2 CRÓNICAS 9 - Quichua Imbabura 2016

Sabá llactata jatun mandaj huarmi, Salomonda ricungapa shamushcamanda(1 Rey. 10:1-13)

1Sabá shuti llactata jatun mandaj huarmica, Salomonda alicachishpa tucuicuna parlanajujta uyashpami, ashtaca gentecunata catichishpa Jerusalenman shamurca. Chai huarmica, mishquilla ashnajuncunata, ashtaca curita, juyailla rumicunata camellocunapi apachishpami, na tigrachi ushanalla tapunacunata tapushpa yachangapa shamurca. Salomonbajman chayamushpaca, paipaj shungupi tucui imatalla yarijushcatami parlajurca.

2Ashtahuangarin Salomonga, chai huarmi tapushcataca tucuillatami tigrachijurca. Salomón na tigrachi ushanaca, imallapash na tiyarcachu.

3Sabá shuti llactata jatun mandaj huarmica, ali yachaita Salomón charijtapash, paipaj huasita rurashcatapashmi ricujurca.

4Shinallata, mezapi tiyanajuj micunacunatapash, Salomonbajta rurajcuna causana ucucunatapash, churajushcatapash, paiman micunata yalichijcunatapashmi ricujurca. Paica, Mandaj Diospaj huasiman vichai rina gradacunatapash ricushpami, ninandapacha manllarijurca.

5Chaimandami jatun mandajtaca, cashna nijurca: “Ñuca llactapi cashpallatami, can imata rurashcacunatapash, can alipacha yachajushcatapash uyarcani. Chaica na llullachu cashca.

6Ashtahuangarin, ñuca caiman nara shamushpaca, na chashnachu canga yajurcanimi. Ñuca ñavihuambacha cunan ricujpica, chaupitallapash na parlahuashcachu. Can alipacha yachajushca cajta, ninan charij cajta parlanajushcataca, ashtahuan yalitami ricujuni.

7Cambaj ali yachaita, punllandi uyaj cambajta ruraj cai runacunaca, ninanda cushijushcami canga.

8Canda alicachishpa, Israelcunata mandashpa tiyajunapi churaj Mandaj Taita Diosca, ninanda alicachi tucushca cachun. Mandaj Diosca, Israelcunata juyajujlla cashpami candaca, tucuicunapaj ali cachun ricushpa, mandajuchun churashca” nijurcami.

9Shina nishca jipami jatun mandajmanga, pusaj chunga shuj quintal chaupita pezaj curita, mishquilla ashnajuncunata, juyailla rumicunata cararca. Sabá shuti llactata jatun mandaj huarmi, jatun mandaj Salomonman, mishquilla ashnajuncunata apamushcashnaca, pipash nara apamushcachu carca.

10Hiram shuti runapajta rurajcunapash, Salomonbajta rurajcunapashmi, Ofir shuti llactamanda curita, sándalo shuti caspicunata, juyailla rumicunatapash apamushca carca.

11Chai sándalo caspicunahuanmi, Mandaj Diospaj huasipipash, mandana huasicunapipash, gradacunata rurarca. Shinallata, candajcunaman arpacunata, salteriocunatapashmi rurachirca. Chashna ashtaca sándalo caspicunata apamushcataca, cunangaman pipash Judá alpapica na ricushcachu.

12Jatun mandaj Salomonga, Sabá llactata jatun mandaj huarmi tucui imata munashcata carashpami, pai apamushcatapash ashtahuan yalishpa cararca. Chai jipami chai huarmica, paipajta rurajcunandi paipaj llactaman tigrarca.

Salomonga ninan charij cashpami, ashtahuan rijsi tucushca(1 Rey. 10:14-29; 2 Crón. 1:14-17)

13Salomonga huatandimi 22.000 kilo curita japijun carca.

14Tucuita randishpa jatujcuna apamushcataca na yupashcachu carca. Arabia llactata tucui jatun mandajcuna, pai mandajuj llactapi churashca cati mandajcuna curita, culquita apamushcataca, na yupashcachu carca.

15Jatun mandaj Salomonga, ishcai patsajta macanajushpa jarcarinacunatami, curita tacashpa rurachirca. Tucui chaicunapimi, sucta kilo chaupita pezaj curita churachun mandarca.

16Shinallata curita tacashpami, macanajuipi jarcarinacunataca quimsa patsajta rurachirca. Chaicunapica tucuipillatami, quimsa libra curita churarca. Jatun mandajca, “Líbano quirucuna” nishpa shutichishca huasipimi alichirca.

17Jatun mandajca, mandangapa tiyarinatapash marfilhuanmi rurachirca. Chaitaca, ashtahuan ali curihuanmi jahualla quilparca.

18Chai tiyarinaman vichai ringapaca, sucta gradacunami carca. Chai tiyarina huashaca, redondollata rurashcami carca. Rigrata samachishpa tiyajungapapash, ishcandimanmi rurashca carca. Chai samachinacunapica, leonshnallacunata rurashcami carca.

19Chai sucta gradaspipash, chunga ishcai leonshnallacunatami, ishcandi manñaman churashca carca. Mandangapa tiyarinataca, maijan llactapipash na chashna rurashcachu carca.

20Jatun mandaj Salomón ufiana vasocunapash, curita rurashcami carca. “Líbano quirucuna” nishpa shutichishca huasipi tiyaj platocunapash, ashtahuan ali curita rurashcami carca. Salomón mandajui punllacunapica, culquica na yapa ali cajpimi, culquimandaca imatallapash na rurachirca.

21Jatun mandaj Salomonga, Tarsis pueblomanda paipaj jatun barcocunatami, Hiram shuti runapaj barcocunahuan mama cuchapi charirca. Chai barcocunapica, Tarsis pueblomanda curita, culquita, marfilta, monocunata, pavo realcunata apamushpami, quimsa huatapi muyumunajun carca.

22Chashnami jatun mandaj Salomonga, charij cangapapash, ashtahuan alipacha yachajushca cangapapash, shuj llacta jatun mandajcunataca, tucuita yalipacha carca.

23Tucui llactacunapi causajcunami, Salomonbaj ñavita ricungapa munaj carca. Paipaj shungupi ali yachaita Taita Dios carashcahuan parlajta uyangapami, chashna munanajuj carca.

24Tucuicunami paiman carangapaca, curita, culquita rurashca juyailla charishcacunata, churajunacunata, macanajunacunata, mishquilla ashnajuncunata, caballocunata, mulacunata, huatapi huatapi apamunajun carca.

25Salomonga, paipaj caballocunapajpash, carretacunatapajpash, chuscu huaranga huasitami charirca. Caballopi tiyarishpa macanajuj runacunapash chunga ishcai huarangami carca. Paicunatami huaquingunataca, macanajuna carretacunata alichishca pueblocunapi, shujcunataca pai jatun mandajta ricuchun Jerusalenbi churarca.

26Salomonga, Éufrates shuti jatun yacumandaca, filisteocunapaj llactacaman, Egipto llacta mujungamanmi, tucui llactacunata mandajurca.

27Jatun mandajca, culquitaca rumitashna, Cedro caspitapash, Sefela shuti pambapi tiyaj sacha higo yuracunatashnami, Jerusalenbica ashtacatapacha tandachirca.

28Caballocunataca Egipto llactamandapash, tucui caishuj llactacunamandapashmi Salomonman apamunajurca.

Salomón huañushcamanda(1 Rey. 11:41-43)

29Punda punllacuna, jipa punllacuna Salomón ashtahuan imatalla rurashcapash, ¿nachu profeta Natán quilcashca librocunapi, Silo shuti pueblopi causajuj Ahías shuti runaman villashpa quilcashca libropi tiyajun? ¿Nachu Dios ricuchishcata villaj Iddo shuti runa, Nabat shuti runapaj churi Jeroboam shuti runata llaquichinata rimashca libropipash tiyajun?

30Salomonga, Israel llactataca chuscu chunga huatatami, Jerusalenbi mandajurca.

31Salomón huañushpaca, paipaj ñaupa taitacunahuanmi tandanajugrirca. Paitaca, paipaj taita Davidpaj pueblopimi pambarca. Paipaj randica, Roboam shuti paipaj churimi mandajurca.