1Jordán yacu chimbapi, indi huashajunman, amorreo gentecunata mandajcunapash, mama cucha manñacunapi causaj cananeo gentecunata mandajcunapash, Jordán yacuta chaquichishpa, Mandaj Dios imashna Israelcunata pushamushcatami yacharca. Chaimandami, ninandapacha manllarishpa, Israelcunahuan macanajuitaca na ushanajurca.
2Chai punllacunami Mandaj Diosca, Josuetaca cashna nirca: “Shinlli rumita japishpa, filu cuchillocunata rurashpa, jipa mirai Israelcunataca circuncisionda rurangui” nircami.
3Shina nijpimi Josueca, filu cuchillocunata rurashpa, Israelcunataca Aralot shuti lomapi circuncisionda rurarca.
4Egiptomanda llujshimushca, alipacha macanajunata yachaj runacunaca, jichushca pambapimi huañushpa tucurishca carca. Chaimandami Josueca cutin circuncisionda rurarca.
5Egiptomanda llujshishcacunaca tucuillami circuncisionda rurai tucushca carca. Ashtahuangarin, Egiptomanda llujshimushca jipa, jichushca pambapi huacharishcacunaca, nara circuncisionda rurai tucushcachu carca.
6Israelcunaca chuscu chunga huatacunatami jichushca pambapi purinajurca. Chaipimi macanajunata ali yachaj runacunaca, Mandaj Diosta na cazushcamanda huañushpa tucurirca. Cangunapaj ñaupa taitacunamanmi: “Lechepash, balun mishquipash, ashtacapacha tiyaj llactatami carasha” nishpa Mandaj Diosca juramentushca carca. Shinapash, “Paicunaca, napacha chai llactamanga yaicungachu” nishpami, Mandaj Diosca Juramentushca carca.
7Shinamandami, paicunapaj churicunata Dios agllajpi, Josueca, paicunata circuncisionda rurajurca. Paicunaca, ñambi huacharishca cashcamandami circuncisionda na rurashca carca.
8Circuncisionda tucuicunata rurashca jipaca, paicuna ali tucungacamanmi, carpacunata shayachishpa chaillapita saquirirca.
9Chaipimi Mandaj Diosca, Josuetaca: “Egipto llactapi na alicachishpa rimai tucushcataca, cunanmi anchuchircani” nishpa, chai lomataca Gilgal nishpa cunangaman rijsinajun.
10Israelcunaca, Jericó puebloman chayanalla pambacunapi, Gilgal shuti pueblopimi, carpacunata shayachishpa tiyanajurca. Chaipi tiyanajushpami, chai Abib quillapaj chunga chuscu punlla chishipica, pascua punlla micuita ruranajurca.
11Chai pascua cayandi punllapica, chai alpapi fucushca granocunatami, levadura illaj tandata rurashpa micunajurca. Chai punllallatami, punda fucushca trigota camllashpa micunajurca.
12Chai llactapi fucushca granocunata micui callarishca cayandi punllapica, maná shuti tandaca ñana tiyarcachu. Israelcunaca, maná shuti tandata na ashtahuan charishpami, chai huataca Canaán llactapi fucushca granocunata micunajurca.
Espadata charijuj macanajuj runahuan, Josue tuparishcamanda13Josueca, Jericó pueblo chayanallapi cashpami, espadata charijuj runataca, paipaj ñaupajpi shayajujta vichai ricurca. Josueca, paipajman rishpami:
“¿Canga, ñucanchipurachu cangui, na cashpaca, ñucanchita fiñajpurachu cangui?” nishpa tapurca.
14Shina tapujpimi chai runaca:
“Maijanpurapash na canichu. Ashtahuangarin, Mandaj Diospaj macanajuj runacunata Mandaj cashpami shamurcani” nircami.
Shina nijpimi Josueca, alpacaman chayajta cumurishpa, ninanda alicachishpaca:
“Ñucata Mandajlla. Can mandashcata ruraj ñucataca ¿imatata rurai nihuangui?” nirca.
15Shina nijpimi, Mandaj Diospaj macanajuj runacunata Mandajca, Josuetaca cashna nirca:
“Cambaj chaquipi churajushcata llujchi. Can shayajuj alpaca, Mandaj Diospajlla alpami” nirca.
Shina nijpimi Josueca, pai mandashcata rurarca.
Who We AreWhat We EelieveWhat We Do
2025 by iamachristian.org,Inc All rights reserved.
