OSEAS 4 - Quichua Imbabura 2016

Mandaj Dios, Israelcunahuan fiñarishpa rimashcamanda

1Israelcunalla, Mandaj Dios rimashca shimicunata uyaichi.

Mandaj Diosca, cai llactapi causajcunahuan fiñarishpami rimajun.

Cai llactapica llullajcunallami tiyan.

Pitapash na llaquishpa yanapanllu.

Diosta na yarishpa na cazushpa causajcunallami tiyan.

2Ashtahuangarin, umashpalla ari nijcuna,

llullajcuna, huañuchijcuna, shuhuajcunallami mirashca.

Huainayashpa causajcunallami ashtahuan mirashca.

Huañuicunaca cati catimi tiyan.

3Chaimandami cai llactapica, huacaicunalla tiyanga.

Cai llactapi tucui causajcunapash, huañungashnami llaquirinajun.

Sachapi causaj animalcunapash, jahuata rij alasyu animalcunapash,

Mama cuchapi causaj pijicunapashmi huañushpa tucuringa.

4Mandaj Diosca cashnami nin:

“Maijambash shuj runataca, na fiñarishpa rimanachu.

Na yangata tacurishpa rimanallachu.

Cambaj llacta gentecunaca, sacerdoteta na cazushpa fiñarijcunashnami.

5Shina cashcamandami canga, punlla cajpillata juchapi urmangui.

Profetapash, tutami canshnallata juchapi urmanga.

Cambaj mamatapashmi causaita quichusha.

6Ñuca agllashca gentecunaca, na ali yachaimandami tucuchi tucurca.

Ñuca mandashcata yachashpapash yangapimi churashcangui.

Chaimandami, candapash sacerdote canamanda anchuchisha.

Cambaj Taita Dios mandashcata cungashcanguimi.

Chashnallatami, cambaj huahuacunataca, Ñucapash cungasha.

7Paicunaca ashtahuan mirashca cashpapash, shinallata ashtahuanmi juchata ruranajurca.

Chaimandami Ñucapash, paicuna alicachi tucushcataca, pingai tucunaman tigrachisha.

8Paicunaca, Ñuca agllashca gentecuna, juchamanda cushca ofrendacunatami micushpa causan.

Chaimandami, ashtahuan juchata rurashpa catinajuchun munanajun.

9Gentecunata llaquichijshnallatami, sacerdotecunatapash llaquichisha.

Paicuna na alita rurashpa causanajushcamandami,

chashnatalla llaquichisha.

10Paicunaca, micushpapash yarjaihuanllatami saquiringa.

pacta puñunajushpapash na huahuacunata chari ushangachu.

Mandaj Diospajta ruranata saquishcamandami, chashna canga.

11Huainayashpa causashpa,

Fucushca vinota, llullu vinota, ufiashpaca,

Juizu chingashcamanmi tigran.

12Ñuca agllashca gentecunaca, rurashcalla diostami, imata cashpapash tapunajun.

Chai yamda caspitami imata nichumbash shuyanajun.

Paicunaca, culquimanda huainayaj huarmicunashnami pandarinajun.

Chashna na alita rurangapami, paicunapaj Taita Diostaca saquinajurca.

13Urcu jahuacunapimi, animalta cushpa huañuchinajurca.

Inciensotapash, loma jahuacunapi,

encina, álamo, olmo jatun quiru ucucunapimi cushnichinajurca.

Shinamandami, cangunapaj ushicunaca na alita ruranajunga.

Cangunapaj jachungunapash, cazarashca jahuami shujcunahuan causanajunga.

14Chashna na alita rurajpipash cambaj ushicunataca, na llaquichishachu.

Cambaj jachungunatapash, cazarashca jahua shujcunahuan causajushcamandaca, na llaquichishachu.

Sacerdotecunallatami, culquimanda na alita ruraj huarmicunahuan,

na ali huarmicunahuan rishpa, animalcunata cushpa huañuchinajun.

Shinamandami gentecunaca, na yachashpallata chinganajunga.

15Israelcunalla, canguna na alita ruranajujpipash,

Judá llactapi causajcunallapash, na juchata rurashpami ali canman.

Gilgal pueblomambash, na yaicunachu canguichi.

Bet-avén shuti pueblomambash, na vichai rinachu canguichi.

‘Mandaj Diosca causajumbachami’ nishpapash, na juramentunachu canguichi.

16Israel gentecunaca, millai malta shicushnami, Ñucamandaca anchurinajurca.

¿Mandaj Diosca cunanga, maltun llamacunatashnachu, jatun pambapi michinga?

17Efraín shuti aylluca,

rurashcalla dioscunatallami mañanajun, chaitaca saquichilla.

18Paicunapaj ufianaca huaglircami.

Paicunaca, na alita ruranatapash napacha shaijunajurcachu.

Paicunata mandajcunapash, na alita ruranatallami munanajurca.

19Chaimandami paicunaca, huaira apashcashna tucunga.

Animalcunata shuj dioscunaman cushpa huañuchishcamandami, pingai tucunajunga.