2 REYES 13 - Quichua Imbabura 2016

Joacaz shuti runa mandajushcamanda

1Ocozías runapaj churi Joás shuti runa, Judá llactata ishcai chunga quimsa huatata mandajujpimi, Jehú shuti runapaj churi Joacaz runaca, Israel llactataca mandai callarirca. Paica, chunga canchis huatatami, Samaria pueblopi mandajurca.

2Paica Nabat runapaj churi Jeroboam runa, Israelcunata juchacunata rurachishcashnami, Mandaj Diospaj ñaupajpica, na alita rurashpa causanajurca.

3Chaimandami Mandaj Diosca, Israelcunataca ninanda fiñashpa, Siria llactata jatun mandaj Hazael runapaj maquipi, Hazael runapajllata churi Ben-adad runapaj maquipi, tauca huatacunata llaquichishca cachun saquirca.

4Shina cajpipash Mandaj Diospaj ñaupajpi, Joacaz runa mañajujpimi, Mandaj Diosca uyarca. Siria llactata jatun mandaj, Israel llactata ninanda llaquichijujpimi, Joacaz runa mañashcataca uyarca.

5(Chaimandami Mandaj Diosca, shuj quishpichijta cachamurca. Siria llacta gentecuna mandashpa charijushcamanda, Chai quishpichij cacharichijpimi, Israel gentecunaca, punda causashcashna aliguta causanajurca.

6Shina cashpapash Jeroboam runapaj huasi ucupuracuna Israelcunata juchata rurachishcataca, na saquishpami chashnallata causanajurca. Shinallata, Asera shuti huarmi diosman rijchajta rurashcatapash, Samaria pueblomandaca na anchuchircachu).

7Siria llactata jatun mandajmi, Israelcunataca ñutushpa tucuchishca carca. Chaimandami Joacaz runaca, caballopi tiyarishpa macanajuj picha chunga runacunahuan, chunga carretacunahuan, chaquilla purishpa macanajuj chunga huaranga runacunahuanlla saquirishca carca.

8Joacaz runa imatalla rurashcapash, pai ninan shinlli cashcapash, ¿nachu Israelcunata jatun mandajcuna imatalla rurashcata quilcashca libropi tiyajun?

9Joacaz runa huañushpa, paipaj ñaupa taitacunahuan tandanajujpica, Samaria pueblopimi pambarca. Paipaj randica, paipaj churi Joás runami mandajurca.

Israel llactata, Joás shuti runa mandajushcamanda

10Judá llactata jatun mandaj Joás shuti runaca, quimsa chunga canchis huatata ña mandajujpimi, Joacaz runapaj churi Joás runaca, Israel llactata mandai callarirca. Paica, chunga sucta huatatami, Samaria pueblopi mandajurca.

11Paica, Mandaj Diospaj ñaupajpica na alitallami rurajurca. Nabat shuti runapaj churi Jeroboam runa, Israelcunata juchata rurachishca, tucui chai juchacunataca na saquishpami rurajurca.

12Imatalla Joás runa ashtahuan rurashcacunapash, tucui imata rurashcapash, pai shinlli tucushpa Judá llactata jatun mandaj Amasías runahuan macanajushcapash, ¿Nachu, Israel llactata jatun mandajcuna imatalla rurashcacunata quilcashca libropimi tiyajun?

13Joás runa huañushpa, paipaj ñaupa taitacunahuan tandanajujpica, Jeroboam shuti runami, pai mandashpa tiyajushcapica tiyarirca. Joás runataca, Israel llactata jatun mandajcunata pambashcapillatami, Samaria pueblopi pambarca.

Profeta Eliseo, ña huañunalla cashpa villajushcamanda

14Profeta Eliseo huañunapacha ungüihuan cajpimi, Israel llactata jatun mandaj Joás shuti runaca, paipaj ñaupajman shamushpa, cashna nishpa huacajurca:

“¡Ñuca taitalla, ñuca taitalla! ¡Canga, macanajuna carretacunashna, caballopi tiyarishpa macanajuj runacunashnami, Israelcunapaca carcangui!” nircami.

15Shina nijpi Eliseoca:

“Shuj arcotapash, huaquin flechacunatapash japi” nijpimi, jatun mandajca, shuj arcotapash, huaquin flechacunatapash japirca.

16Chai jipami Eliseoca, Israel llactata jatun mandajtaca:

“Cambaj maquita arco jahuapi churai” nijpimi, jatun mandajca arco jahuapi maquita churarca. Chai jahuapimi Eliseoca paipaj maquita churarca

17Chai jipami:

“Indi llujshimujman tiyajuj ventanata pascai” nishpa, Eliseoca mandarca.

Ventanata jatun mandaj pascajpimi, Eliseoca:

“Flechata cachari” nirca.

Shina nijpimi jatun mandajca, flechata cacharirca.

Chai flechata cacharijpimi Eliseoca, cashna nirca:

“Mandaj Diosca, cai flechahuanmi, macanajuipi mishachinga. Canmi Siria llacta gentecunataca, Afec shuti pueblopi huañuchishpa tucuchingui” nirca.

18Cutinllatami:

“Flechacunata japi” nishpa Eliseoca, Israel llactata jatun mandajtaca mandarca.

Chaita japijpica:

“Alpapi huactai” nishpami Eliseoca mandarca. Quimsacaman huactashpaca, saquircallami.

19Chaimandami Diospajta ruraj runaca, fiñarishpa cashna nirca:

“Pichacaman, na cashpaca suctacamanllapash alpapi huactashpaca, Siria llacta gentecunataca, tucuillami tucuchiguiman carca. Ashtahuangarin cunanga, quimsacamanllami Siria llacta gentecunataca mishangui” nircami.

20Eliseo huañujpi pambashca huata jipami, Moab llacta gentecunaca, Israel llactaman macanajungapa shamunajurca.

21Chai punllapimi, shuj runa huañushcata pambangapa rinajurca. Shina rinajushpami, macanajungapa shamuj runacunata ricushpa, Eliseota pambashca utujupi, huañushcataca shitashpa calpanajurca. Chashna shitajpimi, Eliseopaj tullucunapi huactarishpa, causarishpa shayarirca.

22Joacaz shuti runa mandajui huatacunapimi, Siria llactata jatun mandaj Hazael shuti runaca, Israelcunata ninanda llaquichijurca.

23Mandaj Diosca Abraham runahuan, Isaac runahuan, Jacob runahuan ari nirishca cashcamandami, paicunataca ninanda llaquijurca. Chaimandami paicunataca tucuchingapapash, paipaj ñaupajmanda llujchishpa cachangapapash, cunangaman na munajun.

24Siria llactata mandaj Hazael runa huañujpica, paipaj churi Ben-adad runami, paipaj randi mandajurca.

25Joacaz runapaj churi Joás shuti runami, Hazael runapaj churi Ben-adad runapaj maquimandaca, pueblocunata cutin quichushpa japirca. Quimsacaman macanajushpa mishashpami, chai pueblocunataca, Israel llactapajllata cachun cutin quichurca.