1Josafat huañushpa paipaj ñaupa taitacunahuan tandanajugrijpica, paipaj taitacunata pambashca utujupimi, Davidpaj pueblopi pambarca. Paipaj randica, paipaj churi Joram shuti runami mandajurca.
2Paica: Azarías, Jehiel, Zacarías, Azarías, Micael, Sefatías shuti huauquicunatami charirca. Paicunami, Judá llactata jatun mandaj Josafat runapaj churicuna carca.
3Paicunapaj taita Josafat runaca, curita, culquita, imatalla charishcatapash ashtacatapachami paicunaman cararca. Judá llactapica, muyundi pircacunahuan jarcashca pueblocunatami curca. Ashtahuangarin, Judá llactata mandachunga, Joram shuti runamanmi punda churi cajpi curca.
4Joram shuti runaca, paipaj taitapaj randi shinllita mandai callarishpami, paipaj tucuilla huauquicunata, espadahuan huañuchirca. Israelcunata huaquin cati mandajcunatapashmi huañuchirca.
5Paica, quimsa chunga ishcai huatata charishpami, mandai callarirca. Pusaj huatatami Jerusalenbi mandajurca.
6Paica, Israel llactata jatun mandajcuna causashcashnami, Acab runapaj huasi ucupurashnallata, na alita rurajurca. Paipaj huarmica, Acab runapaj ushimi carca. Chaimandami Mandaj Diospaj ñaupajpica, chashna na alita rurajurca.
7Shina cajpipash Mandaj Diosca, Paipajta ruraj Davidhuan ari nishpa juramentushca cashpami, Judá llactataca na tucuchingapa munarca. Paica, Davidmambash, paipaj miraicunamambash: “Micha rupajujshna cachunmi, cambaj miraicuna mandachunga, causaita causaicaman cusha” nishcami carca.
8Joram shuti runa mandajui huatacunapimi, Edom llactapi causajcunaca, Judá llacta mandajujtaca na cazushpa, paicunata mandachunga shuj jatun mandajta churanajurca.
9Chaimandami Joram shuti runaca, cati mandajcunandi, tucuilla carretacunandi, Zair shuti puebloman rirca. Edom llacta runacunaca, macanajungapa carretacunandi muyundi shayanajujpimi, paica tuta jatarishpa, macanajungapa rishpa misharca.
10Shina cashpapash, Edom llactapi causajcunaca, Judá llacta mandashpa charijushcamandaca cacharirishpami, cunangaman chashna causanajun. Shinallata, Libna shuti pueblopi causajcunapash, na cazushpami jatarirca. Joram shuti runa, Mandaj Diosmanda anchurishca cajpimi chashna tucurca.
11Chashna na alita rurajushca jahuami Joram shuti runaca, Judá llactapi tiyaj lomacunapipash altarcunata rurarca. Chaita rurashpami, Jerusalenbi causajcunataca, rurashcalla dioscunata catina yuyaita cushpa pandachirca. Chashnami, Judá llactapi causajcunataca pandachirca.
12Chaimandami, profeta Eliasca, shuj cartata quilcashpa cashna nirca: “Cambaj ñaupa taita Davidpaj Mandaj Taita Diosca cashnami nijun: ‘Canga, cambaj taita Josafat causashcashna, Judá llactata jatun mandaj Asa shuti runa causashcashnaca na causanguichu.
13Ashtahuangarin, Israel llactata jatun mandajcuna causashcashnami causajungui. Shina causashpami, Judá llactapi, Jerusalenbi causajcunataca, Acab shuti runamanda miraicuna na alita rurachishcashna na alita rurachijungui. Chai jahuami, cambaj taitamanda mirai cambaj huauquicunatapash huañuchishcangui. Paicunaca, candapash ashtahuan yali alicunami carca.
14Chaimandami cambaj llacta gentecunatapash, cambaj churicunatapash, cambaj huarmicunatapash, can imata charishcatapash, Mandaj Diosca jatun llaquihuan llaquichigrijun.
15Candapash, na ali tucunalla ungüihuanmi llaquichigrijun. Ninan nanaihuanmi, chunllulicunapash llujshijpi huañungui’ ninmi” nishpa, quilcashcatami cacharca.
16Mandaj Diosmi, filisteo gentecunapipash, Etiopía llactaman chayanallapi causanajuj árabe gentecunapipash, Joram shuti runata fiñana yuyaita curca.
17Paicunaca, Judá llactapi causajcunahuan macanajungapa shamushpami, jatun mandajpaj huasipi ima tiyashcatapash, paipaj churicunatapash, paipaj huarmicunatapash apanajurca. Paipaj churicunamandaca, tucuicunapaj cati Joacaz shuti runallami saquirirca.
18Chai jipami Mandaj Diosca, na ali tucunalla chunlluli ucuman nanaita cachamushpa llaquichirca.
19Ña tauca punllacuna yalishca ishcai huatapimi: Ninan ungüi japimujpi vijsa ismushpa, chunllulicuna llujshijpi, ninan llaquita apashpa huañurca. Pai huañujpica, ñaupa taitacuna huañujpi alicachishpa ninata rupachishcashnaca, na rupachinajurcachu.
20Paica, quimsa chunga ishcai huatata charishpa, mandai callarishpaca, pusaj huatatami, Jerusalenbi mandajurca. Pai huañujpica pipash na llaquircachu. Paitaca, Davidpaj pueblopimi pambarca. Ashtahuangarin jatun mandajcunata pambana utujupica na pambarcachu.
Who We AreWhat We EelieveWhat We Do
2025 by iamachristian.org,Inc All rights reserved.
