ROMANOS 4 - Quichua Imbabura 2016

Abrahamga alipacha crijmi cashca

1Ñucanchipaj taita Abrahamga ¿imatapash alita rurashcamandami ima alitapash japirca ninachu canchi?

2Alicunata rurashcamanda, Dios chasquishca cajpica, Abrahamga jariyai ushanmanmi carca. Ashtahuangarin, Taita Diospaj ñaupajpica napacha jariyai ushanmanllu carca.

3Dios quilcachishca Shimipica, ¿imatata nijun? “Abrahamga Taita Diosta crircapachami, shina cajpimi Taita Diosca alita rurajtashna chasquirca” nijunmi.

4Ashtahuangarin, imatapash rurashcamanda culquita cujushpaca, juyaimandaca na cujunllu, chaitaca, cunapacha cashcamandami cujun.

5Ashtahuangarin, ima alita na rurashca cajpipash, juchacunata anchuchin Jesusta crijpillami, alitalla rurajtashna chasquijun.

6Alicunata na rurashca cajpipash, alitapacha rurachunmi Taita Diosca chasquijun. Davidpash, gentecuna ninanda cushijunamanda villashpaca

7cashnami nirca:

“Na alita rurashcata Dios perdonashpa,

juchacunata quilpajshna anchuchijpica,

maijan cashpapash ninandami cushijun.

8‘Canga, na juchayujchu cangui’ nishpa,

Jatun Dios nijpimi maijan cashpapash ninan cushijuita charinga” nircami.

9Cai cushijunaca, ¿circuncisionda rurashcapajllachu canga? Na cashpaca, ¿circuncisionda na rurashcapajpashchu canga? “Abrahamdaca crijpillami, alitalla rurajtashna chasquirca” nircanchimi.

10¿Imashnata paitaca chasquirca? ¿Circuncisionda rurajpichu chasquirca? na cashpaca ¿nara rurajpillatachu chasquirca? Circuncisionda nara rurajpillatami, paitaca ña chasquirca.

11Chai jipami Abrahamdaca, tucuicuna ricunalla cachun circuncisionda rurarca. Nara circuncisionda rurashpallata crijpimi, paitaca, alitalla rurashcatashna ricuchingapa sellota churajshna chasquirca. Shina cashpami Abrahamga, circuncisionda na rurashca tucui crijcunapajpash taita tucurca. Paicunatapash, Diosta crijpica, alitapacha rurashcatashna chasquichunmi chashnaca rurashca.

12Abrahamga, circuncisionda nara rurashca cashpallata crishpami causashca. Paica, circuncisionda rurashcacuna cashpapash, Abrahamshnalla crishpa catijcunapajllami taita.

Dios carashcataca, crishcamandalla japina cashcamanda

13Taita Diosca, Abrahammanbash, paipaj miraicunamambash, mandashca shimicunata pactachishcamandaca, na cai pachata “carasha” nijurcachu. Ashtahuangarin, Diosta crishcamandallami, alitalla rurashcatashna chasquirca.

14Mandashcata pactachijcunalla japina cajpica, crishcapash yangami canman. Dios carashapachami nishcapash yangallatami canman.

15Mandashca shimi tiyajpica, na cazushpami Diosta fiñachinchi. Ashtahuangarin, mandashca shimi illajpica, na cazushpa pandarinapash na tiyanmanllu.

16Shina cashcamandami crijpilla, paipaj miraicunaman ninanda juyashpa “carashapacha” nijushca. Mandashcata pactachijmanlla caranataca, na nishcachu. Ashtahuangarin, Abraham imashna crishcashna crishcamandallami “carashapacha” nijushca. Chaimandami Abrahamga tucui ñucanchipaj taita.

17Quilcashcapica: “Ashtaca gentecunapaj taita cachunmi, candaca churarcani” nijunmi. Taita Diospaj ñaupajpi alipacha crij cajpimi shina nishca. Paimi huañushcacunatapash causachin. Shinallata, ima na tiyajcunatapash churai ushanllami.

18Paimi Abrahamdaca: “Cambaj miraicunaca, ashtacami canga” nijurca. Chashna nishcashnami, napash crinayaita crishpa ashtaca gentecunapaj taita tucurca.

19(Paica, patsaj huatatashnami ña charirca). Abrahamga, paipaj cuerpo ña huañunalla cashpapash, paipaj huarmi Sara, huahuata na tari ushanalla cajpipash crinataca napacha saquircachu.

20Taita Dios “carashapachami” nishcataca, na ishcai shungu tucushpami, shinllipacha crishpa, Taita Diostaca ninanda alicachijurca.

21Carashapacha nishcataca, Diosca pactachingapa ushaita charijta crishpami, Abrahamga shuyajurca.

22Shinamandami, paitaca crishcamandalla, alitalla rurajtashna Diosca chasquirca.

23Na Abrahammandalla chashna nishpa quilcashca tiyajunllu.

24Ashtahuangarin ñucanchimandapashmi chashna quilcashca tiyajun. Ñucanchi Apunchi Jesusta, huañushcacunapaj chaupimanda causachishcata crishcamandami, Diosca ñucanchitapash chasquijun.

25Jesusca, ñucanchi juchacunamanda, huañuchi tucungapami japi tucurca. Shinallata, Paica ñucanchi juchacunata perdonashpa chasquingapami causarirca.