DEUTERONOMIO 15 - Quichua Imbabura 2016

Mañachishcata na tigrashpa cuhuai nishpa saquinamanda

1Imata mañachishca cashpapash, ña canchis huata chayajpica, na tigrashpa cuhuai ninachu canguichi.

2Chaita pactachingapaca cashnami rurana canguichi: Imata mañachishca cashpapash, na tigrachi ushajpica, na tigrashpa cuhuai nishpa saquinallami canguichi. Paipaj cumba cajpi, Israelpura cajpipash, imata mañachishcata na tigrachi ushajpica, Mandaj Dios mandashca huata pactashcamandami, na tapushpa saquinalla canga.

3Shuj llactamanda shamushca runa imata mañashca cajpipash, chaitaca tigrachihuan ninapachami cangui. Ashtahuangarin, Israelpurallata mañashca cajpica, ama cutin tigrachihuai nishpa saquinallami cangui.

4Cangunapurapica, mañashpa purij huajchacuna amapacha tiyachunmi chashna rurana cangui. Shina cajpimi, Mandaj Taita Diosca, cangunaman Paillata carashca llactapi causanajujpica ninanda bendicianga.

5Canda Mandaj Taita Diosta aligutapacha uyashpa, ñuca tucui mandashcacunatapash aliguta cazushpa causanajushpami, chashna bendiciai tucunguichi.

6Cangunata Mandaj Taita Dios bendiciajpimi, ashtaca llactacunaman mañachingapapash charishpa, cangunaca pitapash na mañashpa causanguichi. Shinami cangunaca, ashtaca llactacunata mandashpa causanguichi.

Imagutapash na charijcunaman mañachinamanda

7Canda Mandaj Taita Dios, canman carashca llactapi, maijan pueblopi cashpapash, Israelpuramanda imagupash illaj tiyajpica, ama shinlli shungu tucushpa mitsanguichu.

8Ashtahuangarin imata mañachina cajpipash, na mitsashpa tucuita mañachinallami cangui.

9‘Mañachishcata na tigrachina canchis huataca ñami pactamujun’ yashpa, imagutapash na charij Israelpura runaguta fiñashpa, na mañachinguiman. Chashna rurajpica, chai huajcha runa, Mandaj Diosta caparishpa mañajpimi, na alita rurashca ricuringui.

10Shinamandami na cungashpa, cambaj shungupipash na mitsashpa mañachinalla cangui. Shina rurajpimi, canda Mandaj Taita Diosca, tucui ruranacunapi, tucui imata rurana munaicunapi candaca bendicianga.

11Mañashpa purij huajchacunaca, cai pachapica na illangachu. Chaimandami candaca cashna mandani: ‘Cambaj huauquiman, imagutapash na charijcunaman, shuj huajchacunamanga na mitsashpa mañachinallami cangui’ ninimi.

Gañangunamandaca, caicunatami mandashca(Éx. 21:1-11)

12Hebreo gentecunamanda, cambaj huauqui cashpa, cambaj pani cashpapash, paillata canman jaturishpa gañan tucushca cajpica, sucta huatatalla tucuita rurachishpa, canchis huata chayajpica cacharinallami cangui.

13Ña cacharishpa cachashpaca, na chushaj maquita cachanachu cangui.

14Mandaj Dios canda bendiciashcataca, llamacunamandapash, trillana pambamandapash, uvata cutana pushtumandapash, na mitsashpami carashpa cachanguilla.

15Egipto llactapi gañan causashcatapash, canda Mandaj Taita Dios cacharichishcatapash yarinami cangui. Shina cashcamandami cunanga, cai tucuita mandashpa saquijuni.

16Cambajta ruraj runaca, candapash, cambaj huasi ucupuratapash juyashcamanda, tucui imatapash charishpami ‘na saquishpa rinayanllu’ ninga.

17Shina nijpica, huasi pungu caspipimi, jirruhuan paipaj rinrita utujuna cangui. Chashna rurajpimi paica, huañungacaman cambajta rurashpa causajunga. Cambajta ruraj huarmitapash, shinallatami rinrita utujuna cangui.

18Cambajta ruraj runata cacharishpa cachana chayajpica: ‘Na cachai usharingachu’ yashpa ama llaquiringuichu. Paica, imata rurashcamanda chaupi canatalla cujpipashmi, sucta huatata cambajta rurashpa causajurca. Canda Mandaj Taita Diosmi, chashna alita rurashcamandaca bendicianga.

Punda huachashca jari animalta Diosman shicanyachinamanda

19Cambaj huagracuna, cambaj llamacuna punda huachashca jari animalcunataca, canda Mandaj Taita Diosmanmi shicanyachina cangui.

Punda huachashca shicuhuanga, na yapunachu cangui. Shinallata, punda huachashca llamapaj milmatapash na rutunachu cangui.

20Chai animalcunataca, canda Mandaj Taita Diospaj ñaupajpi, Mandaj Dios agllashca pushtupimi, huata pactajpica, cambaj tucui ayllucunahuan micuna cangui.

21Chai animalcuna, imapash na ali cajpi, ñausa cajpi, janga cajpica, canda Mandaj Taita Diosman cushpa, na huañuchinachu cangui.

22Chaicunataca, can causajuj pueblocunapimi micuna cangui. Mapa cashpapash, mapa illaj cashpapash, gacela shuti, ciervo shuti animalcunapaj aichata micujshnami micunalla cangui.

23Yahuartaca na micushpami, yacutashna alpapi talina cangui.