2 REYES 20 - Quichua Imbabura 2016

Ezequías runa huañujushcamanda(2 Crón. 32:24-26; Isa. 38:1-22)

1Chai punllacunami Ezequías runaca, ungushca huañunalla sirijurca. Shinamandami Amoz shuti runapaj churi, Profeta Isaiasca, paipajman shamushpa cashna nirca:

“Mandaj Diosca, cashnami nin: ‘Cambaj huasi ucupurataca, imata cashpapash uchalla ningui. Canga na causanguichu, huañugringuimi’ ninmi” nircami.

2Shina nijpimi Ezequiasca, pircaman tigrarishpa, Mandaj Diosta cashna nishpa mañarca:

3“Mandaj Dioslla, Candaca ninandapachami mañapani. Cambaj ñaupajpi na llullashpa, tucui shunguhuan Canda cazushpa causashcataca yaripailla. Shinallata, imata cashpapash Cambaj ali canatalla rurashpa causashcatapash yaripailla” nishpami Ezequías runaca, ninandapacha huacajurca.

4Chai jipaca, chaupi patioman Isaías nara chayajpillatami Mandaj Diosca, cashna nishpa Isaiasman villarca:

5“Ñuca agllashcacunata mandaj Ezequiaspajman tigrashpa, cashna nigri: Cambaj ñaupa taita Davidta Mandaj Taita Diosca, cashnami nin: ‘Can mañajujtaca uyarcanimi, cambaj viquitapash ricurcanimi. Candaca chai ungüimanda alichinimi. Cunanga, quimsa punlla jipaca, Mandaj Dios Ñucapaj huasiman vichai ringui.

6Cambaj causaitaca, chunga picha huatatami mirachigrini. Candapash, cai pueblopi causajcunatapashmi, Asiria llactata jatun mandajpaj maquimanda cacharichisha. Ñuca ninanda juyaimanda, Ñucapajta ruraj Davidtapash juyaimandami, cai pueblopi causajcunataca quishpichisha’ ninmi nigri” nircami.

7Isaiasca cashnami nirca: “Masashca higota japishpa, nanachijuj pushtupi churaichi” nirca. Shina nijpi, chaita japishpa churajpimi ali tucurca.

8Ezequías runaca, Isaiastaca cashnami nishca carca:

“Mandaj Dios alichinatapash, quimsa punlla jipa, Mandaj Diospaj huasiman vichai rinatapash, ¿imata ricushpata yachapasha?” nishcami carca.

9Chaimandami Isaiasca, cashna nirca:

“Mandaj Diosca, pai nishcata pactachinataca, cashnata rurashpami Mandaj Diosca, canman ricuchinga. Canga, ¿Indi llandu ñaupaman richunllu munangui, na cashpaca huashaman tigrachunllu munangui?” nircami.

10Shina nijpimi Ezequías runaca:

“Indi llanduca ñaupamanllami rin, indi llandu huashaman tigranaca, na ushanallami” nircami.

11Shina nijpimi, profeta Isaiasca, Mandaj Diosta caparishpa mañarca. Shina mañajpimi, Acaz shuti runa punlla chishajujta ricunapi ricujpica, indi llanduca mashnata ñaupaman rina, chashnatallata huashaman tigrashca carca.

Babilonia llactamanda cachamushcata, Ezequías chasquishcamanda(2 Crón. 32:27-31; Isa. 39:1-8)

12Chai huatacunallatami, Babilonia llactata jatun mandaj Baladán shuti runapaj churi Merodac-baladán shuti runaca, Ezequías huañujujta yacharca. Chaita yachashpami quilcashca fangacunahuan, shuj caranacunahuambash, paipaj villajcunata Ezequías runapajman cachamurca.

13Ezequiasca paicunata chasquishpaca, paipaj huasipi tucui imatalla charishcatapash, culquita, curita, mishquilla ashnajun yacucunatapash, ali aceitecunatapashmi ricuchijurca. Shinallata, macanajunacunata alichishca huasitapash, ima juyaillacunata alichishca ucucunatapashmi tucuillata ricuchirca. Ezequiasca, imatallapash na pacashpami paipaj huasipi, pai mandajuj llactacunapi tucui imalla tiyashcacunata ricuchijurca.

14Chaimandami profeta Isaiasca, jatun mandaj Ezequías runapajman shamushpa cashna nirca:

“Cambajman shamuj chai runacunaca, ¿imatata nirca? Paicunaca, ¿maimandata cambajman shamushca?” nircami.

Shina nijpimi, Ezequiasca:

“Paicunaca, Babilonia caru llactamandami shamushca” nirca.

15Shina nijpimi, Isaiasca:

“Cambaj huasipica, ¿imatallata ricuchircangui?” nirca.

Shina nijpimi Ezequiasca:

“Ñuca huasipica, tucui imalla tiyashcatami ricunajurca. Imatallapash na pacashpami tucuitapacha ricuchircani” nircami.

16Shina nijpimi Isaiasca, Ezequiastaca cashna nirca:

“Mandaj Dios rimashcata uyai:

17‘Cambaj huasipi tucui ima tiyashcatapash, cambaj ñaupa taitacuna, tucui imatalla alichishcacuna cunangaman tiyashcatapash, Babilonia llactaman apana punllacunami chayamujun. Caipica, imatallapash na saquishpami apanga’ ninmi Mandaj Diosca.

18‘Shinallata, cambaj churicunatapash, Babilonia llactata jatun mandajpaj huasiman apajpimi, eunucocuna tucushpa causanajunga’ ninmi” nircami.

19Shina nijpimi Ezequiasca, Isaiastaca:

“Mandaj Dios rimashca shimicunata ñucaman can villashcapash, alimi capan” nirca.

Shinallata cashnatapashmi nirca:

“Ñuca causajui punllacunapillapash, ima llaquipash na japishpa, ali causai tiyashpachari ali canman” nirca.

Ezequías huañushcamanda(2 Crón. 32:32-33)

20Ezequías runa imatalla ashtahuan rurashcapash, ninan ushaita pai charishcapash, yacu pilunta imashna rurashcapash, chai pilunman yacu rinata rurashcapash, pueblo ucuman yacuta apashcapash, ¿nachu Judá llactata jatun mandajcuna imatalla rurashcacunata quilcashca libropi tiyajun?

21Ezequías huañushpa, paipaj ñaupa taitacunahuan tandanajujpica, paipaj churi Manasesmi paipaj randi mandajurca.