EZEQUIEL 29 - Quichua Imbabura 2016

Egipto llactata llaquichinata villashcamanda

1Chunga huata, chunga quilla, chai quillapaj chunga ishcai punllapimi, Mandaj Diosca cashna nihuarca:

2“Huañuna aichayuj runa, Egipto llactata jatun mandaj Faraonda fiñashpa ricushpa, paitapash, tucui Egipto llactatapash, ñuca llaquichinata villangui.

3Canga, cashna nishpami villana cangui:

Mandaj Jatun Diosca, cashnami nin:

‘Egipto llactata jatun mandaj Faraón runalla, Ñucami canhuanga fiñarishca cani.

Canga, dragón shuti jatun animalshna,

jatun yacucunapi sirijushpami cashna nircangui:

Nilo shuti jatun yacuca ñucapajmi, ñucami rurarcani nircanguimi.

4Shinamandami Ñucaca, garfio jirrucunata, cambaj quijadacunapi churachisha.

Cambaj jatun yacucunapi tiyaj pijicunataca, cambaj aicha carapimi llutasha.

Candaca, cambaj chai jatun yacu chaupicunamandami llujchisha.

Chashna llujchijpimi, cambaj jatun yacucunamanda pijicunaca, cambaj aicha carapi llutarishpa tucuilla llujshinga.

5Shina llujchishpami candapash, cambaj jatun yacucunamanda tucuilla pijicunatapash, jichushca pambapi shitasha.

Yanga, chushaj pambapimi urmangui.

Candaca, chaipi sirijujpimi, pipash na ricushpa, pipash na pandanga.

Candaca, sacha animalcuna, jahuata rij angacuna micuchunmi saquisha.

6Shina rurajpimi, Egiptopi tucui causajcunaca Ñucataca, Mandaj Dios cajta yachanajunga.

Paicunaca, Israelcunapaca, faquirinalla sucus taunashnami carca.

7Canga, maquihuan tacarijpillatami, faquirishpa paicunapaj rigrata faquircangui.

Cambi taunarijpillata faquirishpami, paicunapaj huasha tulluta faquircangui’ ninmi nishpa villai” nihuarcami.

8Shinamandami Mandaj Jatun Diosca, cashna nijurca: “Canda llaquichingapami espadata apamuni. Chaihuanmi, runacunatapash, animalcunatapash huañuchishpa tucuchisha.

9Egipto llactaca llaquinayaita tucuchi tucushca, jichushcami saquiringa. Shina rurajpimi Ñucataca, Mandaj Dios cajta yachanajunga. Canga: ‘Nilo shuti jatun yacuca ñucapajmi, ñucami rurarcani’ nircanguimi.

10Shinamandami canhuambash, cambi tiyaj jatun yacucunahuambash, ninanda fiñarini. Egipto llactataca, Migdol pueblomanda callarishpa, Sevene shuti pueblocaman, Etiopía llacta mujungamanmi, ninanda llaquichijpi, jichushca pambashna saquiringa.

11Chai llactataca runacunapash, animalcunallapash na yalingachu. Chuscu chunga huatacamanmi, chaipica pipash na causanga.

12Egipto llactataca, shuj llactacunata llaquichishpa tucuchishcashnami, jichushca pambatashna saquisha. Chaipi tiyaj pueblocunatapash, shuj pueblocunata tucuchishcashnami tucuchisha. Chuscu chunga huatacamanmi, jichushca siringa. Egiptopi causajcunataca, shuj llactacunamanmi, caita chaita cachasha” nijurcami.

13Mandaj Jatun Diosca, cashnami nijurca: “Shuj llactacunapi caita chaita cachai tucushpa causanajuj Egipto llacta runacunataca, chuscu chunga huata jipami tandachisha.

14Egiptomanda prezu apai tucushcacunata cutin tigrachimushpaca, paicuna huacharishca Patros shuti llactamanllatami pushasha. Chaipica, paicunaca na ricunayachi tucushca llactami canga.

15Shuj llactacunahuan ricujpica, chai llactaca uchillagupachami ricuringa. Shuj llactacunata llaquichingapaca, cutinga napacha jatari ushangachu. Ñucami paicunataca, shuj llactacunata ama cutin mandashpa chari ushachun, huaquindalla saquisha.

16Chaimandami Israelcunaca, paicuna yanapachunga na ashtahuan shuyanajunga. Paicunata catishpa shinlli tucushpa, juchata cutin ruranataca na yarinajungachu. Chaimandami Ñucataca, Mandaj Jatun Dios cajta yachanajunga” nijurcami.

17Ishcai chunga sucta huatapaj punda quilla callari punllami, Mandaj Diosca, cashna nihuarca:

18“Huañuna aichayuj runa, Babilonia llactata jatun mandaj Nabucodonosor runaca, Tiro shuti pueblota mishangapa munashpami, paipaj macanajuj runacunata cacharca. Shina cashpapash paicunaca, ajchacunapash lluchurishca, huashacunapash chugrishcami saquirirca. Shina cashpami, Tiro shuti pueblotaca na mishai ushashpa, paipash, paipaj macanajuj runacunapash, ima alitallapash na tarirca.

19Chaimandami Mandaj Jatun Dios Ñucallata, cashna nini: Egipto llactataca, Ñucami Babilonia llactata jatun mandaj Nabucodonosor runaman cuni. Paimi, chai llactapi imalla tiyajtapash, macanajushpa imatalla quichumushcacunatapash tandachishpa japinga. Chai tucuita japishpami, paipaj macanajuj runacunaman cunga.

20Paipaj macanajuj runacunahuan Tiro pueblota llaquichishpa, shinlli ruranata rurashcamandami, Egipto llactataca paiman curcani. Paicunaca, Ñucapajta rurajcunami. Mandaj Jatun Dios Ñucallatami, chashna nini.

21Chai huatacunami, Israelcunaca cutin ushaita japinga. Ñucallatami cambaj shimita pascajpimi, paicunapaj chaupipi villajungui. Chaita ricushpami Ñucataca, Mandaj Dios cajta yachanajunga” nihuarcami.