ECLESIASTÉS 8 - Quichua Imbabura 2016

1Alipacha yachajushca runashnaca, ¿pita tiyangayari? Ima tucunatapash, paishna villaj runaca, ¿pita tiyangayari? Ali yachajushca cashpami runacunaca, tucuicunapaj ñaupajpi ali ricurinajun.

2Candaca, jatun mandaj mandashcatapash, Taita Diospaj ñaupajpi juramentushcatapash pactachijuchunmi, ali yuyaita cun.

3Jatun mandajpaj ñaupajmandaca, ama uchalla ringapa munanguichu. Ima na alitapash, ama chaitallata rurashpa catinguichu. Paica, tucui ima munashcata pactachingallami.

4Jatun mandaj mandashcataca, pactachinapachami. Paitaca: “¿Imatata rurajungui?” nitaca, ¿pita ushangayari?

5Mandashcata pactachij runaca, ima llaquitapash na japingachu. Alipacha yachajushcacunaca, ima punlla, imatalla ruranatapash yachanmi.

6Tucui ima munashcata rurangapapash, shuj punllami chayanga. Tucui chaicunata ricuchina punllapash chayamungami. Runa ima na alita rurashcapash, paitallatami llaquichinga.

7Chai runaca, ima tucunatapash, ima punlla chashna tucunatapash, na yachanllu. Paimanga ¿pita villangayari?

8Pipash huañuitaca na jarcai ushangachu. Huañuna punlla chayamunataca pipash na jarcai ushangachu. Chai punlla chayanataca, imallapash na jarcai ushangachu. Diosta na manllaj runaca, na manllashcapash na quishpichingachu.

9Cai pachapica, tucui caicunatami aligutapacha ricujurcani. Runaca, paillata llaquita apangapami, shujcunata llaquichishpa causajun.

Cai causaipi na alicuna tiyashcamanda

10Shinallata, na alita rurajcuna huañujpica, ninanda alicachishpa pambanajujtami ricurcani. Ashtahuangarin, Diospaj huasiman na cungashpa shamuj runataca, alita rurashpa pai causajushca pueblopica cunganllami. Chaipash yangallami.

11Na alita rurashcamanda na ucha llaquichijpica, shuj runacunapashmi na alita ruranata yarinajun.

12Juchata ruraj runaca, patsajcaman na alita rurajushpapash, unaita causajunllami. Shina cajpipash, Taita Diosta manllashpa causajcunapajca, tucui ali llujshinatami yachani. Diosta manllashpa causajcunapajmi, chashna ali llujshinga.

13Ashtahuangarin, Diosta na manllaj runapaca, pai causana punllacunapash na unaicaman cashpa, ñapash tucurinatami yachani. Taita Diospaj ñaupajpi na manllashcamandami, chashna tucunga.

14Cai pachapica, tucui imapash yanga cajtami ricurcani. Alitalla rurajcunapash, Diosta na manllajcunashnami llaquita apanajun. Diosta na manllajcunarami, alitalla rurajcunashna alita causanajun. Chaipash yangallatami.

15Chaimandami ñucaca, cushijushpa causanata alicachijurcani. Cai pachapica, runaca imatapash ashtahuan alitaca na charinchu. Paica micushpa, ufiashpa cushijunatallami charin. Cai pachapi Taita Dios causaita carashca punllacamanga, pai imatalla rurashcamandami, chashna causaita charinga.

16Ñucaca, ali yachajushca cangapami munarcani. Cai pachapica, tucui ima cajta ali yachangapa munashpami, chashna yachajurcani. (Tutapash, punllapash na samashpami tucuita rurajurcani).

17Tucui imatalla Taita Dios rurashcatapashmi ricujurcani. Cai pachapi imatalla rurashcataca, runaca na yachai ushanllu. Runaca, imata rurajushpapash, chaitaca na yachai ushanllu. Ali yachajushca runaca, ña yachanimi nijushpapash, na tucuita yachai ushanllu.