1Súah llactamanda Bildad shuti runami, cashna nirca:
2“¿Ima punllacamanda chashna rimajugringuilla?
¿Can rimashca shimicunaca, acapana huairashnami canga?
3Taita Diosca, imata rurasha nishcataca ¿na pactachishpa saquingallachu?
Tucui ushaita charij Diosca, ¿alitalla ruranataca, saquingallachu?
4Cambaj huahuacunaca, Diospaj ñaupajpimi juchata rurashcanga.
Chaimandami, paicunataca chashnallata llaquichishcanga.
5Canga, tutamandatami Taita Diosta mascangui.
Shinallata, tucui ushaita charij Diostami mañangui.
6Aligutalla rurashpaca, mapa illajmi causangui.
Shina causajpica, Paica canda yarishpami yanapanga.
Shinallata, imagutapash ashtahuan mirachishpami cunga.
7Canga, ashatallami charircangui.
Jipa punllacunapica, ashtahuanmi charingui.
8Cunanga, punda causashca taitacunata tapungui.
Paicuna imata yachachishcata yachajungui.
9Ñucanchica, cainalla huacharishca cashpami, imatapash na yachanchi.
Ñucanchi causaica, cai pachapica llandushna yalinallami.
10Paicunaca, ¿nachu candaca yachachishpa rimanajunga?
¿Nachu paicunapaj shungumandapacha rimanajunga?
11¿Sucusca, turu na tiyaj pushtupi viñanllachu?
¿Michina pambapi jihuaca, yacu illaj pushtupi viñanllachu?
12Verdella cashpapash, na cuchujpipash chaquinllami.
Tucui jihuacunamanda, paicunami punda chaquin.
13Taita Diosta cungashpa causajcunaca, chashnallatami tucurin.
Diosta na manllaj runacunapaca, imata shuyanapash na tiyangachu.
14Pai imata shuyajushcapash, tucuringami.
Paicuna imata shuyanajushcapash, araña telashnami canga.
15Paipaj huasipi taunarijpica, urmangallami.
Ama urmachun charijujpipash, urmangallami.
16Indipi na chaquij, verdella quirushnami canga.
Quiruta cuchujpi ninanda viñamushcashnami canga.
17Paipaj sapicunapash, yacu manñapi caita chaita huatarishpa rijujshnami.
Rumilla alpaman chayangacamanmi, chashna huatarishpa viñajun.
18Pai maipi tiyajushcamanda fitishpa shitajpica,
alpapash: ‘Candaca na ricushcanichu’ ningami.
19Pai cushijushpa causanaca, chashnapachami tucuringa.
Chai ñutu alpapica, shuj jihuacunami viñanga.
20Ricui, Taita Diosca ima pandatapash na ruraj runataca na millanayachinllu.
Na ali gentecunataca napacha yanapanllu.
21Chaimanda canga, ninandami cushijungui.
Cambaj shimihuambash, cushijushpa caparinguimi.
22Canda fiñajcunaca ninandami pingai tucunga.
Diosta na manllaj runacunapaj huasicunapash tucuringami” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
