DANIEL 6 - Quichua Imbabura 2016

Leongunata vichashca utujupi, Danielta shitashcamanda

1Mandaj Darioca, ashtahuan ali mandasha yashpami, patsaj ishcai chunga sátrapa mandajcunata churarca.

2Paicunata mandachunga, quimsa jatun mandajcunatami churarca. Jatun mandajca, sátrapa mandajcuna imata rurashpapash chai quimsa mandajcunamanra villajpi, tucuita yachangapami chashna churarca. Chai quimsapura mandajcunamanda shujca, Danielmi carca.

3Ashtahuangarin Danielca, satrapacunatapash, llactacunata mandajcunatapash, yali ali yuyaita charijmi carca. Shinamandami jatun mandajca, pai mandajuj tucuilla llactata mandaj cachun churanata yarijurca.

4Chaimandami satrapacunapash, caishuj mandajcunapash Daniel imashna mandajta ricushpa juchachingapa ricunajurca. Ashtahuangarin alitalla rurajpimi, imata juchachitapash na usharca. Danielca, ali cazuj cashpami, tucui na alimandapash anchurishca carca.

5Shina cajpimi chai mandajcunaca cashna ninajurca: “Cai Danieltaca, imata juchachitapash na usharingachu. Paitaca, paipaj Taita Dios mandashca shimicunahuan, juchachishunchi” ninajurcami.

6Shina nishpami, satrapacunapash, shuj mandajcunapash jatun mandajpaj ñaupajpi tandanajushpa, cashna ninajurca: “¡Jatun mandaj Dariolla, canga unaita causapanguilla!

7Ñucanchica: ‘tucui llactacunata mandajcuna, satrapacuna, macanajuj runacunata mandajcuna, shuj mandajcunapash tandanajushpami, shuj mushuj mandashcata churachun ninajurcanchi. Cai quimsa chunga punllacunapica, can mandajushca jahua, imapash shuj dioscunatara, na cashpaca shuj runatara alicachijcunataca, leonguna shayanajuj ucuman shitana, mandashcata rurai’ ninchimi.

8Cunanga jatun mandajlla, Media, Persia llactacunapi causajcunaman, mandashpa chaipica cambaj shutita churailla. Chashna rurajpimi chai mandashcataca pactachinga” ninajurcami.

9Shina ninajujpimi, Darío shuti jatun mandajca, chai mandashcata quilcashpa paipaj shutita churarca.

10Chai mandashcapi, jatun mandaj paipaj shutita churashcata ricushpami, Danielca paipaj huasiman yaicurca. Paipaj huasimandaca, Jerusalenda ricunalla cajpimi, tutamandapash, chaupi punllapash, chishipash Jerusalenda ricushpa, Taita Diostaca pashi nishpa mañajurca.

11Chai mandajcuna tandanajushpa shamushpami Danieltaca, paipaj Taita Diosta yanapahuai nishpa ninanda mañajujta ricunajurca.

12Chaita ricushpa rishpami, jatun mandajtaca cashna nishpa tapunajurca:

“Jatun mandajlla, ¿nachu canga cai quimsa chunga punllacunapi maijambash shuj diostara mañajpi, na cashpaca can mandajushca jahua, shuj runatara alicachijpica, leonguna shayanajuj utujupimi shitana nishpa, mandashcata quilcarcangui?” ninajurcami.

Shina nijpimi jatun mandajca, cashna nirca:

“Ari, shinapachami rurarcani. Media shuti, Persia shuti llactacunapi causajcunaca chai mandashcatami pactachinga nishpami mandarcani. Chaitaca, pipash na yangapi churai ushanachu” nircami.

13Shina nijpimi jatun mandajpaj ñaupajpica, cashna ninajurca:

“Judá llactamanda prezu apamui tucushcacunamanda Danielmi, candaca na manllan. Jatun mandajlla, chaita pactachijuchun, can mandashcata napacha cazujunllu. Ashtahuangarin punllandimi, paipaj Diostaca, quimsa cutingaman mañajun” ninajurcami.

14Chaita uyashpami, jatun mandajca ninanda llaquirishpa, Danieltaca imashnata quishpichishayari yajurca. Shina cashpami, indi huashajungacaman Danielta quishpichingapa imata runatapash yarijurca.

15Ashtahuangarin chai mandajcunaca, jatun mandajpaj ñaupajpi shayarishpami cashna ninajurca:

“Jatun mandajlla, Media shuti, Persia shuti llactacunapi causajcunaman, mandashcapica cashnami nijun: ‘Imata villashcata, ima mandashcatapash napacha faquishpa, shujta rurangachu’ nijunmi. Chaitaca canllata yachanguimi” ninajurcami.

16Chashna, ninajujpimi jatun mandajca, Danielta pushamushpa, leonguna shayanajuj utujupi shitachun cacharca. Chaipimi jatun mandajca, Danieltaca cashna nirca:

“Canga punllandi cambaj Diospajta, ruraj cashcamanda, Paillata, candaca quishpichishca cachun” nirca.

17Leonguna shayanajuj utujuman Danielta shitashpaca, shuj jatun rumihuanmi chai utujutaca quilpanajurca. Chai rumitaca, jatun mandajca paipaj surtijahuan, paipaj cati mandajcunapaj surtijahuanmi sellarca. Danielta chaiman shitashpa pactachishcataca, pipash ama yangapi churachunmi chashna ruranajurca.

18Chaita rurashca jipa, jatun mandaj huasiman tigrashpaca, micuitapash na micushpami sirijurca. Taquijcunatapash paipaj ñaupajmanga na pushamuchun munarcachu. Puñuitapash na usharcachu.

19Jatun mandajca, tutamandata jatarishpami, leonguna shayanajun utujuta ricungapa ucha rijurca.

20Chaiman chayashpami ninanda llaquirishpa Danieltaca cashna nishpa caparirca:

“Causajujlla Taita Diospajta ruraj Daniel, canga punllandimi, Paipajta rurashpa causarcangui. Chai Diosca, ¿nachu candaca leonguna ama micuchun quishpichirca?” nirca.

21Shina nijpimi Danielca, jatun mandajtaca cashna nirca:

“Jatun mandajlla, candaca unaita causajuchunmi munapani.

22Ñuca Diosca, paipaj angeltami cachamurca. Paimi, leonguna ñucata ama imatapash rurachunga, shimita vicharca. Paipaj ñaupajpica ima juchatapash na rurashcatami ricuhuarca. Can jatun mandajpaj ñaupajpipash, ima na alitapash na rurashcanichu” nirca.

23Shina nijta uyashpami, jaca ninanda cushijurca. Chaimandami leonguna shayanajuj ucumandaca, Danielta ucha llujchichun mandarca. Leonguna, shayanajuj ucumanda Danielta llujchishpaca, imapash na tucushca tucui ali cajta ricunajurca. Paitaca, Dioshuan cashcamandami imatapash na llaquichishca carca.

24Chai jipaca, Danielta juchachij, runacunataca, paicunapaj huarmicunandi, huahuacunandimi leonguna shayanajuj utujupi shitagrichun, jatun mandajllata cacharca. Leongunaca, narapash alpaman chayajpillata japishpami, tullucunatapash ñuturca.

25Chaimandami jatun mandaj Darioca, tucui llactacunapi, pueblocunapi causajcunaman, shuj shuj shimita rimaj gentecunaman cashna nishpa quilcarca:

“Tucuicuna cushijushpa causaita charipaichi.

26Ñucami cai shimicunataca mandani:

‘Ñuca mandajuj llactacunapica,

Danielpaj Diostaca ninanda manllashpa, pashi nishpa causaichi’ ninimi.

Paica, causaita causaicaman causajuj Diosmi.

Pai mandanaca, causaita causaicaman napacha tucuringachu.

Causaita causaicaman mandajungallami.

27Paillatami, ima llaquimandapash quishpichinga.

Paillatami Jahua pachatapash, cai pachatapash, Paipaj Ushaihuan juyaillaguta charijun.

Paillatami Danieltaca, leongunapaj shimicunamandaca quishpichirca” nishpami quilcarca.

28Danielca, Darío mandajuj huatacunapipash, Persia llactamanda Ciro shuti runa mandajuj huatacunapipash, ninanda alicachi tucushcami carca.