ESTER 5 - Quichua Imbabura 2016

Jatun mandajtapash, Amán runatapash jatun micuiman, Ester cayashcamanda

1Jatun mandaj Ester huarmica, quimsa punlla tucujpimi, mandangapa churajunata churajushpa, jatun mandajpaj huasi chimbapura patioman yaicurca. Jatun mandajca, pai mandashpa tiyarina ucupimi, pungu chimbapurapi tiyajurca.

2Jatun mandaj Esterta canlla patiopi shayajujta ricushpaca, jatun mandajca alicachishpami ricurca. Chaimandami, paipaj maquipi charijushca curi varata Esterpajman ricuchijpi, Esterca vara pundapi tacarirca.

3Chaipimi jatun mandajca, cashna tapurca:

“Jatun mandaj Ester, ¿imashpata shamungui? ¿Imatata mañangapa munangui? Ñuca mandajuj llactacunamandaca, chaupitapash cushallami” nirca.

4Shina nijpimi Esterca, cashna nirca:

“Jatun mandajpaj ali cajpica, jatun mandajman ñuca rurajushca micuiman, can jatun mandajpash, Amán runapash shamupanguichi” nirca.

5Shina nijpimi, jatun mandajca:

“Ester imatalla nishcata rurangapa, Amán runata ucha pushamugrichi” nirca.

Ña pushamujpimi jatun mandajca, Ester cayashca micuiman Amán runata pushashpa rirca.

6Chai micuipi vinota ufiashpa tiyajushpami jatun mandajca, Estertaca cashna nirca:

“¿Imatata mañahuangui? Canmanga cushallami. ¿Imatata nihuangui? Ñuca mandajuj llactacunamandaca, chaupitapash cushallami” nirca.

7Shina nijpimi Esterca, cashna nirca:

“Ñuca mañashcapash, ñuca munashcapash caimi capan:

8Can jatun mandajpaj ñaupajpi ñuca ali ricurishca cajpi, ñuca mañashcata, ñuca munashcata cungapa munashpaca, can jatun mandajman cutin shuj micuita rurajpi, can jatun mandajpash, Amán runapash cutin shamupanguichi. Cayapami, can jatun mandajta, imata mañana cashpapash mañapasha” nircami.

9Chai punllapica, paipaj shungupica ninanda cushijushpami, Amán runaca llujshijurca. Shina cashpapash, mandana huasi pungupi Mardoqueo tiyajushpa, pai yalijpi na jatarishpa, cuyuritapash na cuyurijta ricushpaca, Mardoqueotaca ninandami fiñarca.

10Shina cashpapash Amán runaca, fiñarishcata na ricuchingapami, na imatapash nishpa huasiman rircalla. Ña chayashpaca, paipaj cumbacunatapash, Zeres shuti paipaj huarmitapashmi, cayachun cacharca.

11Paicunamanmi Amán runaca, imatalla ninandapacha charishcatapash, ashtaca churicunata charishcatapash parlajurca. Shinallata, tucui imacunatalla jatun mandaj rurashpa paita jatunyachishcatapash, cati mandajcunatapash, jatun mandajpajta rurajcunatapash yalishpa paita alicachishcatapashmi parlajurca.

12Amán runaca, cashnatapashmi nijurca:

“Jatun mandaj Esterpash, jatun mandajman micuita rurashpaca, pitapash na cayashpami, ñucatalla cayahuarca. Shinallata, jatun mandaj Esterca, cayapash jatun mandajhuan shamupanguira nihuarcami.

13Shina cajpipash, mandana huasiman yaicuna pungupi, Judá llactamanda Mardoqueo runa tiyajujta ricushpaca, tucui chai cushijushcacunapash yalircallami” nijurcami.

14Shina nijpimi, Zeres shuti paipaj huarmipash, tucui paipaj cumbacunapash, cashna ninajurca:

“Ishcai chunga ishcai chaupi metro jatun caspita shayachishpa, huarcushpa sipinata rurai. Chaipillata Mardoqueota huarcushpa sipichun, caya punllapaca jatun mandajman villangui. Chai jipaca, jatun mandajhuan chai jatun micuiman cushijushpa ringuillami” ninajurcami.

Shina nishcapash, Amán runapica ali ricurijpimi, huarcushpa sipinata rurachirca.