1 CRÓNICAS 12 - Quichua Imbabura 2016

Davidpaj macanajuj runacunamanda

1Caicunami, Siclag shuti pueblopi Davidpajman shamunajurca. Davidca, chai pueblopimi Cis shuti runapaj churi Saulta pacajushpa tiyajurca. Paicunaca, jatun macanajuicunapi Davidta yanapaj ninan shinlli runacunami carca.

2Chai runacunaca, arcocunata apashpami shamunajurca. Paicunaca ali maquihuambash, lluqui maquihuambash flechacunata arcohuan shitanata, huaracahuan rumicunata shitanata ali yachancunami carca.

Benjaminbaj ayllupura, Saulpaj huasi ucupuracunaca, caicunami:

3Chai macanajuj runacunata mandajca, Ahiezer shutimi carca. Paipaj catica, Joás shutimi carca. Paicunaca, gabaatita gentepura Semaa shuti runapaj churicunami carca. Shinallata, Azmavet shuti runapaj, Jeziel shuti, Pelet shuti churicunapash, anatotita gentepura Beracá shuti, Jehú shuti runacunapashmi carca.

4Gabaón pueblomanda Ismaías shuti runapashmi carca. Paica, quimsa chunga ninan shinlli runapuracunami carca. Chai quimsa chunga runacunataca, paimi yali shinlli carca. Jeremías, Jahaziel, Johanán, gederatita gentepura Jozabad runacunapashmi carca.

5Eluzai, Jerimot, Bealías, Semarías, harufita gentepura Sefatías shuti runacunapashmi carca.

6Elcana, Isías, Azareel, Joezer, Jasobeam shuti runacunapashmi carca. Paicunaca, Coré shuti runapaj miraipurami carca.

7Gedor shuti pueblomanda Jeroham runapaj Joela shuti, Zebadías shuti churicunapashmi carca.

8Gad ayllumandapash taucacunami Davidpajman rinajurca. Davidca, jichushca pambapi rurashca shinlli pirca huashapimi tiyajurca. Chai runacunaca, macanajunata alipacha yachaj, ninan shinlli runacunami carca. Paicunaca, tucsina jirruhuan, jarcarina jirruhuan macanajunata, alipacha yachajcunami carca. Paicunapaj ñavica, leonbaj ñaviman rijchajcunami carca. Urcucunataca, gacela shuti tarugashna calpajcunami carca.

9Paicunata mandajca, Ezer shuti runami carca. Paipaj catica, Obadías shuti runami carca. Chai ishcaipaj catica, Eliab runami carca.

10Quimsapaj catica, Mismana shuti runami carca. Chuscupaj catica, Jeremiasmi carca.

11Pichapaj catica, Atai shuti runami carca. Suctapaj catica, Eliel shuti runami carca.

12Canchispaj catica, Johanán shuti runami carca. Pusajpaj catica, Elzabad shuti runami carca.

13Iscumbaj catica, Jeremiasmi carca. Chungapaj catica, Macbanai shuti runami carca.

14Paicunami, Gad shuti runapaj macanajuj runacunata mandajcuna carca. Ashtahuan jipa mandajca, patsaj runacunatami mandajurca. Ashtahuan punda mandajca, huaranga runacunatami mandajurca.

15Chai runacunami, tamia callarina punda quillapi, Jordán huaicu manñacunacaman, ninanda yacu jundashca cajpipash chimbanajurca. Chashna chimbashpami, indi llujshimujman, indi huashajunman causajcunataca, caita chaita calpachinajurca.

16Benjaminbaj, Judapaj miraipuramanda huaquin runacunapash, Davidhuan tandanajungapami, shamunajurca.

17Paicunata tuparingapa David llujshishpaca, cashnami nijurca: “Canguna, ali yuyaihuan yanapangapa shamushca cajpica, ñucapash tucui shunguhuanmi chasquisha. Ashtahuangarin, ima na alitapash na rurashca cajpita, ñucata fiñajcunapaj maquipi churangapa shamunajujpica, ñucanchi ñaupa taitacunapaj Taita Diosllata ricushpa cangunata llaquichijuchun” nijurcami.

18Chashna nijpimi, quimsa chunga shinlli runacunata mandaj Amasai runaca, Diospaj Espíritu yarichijpi cashna nijurca:

“Isaí runapaj churi Davidpajca, cushijushpa causana tiyapachun.

Cambajpash, canda catijcunapajpash chashnallata tiyapachun.

Candaca, cambaj Taita Diosmari yanapanga” nircami.

Shina nijpimi, Davidca paicunata chasquishpa, macanajuj runacunata mandajcunahuan churarca.

19Shinallata, Manasés ayllumandapash taucacunami, Davidhuan tandanajungapa shamunajurca. Filisteocunahuan tandanajushpa Saulhuan macanajungapa David shamushca cajpimi, Davidta catinajurca. (Chashna cashpapash, filisteocunataca na yanaparcachu. Filisteocunaca: “Davidca, ñucanchita huañuchishpaca, ñucanchi umata fitishpami, paita mandaj Saulpajman ringa”) nishpapashmi, llujchishpa cachashca carca.

20Siclag shuti pueblopi causangapa David shamujujpi, Manasés ayllupuramanda Davidhuan tandanajushca runacunaca: huaranga huaranga runacunata mandaj, Adnas, Jozabad, Jediaiel, Micael, Jozabad, Eliú, Ziletai shuticunami carca.

21Paicunami, shuhuacuna tandanajushpa shamujpica, Davidta yanapanajurca. Paicunaca, macanajuj runacunata mandaj, ninan shinlli runacunami carca.

22Davidta yanapangapaca, punllandimi ashtahuan shamunajurca. Chashnami Taita Diosmanda macanajuj runacunaca, ashtacapacha miranajurca.

23Hebrón shuti pueblopi David cajpimi, Mandaj Dios mandashcashna, Saúl mandajushcata Davidman yalichingapa shamuj runacunaca caicunami:

24Judá ayllumandaca, 6.800 runacunami, jarcarina jirrucunata, tucsina jirrucunata apashca, jatun macanajuiman rinallacuna shamunajurca.

25Simeonbaj miraimandaca, 7.100 runacunami shamunajurca. Paicunaca, imatapash na manllaj, ninan shinlli runacunami carca.

26Leví ayllumandaca, 4.600 runacunami shamunajurca.

27Shinallata, Aaronbaj miraicunata, mandaj Joiada shuti runahuanga, 3.700 runacunami shamunajurca.

28Paicunahuanga, chairalla viñai Sadoc shuti runapash, paipaj huasi ucupurata mandaj ishcai chunga ishcai runacunapashmi shamunajurca. Sadoc shuti runaca, imatapash na manllaj, ninan shinlli runami carca.

29Saulpaj ayllupura, Benjamín ayllumandaca, 3.000 runacunami shamunajurca. Paicunaca chai punllacunacamanmi, Saulpaj huasi ucupurata cazushpa ashtacacuna causanajurca.

30Efraín ayllumandaca, 20.800 runacunami shamunajurca. Paicunaca imatapash na manllajcunami carca. Paicunami, chai ayllupurapica, ashtahuan alicachi tucushcacuna carca.

31Manasespaj chaupi ayllumandaca, 18.000 runacunami shamunajurca. Paicunatami, Davidta jatun mandaj cachun churangapa, shuticunata quilcashpa cachamushca carca.

32Isacar ayllumandaca, ishcai patsaj mandajcunami shamunajurca. Paicunaca, punllacuna ima tucunatapash alipacha yachajushcacunami carca. Israelcuna imatalla ruranatapash alipacha yachajcuna cajpimi, paicunapaj tucui huauquicunaca, paicuna imatalla mandashcata ruranajurca.

33Zabulón ayllumandaca, 50.000 runacunami jatun macanajuipi macanajunallacuna shamunajurca. Paicunaca, shican shican macanajunacunata apashcami tucui shunguhuan macanajungapa shamunajurca.

34Neftalí ayllumandaca, macanajuj runacunata mandaj, huaranga runacunami shamunajurca. Paicunahuanga, jarcarina jirruta, tucsina jirruta apashcami, 37.000 runacuna shamunajurca.

35Dan shuti ayllumandaca, 28.000 runacunami, macanajuipi shayarinallacuna shamunajurca.

36Aser shuti ayllumandaca, 40.000 runacunami macanajuipi shayarinallacuna, alipacha alichirishca shamunajurca.

37Jordán yacu chimbamanda, Rubenbaj, Gadpaj ayllucunamandapash, Manasespaj chaupi ayllumandapash, 120.000 runacunami shamunajurca. Paicunaca, shican shican tucui macanajunacunata apashcami shamunajurca.

38Macanajunata yachaj tucui cai runacunami, macanajuipi shayarinallacuna, ima na alitapash na yarishpa, Hebrón puebloman shamunajurca. Tucui Israelcunata jatun mandaj cachun, Davidta churangapami chashna shamunajurca. Shinallata, tucui caishuj Israel gentecunapash, jatun mandaj cachun Davidta churangapaca, shujlla yuyaimi carca.

39Paicunaca, Davidhuan, micushpa, ufiashpami, quimsa punllacaman Hebrón pueblopi tiyanajurca. Paicunapaj ayllucunami, micunatapash, ufianatapash alichinajushca carca.

40Shinallata, quimiriaj llactacunapi causanajuj, Isacar, Zabulón, Neftalí ayllucunapashmi, jacuta, higo tandata, chaquichishca uvata, vinota, aceiteta, burrucunapi, camellocunapi, mulacunapi, huagracunapi apachishpa apamunajurca. Shinallata, huagracunatapash, llamacunatapashmi ashtacatapacha apamunajurca. Chai punllacunapica, jatun cushijuimi Israel llactapica tiyarca.