PROVERBIOS 20 - Quichua Imbabura 2016

1Vinohuan machashpaca, na ali shimicunatami rimanajun.

Sidrahuan machashpapash, macanajuitami callarinajun.

Chaicunata ufiashpaca, imatapash na yachaj cashcatami ricuchin.

2Jatun mandaj fiñarishpaca, león huacanshnami manllachin.

Pipash chashna fiñachishpaca, huañuitapash taringallami.

3Fiñanajunata na mascaj runaca, alicachi tucungami.

Juizu illajcunaca, ashtahuanmi chai fiñanajuipi huashajun.

4Imata ruranatapash na munaj runaca, 'tamiajunmi' nishpami na yapugrin.

Chai runaca, granota tandachina punllapica, na micunata charingachu.

5Shungupi charishca yuyaicunaca, mama cucha yacushnami ricurin.

Ali yachajushca runallami chaicunata pactachi ushanga.

6Taucacunami, ali cumbami canchi ninajun.

Ashtahuangarin, na umachij runaca, ¿maipita tiyangayari?

7Alitalla ruraj runaca, napacha pandaringachu.

Paimanda mirai huahuacunapash, ali causaitami charinga.

8Jatun mandajca, tapuchishpa ricungapami tiyarin.

Paica, ricui na ricuimi, na alicunataca rijsin.

9¿Pipash: “Ñuca shungupica, mapa illajmi cani,

juchataca na rurashcanichu” ni ushangachu?

10Shuhuashpa pezaj rumitapash, shuhuashpa tupuj tazatapash,

ishcanditami Mandaj Diosca na ricunayachin.

11Huambracunataca, imashna purijtapash yachanallami.

Ali purijtapash, na ali purijtapash rijsinallami.

12Ñavihuanga ricuchun, rinrihuanga uyachunmi,

Mandaj Diosca ishcanditallata churashca.

13Ama huajcha causangapami, yapalla puñuna munaitaca saquina cangui.

Uchalla jatarishpami, micunataca yapalla charingui.

14Randij runaca, yangata: “Na alichu, na alichu” nij tucunllami.

Ashtahuangarin, randishca jipaca paillatami alicachirin.

15Curipash, ashtaca juyailla rumicunapash tiyanmi.

Ashtahuangarin, aligutapacha yarishpa rimaj shimica, chaicunata yali alipachami.

16Na rijsishca runa culquita mañajpi,

paipaj randi shayarij runataca, pai ima charishcatapash mañanami cangui.

Na rijsishca runapaj randi shayarishcamandami, chashna mañana cangui.

17Shuhuashpa micunata charinaca, runapaca mishquimi ricurin.

Ashtahuangarin, micushca jipaca, cascajo rumita micushcashnami ricurin.

18Ali yuyaita cujpimi, imata yarijushcapash ali llujshin.

Ali yuyaita cujpillami, macanajuipipash mishai usharin.

19Parlashpalla purij runaca, na parlanatapash parlanllami.

Yapalla parlajcunahuanga, ama tandanajunguichu.

20Paipaj taitata, mamata, “llaqui japishpami ali canman” nij runaca,

manllanayai llaquita apashpami jaicata huañunga.

21Imata cashpapash ñapash charishcacunaca,

jipamanga, na imapapash alichu canga.

22Canga: Ama, “Ñucami randi llaquichisha” ninguichu.

Ashtahuangarin, Mandaj Diostallami shuyana cangui.

Paimi candaca yanapanga.

23Shuhuashpa pezaj rumicunataca, Mandaj Diosca na ricunayachinllu.

Shuhuashpa pezaj balanzatapash, napacha alicachinllu.

24Runapaj causaitaca, Mandaj Diosllami yachan.

Runaca, paipaj causaipi ima tucunataca napacha yachai ushanllu.

25Na aliguta yarishpallata, Diosman pactachishami nishpa,

na pactachi ushashpaca, canllatami llaquita apangui.

26Alipacha yachajushca jatun mandajca,

Diosta na manllajcunataca trigota trillajshnami tucuchin.

Paicunataca, cutana rumihuanshnami tucuchin.

27Runapaj espirituca, Mandaj Diospaj michashnami.

Runapaj shungu ucupi imata yarijujtapash, callarishpami ricun.

28Jatun mandajca, juyaihuan, llaquishpa mandajushpami,

pai mandashpa tiyarinapica mandashpa catijungalla.

29Chairalla viñaicunaca, shinllicuna cashpami alicachi tucunajun.

Rucu taitacunaca, yuraj ajchata charishpami alicachi tucunajun.

30Ninanda astijpimi, na ali runacunaca ali tucun.

Shinllita llaquichijpimi, na ali yuyaicunapash anchurin.