1Leví runapaj churica, Coat shutimi carca. Coat runapaj churica, Izhar shutimi carca. Izhar shuti runapaj churica, Coré shutimi carca. Coré runaca, Rubenbaj miraicunamanda, Eliab runapaj churi, Datán shuti, Abiram shuti runacunahuanmi tandanajurca. Shinallata, Pelet shuti runapaj churi, On shuti runapashmi paicunahuan tandanajurca.
2Paicunami, ishcai patsaj picha chunga Israelcunahuan tandanajushpa, Moisesta ninanda na alicachishpa rimanajurca. Chai runacunaca, ali yuyaita charij, alicachi tucushca, Israelcunata mandaj runacunami carca.
3Chai runacuna tandanajushpami, Moisestapash, Aarondapash fiñashpa, cashna ninajurca:
“¡Cangunaca na ashtahuan ñucanchita mandanachu canguichi! Tucuilla tandanajushca Israelcunapash, Diospajlla shicanyachishca cajpimi, Mandaj Diosca, paicunapaj chaupipimi causajun. Shina cajpica, Mandaj Diospajlla tandanajushca Israelcunataca, ¿imashpata cangunalla mandashpa causanajunguichi?” ninajurcami.
4Shina ninajujpimi Moisesca, cungurishpa alpaman chayajta cumurirca.
5Chaipimi Coré shuti runatapash, tucui paita catijcunatapash cashna nirca:
“Cayapami Mandaj Diosca, maijanlla paipaj cajtapash, maijandalla paipaj cachun shicanyachishcatapash ricuchinga. Paillatami, maijanda cashpapash, Paipajman quimirichun agllajpi, chaicunalla, Paipajman quimiri ushanga.
6Cunanga: Coré shuti runapash, tucui paita catijcunapash, inciensota rupachinacunata japinguichi.
7Chaicunapica ninata japichishpa, Mandaj Diospaj ñaupajpi, cayapaca inciensota churanguichi. Chaipimi Mandaj Dios, maijanda, Paipajlla cachun agllajtaca yachanguichi. Levipaj miraicuna, cunanga upalla saquirichi” nijurcami.
8Shina nishca jipapash Moisesca, Coré shuti runataca cashnatapash nircami:
“Cunanga Levipaj miraicuna uyahuaichi:
9Israelcunapaj Taita Dios, cangunata agllashpa, Mandaj Diospaj carpapi, Paipajta ruranajuchun churashcataca, ¿yangalla cajtachu ricunguichi? Shinallata, tandanajushca Israelcunapaj ñaupajpi, Mandaj Diospajta ruranajuchun churashcatapash ¿yangalla cajtachu ricunguichi?
10Levipaj miraicunataca, candapash, cambaj tucui huauquicunatapashmi, Paipajta ruranajuchun churarca. ¿Shina cashpatachu, sacerdotecuna tucungapapash munanguichi?
11Cambash, canda tucui catijcunapash, Mandaj Diosta fiñashpami tandanajushcanguichi. Aarondaca, ¿imashpata ninanda na alicachishpa rimanajunguichi?” nijurcami.
12Chai jipaca, Eliab shuti runapaj churi, Datán shuti, Abiram shuti runacunata Moisés cayachun cachajpimi, “ñucanchica napacha rishunllu” ninajurca.
13Paicunaca: “Ñucanchitaca, lechepash, balun mishquipash ninandapacha tiyaj llactamanda llujchishpa, cai chaquishca pambapi huañunajuchun pushamushpaca, ¿imapash na canllu yanguichu? Chai jahuapash ñucanchitaca, ninanda mandashpalla charingapami munangui.
14Canga, lechepash, balun mishquipash ninandapacha tiyaj llactamanga nara chayachi ushashcanguichu. Alpacunatapash, uva chagracunatapash, nara ñucanchipaj cachun cushcanguichu. ¿Cai runacunataca, ñausatashnachu umachishpa charigringui? Ñucanchica napacha vichai rishunllu” ninajurcami.
15Shina nijpimi, Moisesca ninanda fiñarishpa, Mandaj Diostaca cashna nirca:
“Paicuna carashca ofrendataca, ama chasquipaichu. Paicunamandaca, shuj burrutallapash na japircanichu. Paicunataca, maijandallapash na llaquichircanichu” nircami.
16Shina nishca jipami Moisesca, Coré shuti runataca cashna nirca:
“Cambash, canda tucui catijcunapash, cayapaca Mandaj Diospaj ñaupajman shayaringuichi. Aaronbash chaipimi canga.
17Cangunaca, tucuicunallata inciensota rupachinata japishpa, inciensota churaichi. Chai jipaca, Mandaj Diospaj ñaupajman, ishcai patsaj picha chunga inciensota rupachinacunata apashpa, tucuicuna quimirina canguichi. Shinallata cambash, Aaronbashmi, inciensota rupachinata apashpa quimirina canguichi” nijurcami.
18Shina nijpi, inciensota rupachinacunapi ninata japichishpa, inciensota churashpami, Dioshuan tuparina jatun carpa punguman, Moisespash, Aaronbash shamunajurca.
19Coré shuti runaca, paicunahuan chimbapurangapami, tucuilla tandanajushca Israelcunandi, Dioshuan tuparina jatun carpa punguman tandachishca carca. Chashna cajpimi, Mandaj Diosca ninan ushaihuan punchapamba ricurirca.
20Chaipimi Mandaj Diosca, Moisestapash, Aarondapash cashna nirca:
21“Cai tandanajushca Israelcunamanda anchurichi. Paicunataca ñapashmi tucuchigrini” nircami.
22Shina nijpimi Moisespash, Aaronbash, cungurishpa, alpaman chayajta cumurishpa, cashna ninajurca:
“Taita Dioslla, canllamari tucui gentecunaman causaitapash, samaitapash caraj Taita Dios cangui. ¿Nachu shujlla runa juchata rurapashcanga? Shina cajpica, ¿imashpata tandanajushca tucuilla Israelcunahuan fiñaripangui?” ninajurcami.
23Shinamandami Mandaj Diosca, Moisesta cashna nirca:
24“Tandanajushca Israelcunataca cashna ningui: ‘Coré, Datán, Abiram shuti runacuna causanajuj carpa muyundimandaca anchurichi’ ningui” nircami.
25Shina nijpi Moisés jatarishpami, Datán shuti, Abiram shuti runacunapajman rirca. Chaiman rijujpimi, Israelcunata mandaj ancianocunapash Moisesta catishpa rinajurca.
26Tandanajushca Israelcunatami Moisés cashna nijurca:
“Cunanga, Diosta na manllaj cai runacunapaj carpacunamanda anchurichi. Paicunapaj juchacunamanda ama paicunahuan huañungapaca, paicuna ima charishcatapash napacha tacarinachu canguichi” nircami.
27Shina nijpimi Coré, Datán, Abiram shuti runacunapaj carpa muyundimandaca anchurinajurca. Datán, Abiram shuti runacunallami, paicunapaj huarmicunandi, huahuacunandi, uchilla huahuacunandi llujshishpa, paicunapaj carpa pungupi shayanajurca.
28Chaipimi Moisesca cashna nirca:
“Caita ricushpami, Mandaj Dios cai tucuita rurachun ñucata cachamushcata, na ñuca munailla rurajushcataca yachanguichi.
29Tucuicuna huañunshnallata, caicunapash huañujpi, na cashpaca, paicunata Dios ricungapa shamujpi caishujcunashna huañujpica ñucataca, Mandaj Diosca na cachamushcatami yachanguichi.
30Ashtahuangarin Mandaj Diosca, Paipaj ninan ushaihuan, cai alpata pascashpa, cai runacunataca, paicuna tucui ima charishcacunandi, huañushcacunapaj ucuman langajpimi, cai runacunaca Mandaj Diosta ninanda fiñachishcata yachanguichi” nijurcami.
31Chai tucui shimicunata Moisés rimashpa tucuchinhuanmi, chai runacuna maipi shayanajuj alpaca pascarirca.
32Chai alpa pascarishpami, chai runacunatapash, paicunapaj huasi ucupuracunatapash, Coré shuti runata tucui catijcunatapash, paicuna tucui imatalla charishcacunandi langarca.
33Chai runacunaca, paicuna tucui imatalla charishcacunandimi, huañushcacunapaj ucuman causaj huashajunajurca. Paicunaca alpa quilpajpimi tandanajushca Israelcunapaj chaupimanda chingarca.
34Paicuna ninanda caparinajujta uyashpami, chai muyundipi shayanajuj tucuilla Israelcunaca: “Ñucanchitapash alpara langanman” nishpa calpanajurca.
35Shinallata Mandaj Diospaj ñaupajmanda nina llujshishpami, inciensota cushnichinajuj, ishcai patsaj picha chunga runacunatapash rupachishpa tucuchirca.
36Chai jipami Mandaj Diosca, Moisesta cashna nijurca:
37“Aaronbaj churi sacerdote Eleazartaca cashna ningui: ‘Rupashca chaupimanda, inciensota rupachinacunata japimugri. Chai inciensota rupachinacunapi ninataca, carullaman rishpa shitagri. Chaicunaca Ñucapajlla shicanyachishcacunami carca.
38Juchata rurashpa huañushcacunapaj, chai inciensota rupachinacunataca yacuyachishpa, altarta quilpana planchacunata ruranguichi. Chashna rurashcami, Israelcuna na cazujpi llaquichinata ricuchij canga. Chaicunaca, Ñucapajlla shicanyachishca cashcamandami, Mandaj Dios Ñuca ñaupajpi, chaicunapi cushnichinajuj carca’ ningui” nijurcami.
39Shina nijpica, sacerdote Eleazarmi, rupashpa huañushca runacuna cushnichinajushca inciensota rupachina bronce platocunata apamurca. Chaicunataca yacuyachishpami, altarta quilpanata ruranajurca.
40Mandaj Diosman inciensota rupachingapaca, napash Aaronbaj miraicuna cashpata, na rijsishca maijan runapash chayashpaca, huañunapacha cashcatami Israel gentecunaman ricuchijurca. Shinallata Coré shuti runashna, paita catijcunashna ama huañuchunmi, Mandaj Dios mandashpa, Moisesman villashcataca pactachina carca.
41Chai cayandi punllami, tucuilla tandanajushca Israelcunaca Moisestapash, Aarondapash fiñashpa, na alicachishpa cashna ninajurca:
“Cangunaca, Mandaj Dios agllashca gentecunatami huañuchircanguichi” ninajurcami.
42Tandanajushca Israelcuna Moisestapash, Aarondapash fiñashpa rimangapa shamushca shayanajujpimi, cashna tucurca: Paicunaca, Dioshuan tuparina jatun carpataca, fuyu quilpashcatami ñapash ricunajurca. Chaipimi, Mandaj Diosca ninan ushaihuan punchapamba ricurirca.
43Shina ricurijpimi Moisespash, Aaronbash, Dioshuan tuparina jatun carpa ñaupajman shamunajurca.
44Chaipimi Mandaj Diosca, Moisestaca cashna nirca:
45“Cai tandanajushca Israelcunapaj chaupimanda anchurichi. Paicunataca, ñami tucuchigrini” nircami.
Shina nijpimi Moisespash, Aaronbash cungurishpa, alpaman chayajta cumurinajurca.
46Chai jipami Moisesca, Aarondaca cashna nirca:
“Inciensota rupachinata japishpa, altarmanda ninata churai. Chai jahuapillata inciensotapash churashpa, tandanajushca Israelcunapajman ucha rishpa, paicunapaj juchamanda Diosman cugri. Mandaj Diosca ninanda fiñarishca cashpami, huañuchishpa callarishca” nircami.
47Shina nijpimi Aaronga, Moisés mandashcashna inciensota rupachinata japishpa, tandanajushca Israelcunapaj chaupiman calparca. Pai chayajpica, chai gentecunaca ñami huañunajushca carca. Aarón chayashpaca, inciensota churashpami, Israelcunapaj juchacunamanda Diosman ofrendata cujurca.
48Shinallata huañushcacunapaj, causajcunapaj chaupipi sacerdote Aarón shayarijpimi, huañuica saquirirca.
49Coré shuti runahuan huañushcacunata na yupajpipash, chai jatun huañuipica, chunga chuscu huaranga canchis patsaj gentecunami huañushca carca.
50Dios cachamushca jatun huañui ña anchurijpimi Aaronga, Mandaj Dioshuan tuparina jatun carpa punguman, Moisespajman tigrarca.
Who We AreWhat We EelieveWhat We Do
2025 by iamachristian.org,Inc All rights reserved.
