1Davidpaj churi Absalonga, shuj Tamar shuti juyailla panitami charirca. Davidpajllata churi Amnón shuti runami, paitaca ninandapacha munashpa ricun carca.
2Paipaj pani Tamarta ninandapacha munashpami irquiyajurca. Tamarca, maijan jarihuambash na tacarishca cajpimi, Amnonga, imashna quimiritapash napacha ushajurca.
3Amnonga, shuj ali cumbatami charirca. Paica, Davidpaj huauqui Simea shuti runapaj churi Jonadab shutimi carca. Jonadabca, imatapash alipacha yachajmi carca.
4Paimi Amnondaca, cashna nirca:
“Jatun mandajpaj churi, ¿imashpata punllandi chashna jamziyashpa catingui? Ima cajpipash, ¿nachu ñucamanlla villahuanguiman?” nircami.
Shina nijpimi Amnonga, cashna nirca:
“Ñuca huauqui Absalonbaj pani Tamar cuitsagutamari, ninandapacha munani” nirca.
5Shina nijpimi Jonadab runaca, cashna nirca:
“Huañujuj tucushpa, cambaj puñuna pushtupi sirijugri. Cambaj taita ricungapa shamujpica, cashna ningui: ‘Paipacha micunata yanushpa carachun, ñuca pani Tamarta caiman cachamupai. Paipacha yanushpa carajpica micushallami’ ningui” nircami.
6Shina nijpimi Amnón runaca, huañujuj tucushpa sirijurca. Chaimandami jatun mandaj David, paita ricungapa shamujpica, Amnón runaca cashna nirca:
“Ñuca pani Tamarta, caiman cachamupangui. Pai, ñucaman ishcai tortillata rurashpa carajpica, paipaj maquimanda japishpa micushallami” nirca.
7Shina nijpimi Davidca, Tamartaca, Amnón runapaj huasiman cashna nishpa cacharca:
“Amnón shuti cambaj turipaj huasiman cunanda rishpa, ima micunatallapash yanushpa caragri” nishpa cacharca.
8Paipaj turi Amnón runapaj huasiman Tamar cuitsa chayajpica, puñuna pushtupimi sirijurca. Chaipimi Tamarca, jacuta japishpa masashpa, paipaj ñaupajpi tortillacunata rurashpa cusajurca.
9Chai jipaca, uchilla pailata japishpami, tortillacunataca pai ricujta llujchijurca. Ashtahuangarin, na micungapa munarcachu. Shina cashpami Amnón runaca: “Tucuilla caimanda llujshichi” nijpi, tucuilla canllaman llujshirca.
10Chai jipami Amnonga, Tamartaca cashna nirca:
“Micunata cambaj maquimanda japishpa micungapaca, puñuna ucuman apamuilla” nirca.
Shina nijpimi Tamarca, pai rurashca tortillacunata japishpa, paipaj turi Amnón puñuna ucuman aparca.
11Pai micuchun ñaupajpi ña churajpimi, Tamartaca japishpa:
“Ñuca panigulla, ñucahuan siririj shamui” nirca.
12Shina nijpimi Tamarca, cashna nirca:
“Ñuca turigulla, ama chashna na alita ruraichu. Cai Israel llactapica, chashna na alitaca na ruranachu. Ama chashna jatun na alita ruranataca yarijuichu.
13Can chashna rurajpica, ¿ñuca pingaihuanga maimanda rishayari? Cambash Israel llactapica, ninan na alita ruraj ni tucushcami cangui. Shina cashcamanda cunanga, ñucahuan cazarasha nishpa, jatun mandajhuan parlagri. Paica canhuan cazarachingapaca, na jarcangachu yanimi” nirca.
14Ashtahuangarin paica, na uyangapa munashpami, Tamarta yali shinlli cashcamandaca, aisashpa, munai na munai paihuan pacta puñurca.
15Chai jipaca Amnón runaca, Tamartaca ninandapachami millanayachirca. Paica, punda ninanda munashpa paita juyashcatapash ashtahuan yalimi ninandapacha na ricunayachishpa millanayachirca. Chashna cashpami Amnón runaca:
“Jatarishpa caimanda ri” nirca.
16Shina nijpimi Tamarca, cashna nirca:
“Na chashna ruranachu cangui. Ñucata caimanda llujchishpa cachashpaca, ñucahuan sirijushpa na alita rurashcatapash ashtahuan yali na alitami ruragringui” nijpipash, paica na uyangapa munarcachu.
17Ashtahuangarin pai mandashcata rurashpa causajuj, paipajta ruraj runata cayashpami:
“Cai huarmita caimanda canllaman llujchishpa, punguta vichai” nirca.
18Shina nijpimi, Amnón runapajta ruraj runaca, Tamarta canllaman llujchishpa punguta vicharca. Tamarca, juyailla punchapamba rurashca churajunata churajushcami carca. Chashna churajunataca, jatun mandajcunapaj ushicuna, jarihuan nara tacarishca cashpami, chashna churajun carca.
19Tamarca uchufata japishpami, paipaj umapi churarirca. Shinallata, juyailla punchapambata rurashca churajunatapash liquirishpa, paipaj umapi maquita churashpami, ninanda caparishpa rijurca.
Absalón shuti runaca, Amnón shuti runata huañuchishpami pacajugrishca20Chaimandami paipaj turi Absalón runaca, cashna nirca:
“¿Amnón shuti cambaj turichu, chashna na alita rurarca? Ñuca panigulla, paipash cambaj turillatami, cunanga ama huacashpa upalla saquishunlla” nircami.
Shinami Tamarca, paipaj turi Absalonbaj huasipi ninanda llaquirishpa saquirirca.
21Chaita yachashpami, jatun mandaj Davidca ninandapacha fiñarirca.
22Ashtahuangarin Absalón runaca, Amnón runataca imatapash na nircachu. Paipaj panita, Amnón runa chashna na alita rurashcamanda, na ricunayachijushpapash upalla carcallami.
23Ña ishcai huata yalishca jipami: Absalón runapajta ruraj runacunaca, Efraín llactaman chayanallapi tiyajuj Baal-hazor shuti pueblopi, llamacunata rutunajurca. Chaimanmi Absalón runaca, jatun mandajpaj tucuilla churicunata shamupaichi nirca.
24Absalón runaca, jatun mandajpajman shamushpami cashna nirca:
“Cambajta ruraj ñucami, cunanga ñuca llamacunata rutuchijuni. Chaimanda can jatun mandajpash, can churashca mandajcunapash, cambajta rurajcunandi, shamupaichi nipanimi” nirca.
25Shina nijpimi jatun mandaj Davidca, Absalondaca cashna nirca:
“Ñuca huahualla, na tucuilla ri ushapashunllu. Tucuilla rijpica, na pactapanguichu” nirca.
Ripashunlla nijujpipash, na ringapa munashpami bendiciashpa cacharca.
26Chaimandami Absalonga, cashna nirca:
“Can na ri ushashpapash, ñuca huauqui Amnondaca richun saquipailla” nijpimi, jatun mandajca:
“¿Imapata canhuanga ringayari?” nirca.
27Shina nijpipash Absalonga, paipaj huauqui Amnonda cachapai nijujpillatami, jatun mandajca tucuilla churicunata richun saquirca.
28Absalonga, paipajta rurajcunatami, cashna nishpa mandashca carca: “Amnón runataca, vinota ufiashpa ña macharijujta ricushpaca villahuanguichi. Shina cajpi, ñuca mandajpica, Amnonda na manllashpami huañuchina canguichilla. Ñuca mandashcamandami, cangunaca shinlli tucushpa, imatapash na manllana canguichi” nircami.
29Absalón runapajta ruraj runacunaca, pai mandashcata pactachishpami Amnón runataca huañuchirca. Shinamandami, jatun mandajpaj churicunaca tucuicuna paicunapaj mulapi tiyarishpa pacajushpa calpanajurca.
30Paicuna ñanda rinajujpillatami, chai llaquicunataca, Davidca ña yacharca. Paica: “Absalón runaca, jatun mandajpaj churicunataca, shujllapash na saquishpami tucuillata huañuchishca” nishcatami uyarirca.
31Chaita uyashpami Davidca jatarishpa, pai churajushcata liquishpa, alpapi siririrca. Shinallata paipajta rurajcunapash, tucuicunami paicuna churajushcata liquinajurca.
32Shinamandami Davidpaj huauqui Simea shuti runapaj churi Jonadab runaca, cashna nijurca:
“Ñucata mandajlla, can jatun mandajpaj chairalla viñai churicunataca, tucuillatami huañuchishcanga yashpaca, ama llaquiringuichu. Amnón runatallami huañuchishcanga. Absalón runaca, paipaj pani Tamarta na alita rurashca punllamandami, huañuchishapacha yashpa purijurca.
33Shina cashcamanda, ñucata mandajlla: ‘Can jatun mandajpaj tucuilla churicunami huañushca’ nishpa parlanajushcataca, napacha crinachu cangui. Amnón runatallami huañuchishcanga” nircami.
34Chai jipami Absalón runaca, pacajushpa rirca.
Shinallata, chapashpa shayaj chairalla viñai runa vichai ricushpaca, huashata tauca gentecuna, lomamanda ñanda shamunajujtami ricurca.
35Chaita ricushpami Jonadab runaca, jatun mandaj Davidtaca cashna nirca:
“Ricui, cambajta ruraj ñuca nishcashnallatami, jatun mandajpaj churicunaca, chaita shamunajun” nircami.
36Pai chashna villajhuanmi, jatun mandajpaj churicuna chayamushpaca, ninandapacha caparishpa huacanajurca. Shinallata jatun mandajpash, paipajta rurajcunapashmi, ninandapacha llaquirishpa huacanajurca.
37Absalón runaca, Amiud shuti runapaj churi, Gesur shuti pueblota jatun mandaj Talmai shuti runapajmanmi pacajushpa rirca. Davidca, punllandimi paipaj churimandaca huacajurca.
38Absalón runaca, Gesur shuti puebloman pacajushpa rishpaca, quimsa huatatami chaipi causajurca.
39Amnón runa huañushcata ña cungashpami, jatun mandaj Davidca, Absalón runataca ninanda ricunayachijurca.
Who We AreWhat We EelieveWhat We Do
2025 by iamachristian.org,Inc All rights reserved.
