1Mandaj Dios, Israelcunata bendiciachun munashcata ali yachashpami, Balaam runaca pundapash, jipamambash imata yachangapa munashcashnaca na mascajurca. Ashtahuangarin, tigrarishpami chaquishca pambaman ricushpa shayajurca.
2Balaam runa vichai ricushpaca, Israel ayllucuna, shican shican tandanajushca tiyanajujtami ricurca. Chaipimi Diospaj Espíritu paipajman shamurca.
3Shina cajpimi Balaam runaca, yarichina shimicunahuan cashna nijurca:
“Beor shuti runapaj churi Balaam runami cani.
Ñavita ali pascashpa ricujuj runami cashna nijuni:
4Taita Dios imatalla nijujta uyaj runami cashna nijuni.
Tucuita rurai ushaj Dios, muscuipishna ricuchijpi ricujmi cani.
Cungurishca cashpapash, ñavi pascariyajshna ricujujmi cashna nijuni:
5¡Jacobpaj miraicunalla, cangunapaj carpacunaca juyaillagumari!
¡Israelcunalla, canguna causana huasicunaca juyaillagumari!
6Jatun larca yacucuna rijujshnami ricurin.
Jatun yacu manñapi tiyaj sisacunashnami ricurin.
Mandaj Dios tarpushca áloe yuracunashnami ricurin.
Jatun yacu manñapi tiyaj cedro quirucunashnami ricurin.
7Paicunapaj maquimandaca, yacu shutujujshnami canga.
Paicunapaj miraicunaca, ashtaca yacuhuan tarpushcashnami canga.
Paicunata jatun mandajca, Agag shuti mandajtapash yali alicachi tucushcami canga.
Pai mandajuj llactapash, jatunyachi tucushcami canga.
8Taita Diosmi, paicunataca Egiptomanda llujchimurca.
Paica, búfalo animalpaj ushaitashnami charin.
Paicunata fiñaj llactacunataca,
langajshna tucuchishpami, tullucunatapash ñutunga.
Paicunapaj flechahuan yalichishpami huañuchinga.
9Leonshnami urai cumurishpa siririjunga.
Mama leonshna sirijujtaca, ¿pita rijchachingayari?
Cangunata bendiciajcunaca, bendiciai tucungami.
Cangunata ima llaquipash japishpaca alimi canman nijcunaca,
ninandami llaquichi tucunga” nijurcami.
Jipaman ima tucunata Balaam runa villashcamanda10Shina nijujta uyashpami Balac runaca, Balaam runahuanga ninandapacha fiñarishpa, maquitapash huajtarishpa cashna nirca:
“Candaca, ñucata fiñajcunata ima llaquipash japishpaca alichari canman nichunmari pushamurcani. Ashtahuangarin canga, ñucata fiñajcunataca ña quimsacamanmi bendiciashcangui.
11Cunanga, cambaj huasiman ucha tigrailla. Ñucaca, canman ashtacata cusha nircanimi. Ashtahuangarin, Mandaj Diosmi, canman ama cuchun jarcashca” nircami.
12Shina nijpimi Balaam runaca cashna nirca: “Can cachamushca runacunataca, ¿nachu ñucapash cashna nircani?:
13‘Paipaj huasi ucu junda culquita, curita, Balac runa cujpipash, Mandaj Dios rimashcata na cazushpaca, na ñuca munailla alita cashpa, na alita cashpapash rurai ushashachu. Mandaj Dios ima nishcatallatami villasha’ nircanimi.
14Cunanga, ñuca llactaman ña rigrinimi. Shinapash jipa punllacunapi, Israel gentecuna, cambaj gentecunata, imatalla ruranata villashpami saquigrini” nircami.
15Chaipimi Balaam runaca, yarichina shimicunahuan cashna nijurca:
“Beor shuti runapaj churi Balaam runami cani.
Ñavita ali pascashpa ricujuj runami cashna nijuni:
16Mandaj Dios imatalla nijujta uyaj runami cashna nijuni.
Jahua pachapi causajuj Dios yachachishca runami cashna nijuni.
Tucuita rurai ushaj Dios, muscuipishna ricuchijpi ricujmi cani.
Cungurishca cashpapash, ñavi pascariyajshna ricujujmi cashna nijuni:
17Paitaca ricushami, shina cashpapash cunanga nara ricui ushanichu.
Ricushpapash, carumandallami ricusha.
Jacobpaj mirai Israelcunamandaca, shuj Luzeromi llujshinga.
Paicunamandaca, mandana varami llujshinga.
Paimi, Moab llactataca umapi huajtashpa huañuchinga.
Set shuti runapaj miraicunataca tucuillatami tucuchinga.
18Edom llactataca quichungami.
Seir shuti llactataca, paicunata fiñajcunami japinajunga.
Israelcunaca, ninan shinllicunapachami shayanajunga.
19Jacobpaj miraimandaca, mandashpa charij runami llujshinga.
Paimi, pueblopi puchushcacunataca tucuchinga” nijurcami.
20Balaam runaca, Amalec runamanda miraicunata ricushpami, yarichina shimicunahuan cashna villajurca:
“Amalec runamanda miraicunaca, tucuilla llactacunapaj umashnami.
Ashtahuangarin tucuripica, causaita causaicamanmi chinganga” nijurcami.
21Shinallata, ceneo gentecunatapash ricushpami, yarichina shimicunahuan cashna villajurca:
“Cangunapaj huasicunaca, shinlli huasicunami.
Jatun rumi ucupi churashca tazinbishnami causanguichi.
22Ashtahuangarin, Asiria llactapi causajcuna mishashpa prezu apajpimi,
ceneo gentecuna causanajuj llactaca shitashca saquiringa” nircami.
23Balaam runaca cutimbashmi, yarichina shimicunahuan cashna villajurca:
“¡Aij! Taita Diosllata chashna llaquichijpica, ¿pita causai ushangayari?
24Quitim shuti llactapi tiyaj mama cucha manñamandami jatun barcocuna shamunga.
Asiria llactatapash, Heber shuti llactatapash llaquichingapami shamunga.
Chai llaquichij runacunapashmi, causaita causaicaman tucuringa” nijurcami.
25Chai jipami, Balaam runaca paipaj llactaman tigrarca. Shinallata, Balac runapash, ñanda japishpa rircallami.
Who We AreWhat We EelieveWhat We Do
2025 by iamachristian.org,Inc All rights reserved.
