Psalms 5 - Quichua Imbabura 2016

Dios huacaichijuchun mañashcamandaTaquinata ali yachaj runaman, David quilcashca Salmomi.

1Mandaj Dioslla,

ñuca mañajushcacunataca uyahuayari.

Shungu junda llaquirijushcataca ricuhuayari.

2Ñucata Jatun Mandaj Dioslla,

ñuca caparishpa mañajushcata uyahuayari.

Ñucaca, Candallami mañasha.

3Mandaj Dioslla,

ñuca mañajujtaca tutamandatami uyapangui.

Tutamandatami, Cambaj ñaupajpi mañashpa shuyajupasha.

4Canga, na alita rurajcunataca na chasquij Taita Diosmi cangui.

Na alicunaca, Cambaj ñaupajmanga na shamungachu.

5Juizu illajcunaca, Cambaj ñaupajpica na shayanajungachu.

Na alita rurajcunataca, tucuicunatami na ricunayachingui.

6Llullashpa parlajcunataca llaquichishpa tucuchinguimi.

Huañuchishpa, umachishpa causajcunatapash,

Mandaj Diosca na ricunayachingachu.

7Ashtahuangarin ñucaca, Can ninanda llaquij cashcamandami,

Cambaj huasiman yaicusha.

Canda manllashpami, Cambajlla huasiman ricushpa ninanda mañasha.

8Mandaj Dioslla,

ñucata fiñajcuna ama llaquichinajuchunga, ali ñanda pushahuayari.

Cambaj ali ñangunapi churashpa pushahuayari.

9Paicunapaj shimihuanga, yanga nij tucushpallami parlanajun.

Paicunapaj shungupica, na alicunalla jundami.

Paicunapaj cungaca, huañushcata pambashca utujuta pascashcashnami.

Paicunapaj jalluhuanga, uyanayaitami llullashpa parlanajun.

10Taita Dioslla, paicunataca llaquichipayari.

Paicunapaj na ali yuyaipillata urmachun saquipayari.

Ninandapacha canda na cazushcamandaca anchuchipayari.

Paicunallatami, Candaca na cazushpa jatarirca.

11Diostalla yariashpa causajcunaca, ninanda cushijuichi.

Causaita causaicaman Dios huacaichijushcamanda, ninanda cushijushpa candaichi.

Diospaj shutita juyajcunaca, Paihuan ninanda cushijuichi.

12Can Mandaj Diosllami, alitalla rurajtaca bendiciapangui.

Jarcarina escudohuan muyundipi jarcajunshnami,

Cambaj juyaihuan paitaca huacaichingui.