishcaipura shujlla yuyai tucushpa, jahua pachapi Taita Diosta imagutapash mañajpica, jahua pachapi Ñuca Taitami canguna mañashcataca pactachinga.

20Ishcaipura cashpa, quimsapura cashpapash Ñuca shutipi tandanajujpica, Ñucapash paicunapaj chaupipimi cani” nircami.

21Shina nijpi quimirishpami, Pedroca cashna nirca:

“Apunchi Jesús, maijan huauqui cashpapash, ñucata fiñashpa juchata rurajpica, ¿mashnacamanda perdonasha? ¿Canchiscaman perdonanaca alichu, imata?” nishpami tapurca.

22Shina tapujpimi Jesusca cashna nirca:

“Canchiscamanlla perdonaitaca, na ninichu. Ashtahuangarin canchis chunga canchistapash yalishpami perdonana cangui” ninimi.

Ishcai runacunamanda

23Jahua pachamanda Dios mandajujca, shuj llactata jatun mandaj paipajta rurajcunahuan, pai imata charishcatapash, chimbapurashpa ricungapa shamushcashnami.

24Chimbapurashpa callarijpica, chunga huaranga talento culquita na tigrachishpa purijuj runatami, jatun mandajpaj ñaupajman apamunajurca.

25Chai runataca mañashcata na tigrachi ushajpimi: “Paipaj huarmindi, huahuacunandi, imata charishcatapash tucuilla jatugrichi” nishpa mandarca.

26Shina nijpimi, chai runaca jatun mandajpaj ñaupajpi cungurishpa: “Ashaguta shuyapai, mandaj taitalla culquigutaca, tucuillagutamari tigrachipasha” nishpa mañarca.

27Chai runata mandajca, ninanda llaquishpami chai culquitaca tucuilla perdonashpa cacharirca.

28Shina cacharijpi chai runa rijushpaca, paiman patsaj denario culquita na tigrachishpa purij cumba runatami tuparirca. Chai runataca, cungapi llapishpami: “Ñuca culquita tigrachihuai” nijurca.

29Shina nijujpimi, paipaj ñaupajpi cungurishpa: “Ashaguta shuyapai tucuillaguta tigrachipashamari” nishpa mañajurca.

30Ashtahuangarin shina mañajpipash, paica na shuyashpami chai runataca, prezu churarca. Culquita tigrachingacamanmi, shina churarca.

31Chashna llaquichijujta caishuj runacuna ricushpaca, ninandami llaquirirca. Paicunami, chashna rurashcataca, paicunata mandajman villangapa rinajurca.

32Shina villajpimi chai mandajca, chai runata cayachun cachashpa cashna nirca: “Canga, jatun na ali runami cashcangui. Can mañashcataca, ‘ashaguta shuyapai’ nishpa mañajpimi, perdonarcani.

33¿Nachu cambash, cambaj cumbataca, canda ñuca llaquishcashnallata llaquina carcangui?

34Shina nishpami, paita mandajca ninanda fiñarishpa, culquita tucuilla cungacaman, llaquichij runacunaman curca.

35Jahua pachapi Ñuca Taitapash, cangunapurapi na tucui shunguhuan perdonarijpica, chashnallatami ruranga” nircami.