ISAÍAS 16 - Quichua Imbabura 2016

1Llactata mandajman carangapa maltun jari llamaguta cachamuichilla.

Jichushca pambapi tiyaj Sela shuti pueblomandaca, Sion lomaman cachamuichilla.

2Moab llactapi causajcunaca, ninanda manllarishpami, Arnón yacu manñata calpanajunga.

Paicunaca, angacuna tazinda saquishpa calpanshnami ringa.

3Tandanajushpa, imata rurangapapash yuyaita japichi.

Chaupi punllapi llandujshna, quilpashpa jarcaichi.

Pacajungapa shamushca purinajujcunataca na calpachishpami, pacana canguichi.

4Moab llactapi causajcunalla.

Shuj llactamanda pacajushpa shamushcacunataca, cangunahuan causachun saquinallami canguichi.

Paicunata huañuchingapa shamujcunamandaca, pacanami canguichi.

Catiriyashpa llaquichijcunaca tucuringami.

Ninanda llaquichishpa causajcunapash, cai pachamanda chingangami.

5Chai jipami, Davidpaj miraimandaca shuj ninan juyaihuan mandaj llujshimunga.

Davidpaj carpa huasimandami, alitapacha ricushpa mandajunga.

Paimi, tucuita alitapacha ricushpa, alitalla rurashpa mandajunga.

6Moab llactapi causajcunataca, ninandapacha jariyanajujtami uyarcanchi.

Paicuna jariyashpa, jatun tucushpa, na cazushpa purinajundapashmi yacharcanchi.

Ashtahuangarin paicuna llullashcacunapash, na unaicaman cangachu.

7Shina cashcamanda Moab llactapi causajcunaca, tucuicunami ninanda caparishpa huacanajunga.

Kir-hareset shuti pueblopi tiyaj uvata chaquichishpa rurashca mishqui tandata yarishpami,

llaquirishpa ninandapacha huacanajunga.

8Hesbón shuti, Sibma shuti pambacunapi tiyaj uva yuracunaca, cuchushpa shitai tucushcami carca.

Shuj llactacunata mandajcuna shamushpami, juyailla yuracunapaj malquicunataca sarunajurca.

Chai yuracunaca, Jazer shuti pueblocaman viñashpami, jichushca pambacaman mirashca carca.

Shina mirashpa rishpami, jatun cuchatapash chimbashca carca.

9Shinamandami, Sibma shuti pambapi tiyaj uva chagramandaca, Jazer shuti pueblopi causajcunashna huacajusha.

Hesbón shuti, Eleale shuti pueblocunalla. Cangunamandami ñuca viquita jichasha.

Canguna granocunata tandachina pambacunapimi, jatun macanajuita callaringapa ninanda caparinajunga.

10Aliguta fucuj pambacunapi ninanda cushijunaca, ñami tucurishca.

Uva chagracunapipash, na ashtahuan cushijushpa candanajungachu.

Uvata cutana pushtucunapipash, uvata cutashpa, vinota rurajcunapash na tiyangachu.

Uvata cutashpa, cushijuihuan caparinataca tucuchircanimi.

11Shinamandami, Moab llactapi causajcunamandaca, arpata taquijujpishna ñuca vijsaca huacanga.

Kir-hareset shuti pueblopi causajcunamandaca, tucui shunguhuanmi huacasha.

12Moab llactapi causajcunaca, lomacunapi tiyaj altarcunaman rishpa, paicunapaj dioscunapaj huasiman rishpami, chai dioscunata shaijujta mañanajunga.

Chashna mañashcapash, yangallatami canga.

13Moab llactata chashna llaquichina cai shimicunataca, punda huatacunallatami Mandaj Diosca villarca.

14Ashtahuangarin cunanga, Mandaj Diosca cashnami nin:

“Cunanmanda quimsa huatacamanmi, Moab llactaca, ninanda alicachi tucushca cashpapash, chaipi causajcunandi ninanda pingaichi tucunga.

Chai llaquicunamanda puchushcacunaca, imatapash na rurai ushajcunami, huaquinlla saquiringa” ninmi.