1“Judá llactapi causajcunapaj juchaca, jirruhuan,
diamante rumi pundahuan shungupi quilcashcashnami tiyajun.
Cangunapaj altar cachucunapipash, chashnallatami tiyajun.
2Cangunapaj huahuacunapash, fanga junda quiru ucucunapi, jatun lomacunapi tiyaj altarcunata,
Asera shuti huarmi diosman rijchajcunatami yarinajun.
3Chai altarcunaca, urcu jahuacunapi, pambacunapimi shayanajun.
Cangunapaj llactapi, urcu jahuacunapi altarcunata shayachishpa, juchata rurashcamandami,
cangunapaj tucui imatalla charishcacunatapash, shuhuacuna apachun saquisha.
4Cangunaman carashca cai llactatapash saquishpami,
canguna na rijsishca llactaman rishpa gañan tucushpa causanguichi.
Canguna Ñucata ninanda fiñachijpimi, na huañushpa rupajuj ninashna fiñarircani” ninmi.
5Mandaj Diosca, cashnami nin:
“Mandaj Dios Ñucamanda anchurishpa, runapaj ushaitara yariyaj causajca, ninandami llaquichi tucunga.
Pai yarijushcatalla catishpami, Mandaj Dios Ñucamandaca anchuringa.
6Paica, jichushca pambapi viñashca retama yurashnami causanga.
Ima ali tiyajtapash, paica na ricungachu.
Chaquishca alpalla tiyaj, gentepash na causaj, jichushca pambacunapillami causajunga.
7Ashtahuangarin Mandaj Dios Ñucata yariajlla causashpa,
Mandaj Dios Ñucatalla shuyaj runaca, bendiciai tucungapachami.
8Paica, yacu manñapi tarpushca quirushnami canga.
Ninanda rijuj yacupi sapiyashca quirushnami canga.
Ninanda rupajujpipash, fangacunaca juyailla tiyajungallami.
Na tamiajuj huatapipash, na chaquishpa juyailla fucujungallami.
9Runapaj shunguca, tucui imatapash yali umachijlla, jatun na alimi.
¿Chaitaca pipash yachai ushangachu?
10Mandaj Dios Ñucami, aligutapacha ricushpa, tucuicunapaj yuyaitapash, shungutapash alipacha yachani.
Paicuna imashna causashcamandapash, imatalla rurashcamandapash cungapami, chashna ricujuni” ninmi.
11Na alitalla rurashpa ninanda charij tucuj runaca,
sacha atalpa napash pai huachashca lulunda ugllajunshnami.
Paica, nara rucuyashpallatami huañunga.
Paipaj imata charishcapash yangallatami canga.
12Dios mandajuj punchapamba tiyarinaca,
callarimandapacha tucuita yali ninanda alicachi tucushcami tiyajun.
Chaica, ñucanchi Diospajlla shicanyachishca huasimi.
13¡Mandaj Dioslla, Israelcuna shuyana Diosmi cangui!
Canda saquijcunaca, tucuicunami pingai tucunajunga.
Causaita caraj yacushna Mandaj Dios Ñucata saquishpa anchurijcunaca,
ñutu alpapi quilcashcashnami chinganga.
14Mandaj Dioslla, alichihuayari. Can alichijpica ali tucushallami.
Quishpichihuayari. Can quishpichijpica, quishpirishallami.
Canmi ñuca alicachina Dios capangui.
15Gentecunaca cashnami ninajun:
“¿Mandaj Dios rimashca shimicunaca, maipitayari?
¡Cunanda pactachijta ricungapami munanchi!” ninajunmi.
16Ashtahuangarin, paicunata llaquichipai nishpaca, na mañajurcanichu.
Paicunapaj jatun llaqui punlla chayamuchumbash, na munarcanichu.
Chaitaca, Canllata yachapanguimi.
Ñuca shimihuan imatalla rimashcatapash, Canllata yachapanguimi.
17Ama llaquichishpa manllachihuaichu.
Canga, llaqui punllacunapipash, ñucata huacaichij Diosmari capangui.
18Ñucata pingaichingapa randica, ñucata catiriyashpa llaquichijcunata pingaichipayari.
Ñucata llaquichishpa manllachingapa randica, paicunata llaquichipayari.
Jatun llaqui punllataca, paicunaman cachamushpa ashtahuan ninandapacha llaquichipayari.
Samana punllamanda19Mandaj Diosca, cashnami nihuarca: “Chai gentecunapaj pueblo punguman rishpa shayarigri. Chaitaca, Judá llactata jatun mandajcunami yaicunajun, llujshinajun. Shinallata Jerusalenbi tiyaj, tucui pungucunapipash shayaringapa rilla.
20Chai pungucunapi shayarishpaca, cashna ningui: Cai pungucunata yaicuj, Judá llactata jatun mandajcuna, Judá llactapi tucui causajcuna, Jerusalenbi tucui causajcunapash, Mandaj Dios rimashcata uyaichi.
21Mandaj Diosca, cashnami nin: ‘Cangunaca aliguta yarishpami causana canguichi. Samana punllapica, Jerusalén pungucunataca, imatallapash na apashpa yaicunachu canguichi.
22Samana punllapica, cangunapaj huasimandaca, imatallapash na llujchinachu canguichi. Imatapash, na ruranachu canguichi. Ashtahuangarin cangunapaj ñaupa taitacunata Ñuca mandashcashna, samana punllataca Ñucapajlla cachunmi shicanyachina canguichi.
23Shina mandajpipash, paicunaca napacha uyangapa munarcachu. Ashtahuangarin, jarcashpa rimashcatapash, napacha uyangapa munashpami, shungucunapash shinlliyashca carca’ ninmi ningui” nihuarcami.
24Mandaj Diosca, cashnatapashmi nirca: “Canguna Ñucata cazushpaca, samana punllapica cai pueblo pungucunataca, imatallapash na apashpa yaicunachu canguichi. Ashtahuangarin samana punllataca, Ñucapajlla cachun shicanyachishca cajpimi, imatallapash na rurana canguichi.
25Shina pactachishpaca, Davidpaj tiyarinapi tiyarij jatun mandajcunapash, cati mandajcunapash caballocunapi, carretacunapimi, cai pueblo pungucunataca yaicumunajunga. Shuj mandajcunapash, Judá llactapi causaj runacunapash, Jerusalenbi causajcunapashmi, paicunahuan yaicumunajunga. Chashnami cai pueblopica, causaita causanajunga.
26Shinallata Judá llactapi tiyaj pueblocunamanda, Jerusalén muyundicunamanda, Benjamín llactamanda, Sefela shuti pambamanda, Neguev urcucunamandapashmi caiman shamunajunga. Ñucaman animalta cushpa, huañuchishpa tucuilla rupachingapapash, ofrendata cungapapash, inciensotapash, apashpami, Mandaj Dios Ñuca huasipi, Ñucata alicachingapa shamunajunga.
27Ashtahuangarin samana punllata shicanyachinajuchun Ñuca mandashcata na cazushpa, chai samana punllapi imatapash apashpa, Jerusalén pungucunata yaicushpa ucuman churamujpica, chai pungucunataca ninahuanmi rupachisha. Chai ninaca, Jerusalenbi tiyaj mandana huasicunatapashmi, tucuillata rupachinga. Chai ninaca na huañushpa rupajungallami” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
