1Chai punllacuna jipami Davidca, filisteocunata mishashpa, paipajta rurajcuna cachun churarca. Shinallata filisteocunataca, Meteg-ama shuti pueblotapashmi quichurca.
2Shinallata, Moab llactapi causajcunatapash mishashpami, alpatapash quichushpa, huascahuan tupurca. ishcai huascahuan tupushpaca huañuchircami. Shuj huascahuan tupushpaca ricuchun causajtami saquirca. Moabitapi causajcunaca, Davidpajta rurangapami saquirirca. Paicunaca Davidmanmi, impuestotaca cushpa causanajurca.
3Shinallata, Soba shuti llactata jatun mandaj, Rehob shuti runapaj churi, Hadad-ezer shuti runatapashmi misharca. Paica, Éufrates yacu manña llactata tigra japingapa purijushpami mishai tucurca.
4Davidca, caballopi tiyarishca huaranga canchis patsaj macanajuj runacunata, chaquilla purij ishcai chunga huaranga macanajuj runacunatami prezu japirca. Shinallata, macanajuna carretacunata aisaj caballocunatapash chaquicunata faquishpami, patsaj carretacunata aisaj caballocunatalla saquirca.
5Soba shuti llactata jatun mandaj Hadad-ezer shuti runata yanapangapami, Damasco pueblopi causaj, Siria llacta gentecunaca shamurca. Davidca, chai gentecunataca, ishcai chunga ishcai huarangacunatami huañuchirca.
6Chai jipami Davidca, Siria llactapi tiyaj Damasco pueblopica, macanajuj runacuna chaipi ricunajuchun churarca. Shinamandami, Siria llactamanda runacunaca, Davidpajta rurajcuna tucushpa, impuestota cushpa causanajurca. Mandaj Dios, paihuan cajpimi, Davidca maipi macanajungapa rishpapash tucuicunata mishajujlla carca.
7Davidca, Hadad-ezer shuti runapajta rurajcuna charinajushca, curita rurashca jarcaricunatapashmi, Jerusalenman quichushpa aparca.
8Shinallata, Hadad-ezer shuti runa mandajushca Beta shuti, Berotai shuti pueblomandapashmi, jatun mandaj Davidca, ashtaca broncecunata aparca.
9Hamat shuti pueblota jatun mandaj Toi shuti runaca, Hadad-ezer shuti runapaj macanajuj runacunata, David mishashcatami yacharca.
10Hadad-ezer runata, David mishashcata yachashpami, Toi shuti runaca, paipaj churi Joram runata, jatun mandaj Davidta bendiciashpa, caranacunata cuchun cacharca. Caranacunaca: Curita, culquita, bronceta rurashca juyaillacunami carca. Toi shuti runapash, Hadad-ezer runahuan, macanajushpa, fiñanajushpa causajmi carca.
11Chaicunatami, jatun mandaj Davidca, tucuilla llactacunata mishachijpi, impuestocunata japishcatapash, culquicunandi, curicunandi, Mandaj Diosman cungapa shicanyachirca.
12Davidca, Siria, Moab, Amón, Filistea, Amalec llacta gentecunata, shinallata, Soba shuti llactata jatun mandaj Rehob shuti runapaj churi Hadad-ezer runata imatalla quichushcatapashmi, Mandaj Diosman curca.
13Shinami Davidca, tucuicuna rijsishca tucurca. Siria llacta runacunata mishashpa tigramunajushpami, chunga pusaj huaranga Edom llacta gentecunatapash, cachi tiyaj pugru pambapi huañuchishpa tucuchirca.
14Shina mishashpami, Edom llactapi tiyaj tucuilla pueblocunapica, macanajuj runacunata chaipi ricuchun churarca. Edom llacta gentecunaca, shinami Davidpajta rurajcuna tucurca. Mandaj Dios, paihuan cajpimi, Davidca maipi macanajungapa rishpapash tucuicunata mishajurca.
David churashca cati mandajcunamanda(2 Sam. 20:23-26; 1 Crón. 18:14-17)15Davidca, tucuilla Israel llactatami mandajurca. Paica, alitalla rurashpami, aligutapacha ricushpa mandajurca.
16Paipaj macanajuj runacunataca, Sarvia shuti huarmipaj churi Joab runami mandajurca. Ahilud shuti runapaj churi Josafat shuti runaca, imalla tucushcata quilcajmi carca.
17Ahitob runapaj churi Sadoc runapash, Ahimelec runapaj churi Abiatar runapash, sacerdotecunami carca. Seraías shuti runami, Mandashca Shimicunata quilcaj carca.
18Joiada shuti runapaj churi Benaía shuti runaca, cereteo, peleteo macanajuj runacunatami mandajurca. Davidpaj churicunapash, sacerdotecunami carca.
Who We AreWhat We EelieveWhat We Do
2025 by iamachristian.org,Inc All rights reserved.
