NÚMEROS 5 - Quichua Imbabura 2016

Mapayashcacunataca, carpacunamanda llujchishpa cachashcamanda

1Mandaj Diosca, Moisestami cashna nijurca.

2“Israelcunataca: Lepra ungüihuan cajpipash, yangata muyu yacu jicharijuj cajpipash, huañushcata tacarishca cajpipash, tucuillatami carpacunamanda llujchishpa cachana cangui.

3Jari cajpipash, huarmi cajpipash, chaimanda llujchishpa cachajpillami, carpa shayachishca pushtucunaca mapa illaj canga. Ñucami cangunapaj chaupipi causajuni” nijurcami.

4Shina nijpimi Israelcunaca, chashna gentecunataca carpacunamanda llujchishpa cachanajurca. Mandaj Dios, Moisesta mandashcashnami chashna ruranajurca.

Pita llaquichishca cashpapash alichinamanda

5Mandaj Diosca, Moisestaca cashnatapashmi nijurca:

6“Israelcunataca cashna ningui: ‘Jari cashpa, huarmi cashpapash, pitapash llaquichishpa juchata rurashpaca, Mandaj Diosta na cazushpami juchayu saquiringa.

7Chashna cashpami, ninanda llaquirishpa paipaj juchataca villana canga. Chai jipaca, mashnata cuna cashcamandami, pichapi chaupishpa, shuj chaupita mirachishcandi chai llaquichi tucujman cunga.

8Llaquichi tucushcapaj ayllu na tiyajpica, chai na alita rurashcamanda paiman cunataca, Mandaj Diosman cujpimi chaitaca sacerdote japinga. Paipaj juchata anchuchijuchun, juchamanda jari llamata Diosman cushca jahuami, chashna cunga.

9Diospajlla cachun Israelcuna shicanyachishca ofrendacunaca sacerdotepaj cajpimi, sacerdoteman cunga.

10Ñucaman cungapa shicanyachishcapash, sacerdoteman cungapa shicanyachishcapash, paipajllatami canga’ ningui” nijurcami.

Cusahuan, huarmihuan juchachirijpi imata rurana cashcamanda

11Mandaj Diosca, Moisestaca cashnatapashmi nijurca:

12“Israelcunataca cashna mandangui: ‘Maijambaj huarmipash, pandarishpami shuj jarihuan huainayashpa causajunga.

13Chai huarmica, cusapash na ricujta, pipash na yachajta, pipash na japijpi, tucuimanda pacallami pihuan cashpapash huainayashpa causajunga.

14Shinallata, shujhuan purijun yashpami, juchachina yuyai shamujpi, paipaj huarmitaca shujhuan juchachinga. Na cashpaca, paipaj huarmica na shujhuan cajpitami, shujhuan juchachinga.

15Chashna cashcamandami cusaca, ishcai kilo yali cebada jacuta apashpa, ofrendata cungapa, huarmitapash pushashpa sacerdotepajman shamunga. Juchachishcamanda apamushca cajpimi, chai jacupica, aceitetapash, inciensotapash napacha churanga. Chai ofrendaca, chashna juchata rurashcata yarichijuj ofrendami canga.

16Chai huarmitaca sacerdotemi, Mandaj Diospaj ñaupajman pushamunga.

17Chaipimi sacerdoteca, Ñucapajlla shicanyachishca yacutaca, alpa platopi churanga. Chai yacupimi, Ñucapajlla carpamanda ñutu alpata japishpa churanga.

18Chai jipami sacerdoteca, Mandaj Dios Ñuca ñaupajpi shayachishpa, chai huarmipaj uma ajchatapash cacharichinga. Shinallata, juchamanda yarichingapa cushca ofrendataca, chai huarmipaj maquipimi cunga. Juchamanda llaquichij jayaj yacutapash, sacerdotemi maquipi charijunga.

19Chai jipami sacerdoteca, chai huarmitaca, cashna nishpami juramentuchinga: Pihuambash na pacta puñushca cajpica, shinallata cambaj cusata saquishpa, na shujhuan huainayashca cajpica, cai llaquichina jayaj yacuta ufiajpipash, na ima llaquipash japingachu.

20Ashtahuangarin pandarishpa, cusata umachishpa, shujhuan huainayashpa mapayashca cajpica,

21(sacerdoteca juramentushpami, chai huarmitaca llaquichi tucunapachami cangui nishpa cashna ninga): Mandaj Diospash, cai llacta gentecunapash, ninanda na alicachishca cachun. Shinallata candaca, huahuatapash na chari ushajta, vijsapash punguishca canata rurashpa, Mandaj Diosllata llaquichijuchun.

22Cai jayaj yacu cambaj vijsaman yaicushpaca, cambaj vijsata punguichishpa, huahuatapash na chari ushajta rurachun ningami. Shina nijpica, chai huarmica: Chashna cachun, chashna cachun ningami.

23Juchamanda chashna llaquichina cashcataca, sacerdotemi shuj fangapi quilcanga. Chai quilcashcataca, jayaj yacupi churashpami chingachinga.

24Chai jayaj yacutaca, chai huarmimanmi ufiachinga. Juchata rurashca cashpaca, chai jayaj yacuta ufiashpami ninan llaquita apanga.

25Chai jipami, shujhuan juchachishcamanda ofrendashca granocunata, chai huarmipaj maquimanda sacerdote japishpa, Mandaj Diospaj altar ñaupajpi Ñucaman cunga.

26Chai ofrendamanda, maqui junda jacuta japishpami sacerdoteca, chai juchamanda yarichishpa altarpi Ñucaman cushpa rupachinga. Chai jipami, jayaj yacutaca huarmiman ufiachinga.

27Shina ufiachijpi cusata na cazushpa, huainayashca cashpami, huahuatapash na chari ushaj, vijsapash punguishca tucunga. Chashna cashpami chai huarmica, paipaj llactapica ninanda na alicachi tucunga.

28Ashtahuangarin, chai huarmi na huainayashca cashpaca, ima llaquitapash na apashpami, huahuacunatapash chari ushanga.

29Caicunaca, maijan huarmipash cusata na cazushpa, shujhuan huainayashpa mapayashca cajpi, llaquichinata mandashca shimicunami.

30Shinallata, shina cashca cajpi, na shina cashca cajpi, paipaj huarmita juchachishca cajpica, chai huarmita Mandaj Dios Ñucapaj ñaupajman apamujpimi, sacerdoteca mandashca shimicunapi nijujta tucuita pactachinga.

31Ashtahuangarin, cusaca ima llaquitapash na apangachu. Huarmimi, paipaj juchamandaca llaquita apanga’ ningui” nijurcami.