Psalms 31 - Quichua Imbabura 2016

Diostalla yariashpa causanamandaCandajcunata mandaj candachijuchun, David rurashca Salmomi.

1Mandaj Dioslla,

Candallami yariashpa causajuni.

Ñuca pandachi tucuchun, ama saquihuanguichu.

Can alitalla ruraj cashcamanda, huacaichihuangui.

2Ñuca mañashcata uyashpa, uchalla cacharichihuangui.

Ñucapaj shinlli jatun rumishna, shinlli torreshna cashcamanda, quishpichihuayari.

3Canmi, ñucapaca jatun rumishna, shinlli jatun huasishna capangui.

Can juyaj cashcamanda, Cambaj ñambi huacaichishpa pushahuangui.

4Ñucata pandachingapa, na ali gentecuna pacalla churashcamandaca, quishpichihuayari.

Canllami, ñucataca huacaichihuangui.

5Ñuca causaitaca, Cambaj maquipimi mingapani.

Mandaj Taita Dioslla,

Canga na llullaj cashpami quishpichihuarcangui.

6Rurashcalla dioscunata alicachishpa causajcunataca millanayachinimi.

Ñucaca, Mandaj Diospaj maquipimi tucuita churani.

7Can, ñucata juyashcamandami ninanda cushijuni.

Canmi, ñuca llaqui cajta ricushpa yanapahuarcangui.

Ñuca ninan llaqui cajtami ricuhuarcangui.

8Ñucata fiñajcunapaj maquipica, na saquihuarcanguichu.

Juyailla, ali causaitami carahuarcangui.

9Mandaj Dioslla,

llaquihuayari, ninan llaquitamari apajuni.

Cai llaquihuanga, ñuca ñavipash, cuerpopash, ñuca tucui causaipashmi tucurijuni.

10Ninan nanaihuanmi causajuni.

Cai huatacunapica, huacaillami causajuni.

Na alicunata rurashcamandami, ushai illaj saquirini.

Ñuca tullucunapash tucurishcami cani.

11Ñucata fiñajcunaca, asishpami ricunajun.

Ñuca cumbacunapash, ashtahuanmi asishpa ricunajun.

Ñucata rijsijcunapash, manllarishpami ricunajuhuan.

Ñucata ricushpaca, anchurishpami rinajun.

12Ñucataca, huañushcatashnami ña cungashca.

Faquirishca vasoshnami tucushcani.

13Taucacuna na alicachishpa rimanajujtami uyani.

Maita rishpapash, manllaihuanmi rijuni.

Tandanajushpa ñucata fiñashpami, huañuchingapa yarinajun.

14Mandaj Dioslla,

Canda yariashpami causajuni,

“Canmi, ñuca Taita Dios cangui” nijunimi.

15Ñuca causaica, Cambaj maquipimi.

Ñucata fiñashpa llaquichijcunamanda cacharichihuayari.

16Cambajta ruraj ñucataca, ricuhuayari.

Can llaquij cashcamanda, quishpichihuayari.

17Mandaj Dioslla,

Candallami mañajuni.

Ñuca pingai tucuchunga ama saquihuaichu.

Canda na manllajcunaca, pingai tucushca cachun.

Seolpi upalla sirinajuchun cachapayari.

18Llullacunaca upaman tigrachun.

Paicunaca, ñucata na alicachishpami rimanajun.

Paicunaca, jariyashpa yangapi churashpami rimanajun.

19¡Canga ninan juyajmi cangui!

Canda manllashpa causajcunatami chashna juyangui.

Cambi shuyajcunatami chashna juyangui.

Huañuna aichayuj runacunapaj miraicuna ricujtami, chashna juyangui.

20Na ali gentecuna ama llaquichinajuchunmi, pacahuangui.

Fiñanajuipi churaj jallumandapash, jatun carpa ucupimi pacahuangui.

21Mandaj Diosca, alicachi tucushca cachun.

Paica, muyundi jarcashca pueblopi llaquicunahuan cajpimi,

ninanda llaquishpa quishpichihuarca.

22Ñucaca, manllaihuan musparijushpami:

“Cambaj ñaupajmandaca, anchuchi tucushcamari cani” yajurcani.

Ashtahuangarin, Canda caparishpa mañajujtaca uyahuarcanguimi.

23Mandaj Diospajlla causajcunaca, Paitami juyana canguichi.

Paita cazujcunatami, Mandaj Diosca huacaichijun.

Ashtahuangarin, jariyashpa na alita rurajcunamanga,

ashtaca llaquicunatami cachamunga.

24Mandaj Diosta shuyajcunaca, shinlli tucunami canguichi.

Cangunapaj shungupipash, cushijuita japinami canguichi.