1 JUAN 3 - Quichua Imbabura 2016

Diospaj huahuacuna cashcamanda

1Ricuichi, Taita Diosca ñucanchita ninandapacha juyashpami: “Ñuca huahuacunami canguichi” nijun. Cai pachapajtalla rurashpa causajcunaca, Diostapash na rijsishpami, ñucanchitapash na rijsin.

2Juyashca crijcuna, cunanga ñami Taita Diospaj huahuacuna canchi. Tucurimui punllapi ñucanchi imashna canatapash, nara ricuchimunllu. Ashtahuangarin, Cristo ricurimujpimi Paishnallapacha cashun. Paitapash imashnapacha cajtami ricushun.

3Maijambash chashna tucunata crishpa causajushpaca, Cristo imashna cashcashnami, paipash aliguta causanga.

4Juchata rurashpa causajcunaca, Dios mandashca shimitami na cazun. Pai mandashcata na cazushpaca, juchatami rurajun.

5Cristoca, ñucanchipaj juchacunata anchuchingapami shamurca. Paica, ima juchatapash na charinllu.

6Maijambash, Paihuan shujlla tucushpaca, na ashtahuan juchata rurashpa causanllu. Maijambash, juchata rurashpa causajushpaca, Diostaca na ricushcachu, na rijsishcachu.

7Juyashca huahuacuna, cangunataca pipash ama pandachishca cachun. Alitalla rurashpa causashpallami, Cristoshnalla, alitalla rurashpa causan.

8Juchata rurashpa causajcunaca, tucuillami diablopaj causanajun. Diabloca, cai pacha callarimandapachami juchata rurajun. Diospaj Churi Jesucristoca, tucui na alicunata diablo rurajujta tucuchingapami shamurca.

9Maijan cashpapash, Diosmanda huacharishca cashpaca, napacha juchata ruranllu. Paicunaca, Diospaj huahuacuna cashpami Taita Diospajlla causan. Diosmanda huacharishca cashpami juchataca napacha rurashpa causan.

10Maijanlla Taita Diospaj huahuacuna cajtapash, diablopaj huahuacuna cajtapash rijsinallami: Alitalla rurana tiyajpipash na rurashpa, crijcunatapash na juyashpa causajcunaca, napacha Taita Diospaj huahuacunachu.

11“Caishujhuan chaishujhuan juyarishpami causana canguichi” nishpa villashcataca, callarimandapachami uyarcanguichi.

12Caín runaca, diablopaj cashpami, paipaj huauquitaca huañuchirca. Cangunaca, na chashna canachu canguichi, ¿Imamandata paipaj huauquitaca huañuchishcanga? Paipaj rurashcacunaca na ali cajpimi, huauquipaj rurashcacunaca ali cajta ricushpa, chashnaca rurarca.

13Ñuca juyashca crijcuna, cai pachapi causajcuna, cangunata na ricunayachijpica, na manllarinachu canguichi.

14Ñucanchica, huañushcashna causanata saquishpami, causaita causagrinaman yalishcanchi. Chaitaca, crijcunapura juyarishpa causashpami yachanchi. Crijcunata maijambash na juyashpaca, huañushcashnami causan.

15Maijan cashpapash, paipaj huauquita na ricunayachishpaca, huañuchij runashnami. Maijan huañuchij runapash, napacha causaita causagringachu.

16Cristoca, ñucanchimanda huañushpami, imashna juyarishpa causanataca ricuchimurca. Shinallatami, ñucanchipash crijcunamanda, huañuna cajpica, huañunalla canchi.

17Cai pachapi charij cashpapash, paipaj huauqui imagupash illaj cajta ricushpata na carashpaca, mitsa cashcatami ricuchijun. Shina cashpaca, ¿imashnata Diospaj juyaitaca paipaj shungupi charingayari?

18Ñuca huahuacunalla, na shimihuanlla “juyanimi” ninachu canguichi. Ashtahuangarin juyashcataca, imagutapash rurashpami ricuchina canchi.

19Shina causashpami, Diospaj huahuacuna cashcataca yachanchi. Shina cashpami, Paipaj ñaupajpica tucui shunguhuan cushijushpa causanchi.

20Ñucanchi shungullata, “na alitamari rurashcangui” nijujpica, Taita Dioscarin, ñucanchi shungutaca yali cashpami ña tucuita ali yachan.

21Juyashca crijcuna, ñucanchi shungullata na imatapash juchachijpica, Taita Diosta yariajllami cushijushpa causana canchi.

22Mandashca shimicunata cazushpa, Dios munashcataca rurashpa, Paita cushichishpami, imata mañashcatapash carajpi japishun.

23Diosca cashnami mandarca: Paipaj Churi Jesucristotapash crichun, caishujhuan chaishujhuan juyarishpa causachumbashmi mandarca.

24Taita Dios mandashca shimicunata cazushpallami, Paihuanga pacta causanchi. Shina cajpimi, Taita Diospash, ñucanchi shungupi causajun. Pai carashca Espiritumi, ñucanchipaj shungupi Dios causajujtaca yachachijun.