1Mandaj Dioslla,
ñuca mañajujtaca uyahuayari.
Ñuca caparishpa mañajujtaca, uyahuayari.
2Llaquita apajui punllapica, ama ñucamanda anchuripanguichu.
Ñuca mañajujtaca uyahuayari.
Imata mañashcatapash uyashpa, pactachipayari.
3Ñuca causaica, cushnishna ñapashmi chingarca.
Ñuca tullucunapash, yamda rupanshnami, tucurirca.
4Ñuca causaipash llaquihuanmi, jihua chaquishcashna tucushca.
Chaimandami, micuitapash na micujuni.
5Llaquihuan ninanda huacajujpimi,
ñuca aichapash ninanda chaquirijun.
6Jichushca pambapi causaj tsala angashnami cani.
Chulunlla pushtucunapi causaj chushijshnami cani.
7Puñuitapash na ushanichu.
Huasi jahuapi shayajuj irqui alasyu animalshnami cani.
8Ñucata, fiñajcunaca punllandimi na alicachishpa rimahuan.
Ñucata fiñajcunaca, punllandimi llaquichingapa, tandanajushpa parlarinajun.
9Ninan llaquihuan cashpami, uchufata micujshna tiyajuni.
Yacutapash, ñuca viquihuan chapurishcatami ufiajuni.
10Can ninanda fiñajpimi chashna tucurcani.
Jatumbi churashca cashpapash, urmashpa tucurichunmi saquihuarcangui.
11Ñuca causana punllacunaca, llandu yalijshnami tucurin.
Chaimandami, jihua chaquinshna tucurijuni.
12Mandaj Dioslla,
Canmi causaita causajungui.
Candaca, jipa miraicunapashmi rigsinga.
13Sion pueblota juyaimandami shayaripangui.
Chai pueblota ninanda juyana punllacunami ña chayamushca.
14Cambajta rurajcunaca, chai pueblota urmachijpi saquirishca rumicunatami yarinajun.
Chai pueblo tucurishcata ricushpami ninanda llaquirinajun.
15Chaimandami, Mandaj Diospaj shutitaca, tucui llactacunapi manllanajunga.
Ninan ushaita charijta ricushpami, cai pachapi jatun mandajcunaca manllanajunga.
16Mandaj Diosca, Sion pueblotaca cutinmi shayachinga.
Chaita ricushpami, Can ninan ushaita charishcataca ricunga.
17Imatapash na charijcuna mañashcatami uyangui.
Paicuna mañashcataca, uyangapachami.
18Chaitaca, jipa viñaicunapash yachachunmi quilcanga.
Jipa viñaicunaca, chaita yachashpami, Mandaj Diostaca alicachinga.
19Mandaj Diosca, jahuapi tiyajuj Paipajlla huasimandami ricujurca.
Jahua pachamandami, cai pachataca ricujurca.
20Prezui tucushcacuna huacanajujtami uyajurca.
Huañuchi tucunacunata cacharichingapami, chashna uyajurca.
21Mandaj Diospaj shutita Sion pueblopi villanajuchunmi cacharichirca.
Jerusalenbi paita alicachinajuchunmi cacharichirca.
22Tucui gentecunapash, llactacunatapash, mandajcunapashmi tandanajunga.
Mandaj Diospajta rurangapami tandanajunga.
23Ñuca causajujpillatami shitahuashca.
Ñuca causana punllatapashmi quichijihuashca.
24Chaimandami cashna nircani:
“Ñuca Taita Dioslla,
ñuca causana punllacunataca ama chaupipilla quichuhuaichu.
Canga, causaitami causajupangui.
25Cai pachataca, Canmi callarichiparcangui.
Jahua pachatapash, Canmi ruraparcangui.
26Tucui chaicuna tucurijpipash, Canga causajunguillami.
Chaicunaca, churajuna tucurinshnami maucayanga.
Shina cajpimi, chaicunataca shitashpa mushujta churangui.
27Ashtahuangarin, Canga causaitami causajungui.
Cambaj causanaca, napacha tucuringachu.
28Cambajta rurashpa causajcunaca, Can huacaichijpimi causanajunga.
Paicunapaj miraicunaca, Cambaj ñaupajpimi causanajunga” nircanimi.
Who We AreWhat We EelieveWhat We Do
2025 by iamachristian.org,Inc All rights reserved.
