1 CRÓNICAS 28 - Quichua Imbabura 2016

Davidpaj randi, Salomón mandai callarishcamanda

1Davidca, Israelcunata cati mandajcunata, ayllucunata mandajcunata, jatun mandajpajta rurajcunata, huaranga runacunata, patsaj runacunata mandajcunatami Jerusalenbi tandachirca. Shinallata, jatun mandajpaj alpacunata, paipaj churicunapaj tucuilla alpacunata ricushpa mandajcunatapash, ashtahuan shuj mandajcunatapash, ninan shinlli runacunatapashmi tandachirca.

2Chashna tandachishpami, jatun mandaj Davidca, jatarishpa cashna nijurca: “Ñuca huauquicuna, ñuca llactapuracuna, ali uyahuaichi. Mandaj Dios ñucanchihuan ari ninajushpa quilcashcata alichishca arcapash aliguta tiyajuchunmi, shuj huasita shayachisha yajurcani. Ñucanchi Taita Diospash chaipi causachunmi, shina shayachingapa munarcani. Chaimandami chai huasita shayachingapaca, tucuita ña alichishcalla carcani.

3Ashtahuangarin Taita Diosmi, cashna nihuarca: ‘Ñuca shutipi mañana huasitaca, canga na shayachinguichu. Canga, macanajuj runa cashcamandami, ashtaca yahuarta jicharcangui’ nihuarcami.

4Ashtahuangarin, Israelcunata Mandaj Taita Diosca, ñuca taitapaj tucui huasi ucupuramanda agllashpami, ñuca tucui causaipi Israel llactata jatun mandaj cachun churahuarca. Paimi, Judá ayllupuramanda juez cachun agllashca. Judá ayllupuramandaca, ñuca taitapaj ayllutami agllashca. Ñuca huauquicunamandaca, ñucatami agllashpa, tucui Israelcunata jatun mandaj cachun churahuarca.

5(Mandaj Diosca, ashtaca churicunatami carahuarca). Ñuca churicunamandaca, ñuca churi Salomondami, Mandaj Dios agllashca Israelcunata mandachun churarca.

6Taita Diosllatami cashna nihuarca: ‘Cambaj churi Salomonmi, Ñuca huasitapash, Ñuca patiocunatapash ruranga. Paitami, Ñuca churi cachun agllarcani, Ñucapash paipaj Taitami casha.

7Ñuca mandashca shimicunata, tucuita cazushpa pactachijpica, pai mandanataca paipaj tucui causaipimi shinllitapacha cachun churasha’ nihuarcami.

8Cunanga, Mandaj Diospajlla tandanajushca cai tucui Israelcunapash, ñucanchi Taita Diospash uyajujpimi, cashna nini: Cangunata Mandaj Taita Dios imatalla mandashcatapash pactachinami canguichi. Chashna rurashpallami, cangunaman carashca cai juyailla llactagutaca japinguichi. Shinallata, cai alpacunataca, causaita causaicaman cangunapaj huahuacunapaj cachunmi saquinguichi.

9Cunanga, Salomón, ñuca huahualla. Cambaj taitapaj Taita Diostaca, tucui shunguhuan, tucui munaihuanmi Paipajta rurashpa causana cangui. Mandaj Diosca, tucuicunapaj shungupi imatalla yarijujtapash tucuitami yachan. Paita mascashpaca, tuparinguimi. Ashtahuangarin can saquijpica, Paipashmi, candaca causaita causaicaman jichunga.

10Cunanga Mandaj Diosmi, candaca shuj huasita shayachishpa Paipajlla shicanyachijuchun agllarca. Chaitaca, shinlli tucushpa rurashpa pactachinguilla” nijurcami.

11Chashna nishpami Davidca, Diospaj huasiman yaicunatapash, Diospajlla huasi ucutapash, imatalla alichina ucucunatapash, shuj ucucunatapash, juchamanda cushca yahuarta tsirapachina altartapash, imashna ruranata ricuchishpa paipaj churi Salomonman saquirca.

12Shinallata, Mandaj Diospaj huasi patiocunata, chai huasi muyundi ucucunata, Taita Diospaj huasipi imalla tiyashcata alichina ucucunata, Diospajlla cachun shicanyachishcata alichinacunatapash, imashna rurangapa yarijushcatami ricuchishpa saquirca.

13Shinallata, Mandaj Diospaj huasipi, Diospajta rurangapa cati cati yaicunajuj sacerdotecunapaj, levitacunapaj ucucunatapash, Mandaj Diospaj huasipi Diospajta rurangapa imalla charinacunata alichina ucucunata rurachumbashmi ricuchishpa saquirca.

14Diospaj huasipi shuj shuj ruranacunata rurangapa imalla tiyanacunata, curimanda imata rurachumbash, curita pezashpa, culquimanda imata rurachumbash, culquita pezashpami curca.

15Curi candelerota, chai candeleropi churana lamparacunata rurachumbash, curita pezashpami curca. Culqui candelerocunata rurachumbash, chai candeleropi churana lamparacunata rurachumbash, culquita pezashpami curca. Candelerocunata, imashna rurachinata ricushpami, pezashpa curca.

16Shinallata, Diospajlla shicanyachishca tandata churana mezacunata rurachumbash, tucuipajmi curita pezashpa curca. Culqui mezacunata rurachumbash, shinallatami culquita pezashpa curca.

17Imatalla japina jirrucunatapash, tastacunatapash, ufiana vasocunatapash, shuj tastacunatapash rurachunmi, ashtahuan ali curita curca. Curi tastacunata rurangapa, culqui tastacunata rurangapapash, tucuitami pezashpa pactanata curca.

18Shinallata, inciensota cushnichina altarta, curi querubín angelcunata rurachumbash, ashtahuan ali curitami pezashpa curca. Chai querubín angelcunami, Mandaj Dioshuan ari ninajushpa quilcashpa alichishca arcataca, alascunahuan quilpashca tiyanajun. Chai curi querubín angelcunapaj carretata rurachumbashmi, shinallata curca.

19Davidca, cashnami nirca: “Tucui caicunatami, Mandaj Diosca Paipaj maquihuan rurashpa ricuchihuarca. Paimi, imashna ruranataca tucuita aliguta rurashpa ricuchishpa yachachihuarca” nircami.

20Davidca, paipaj churi Salomondaca, cashnatapashmi nijurca: “Ashtahuan ali yuyaita japishpa, shinlli tucushpa ña rurai callarilla. Na rurai ushashachu yashpa, manllashpara, pacta saquinguiman. Ñucata Mandaj Taita Diosca canhuanmi canga. Mandaj Diosca, Paipaj huasita tucuita aliguta rurashpa tucuchingacaman, candaca napacha jichushpa saquingachu.

21Agllashpa churashca sacerdotecunapash, levitacunapash, Taita Diospaj huasipi tucui imatalla ruranapica canhuanmi canga. Shinallata, tucui shunguhuan rurajcunapash, tucui imatapash ruranata ali yachajcunapash canhuanmi canga. Tucui mandajcunapash, tucui Israelcunapash, can mandashcata tucuita pactachingapaca cambaj maquipimi canga” nijurcami.