1Chai huatacunapica, Davidpaj miraicunapash, Jerusalenbi causajcunapash, paicuna juchata rurashpa mapayashcamanda maillarichunmi shuj pugyuta chaipi churasha” nircami.
2Mandaj Diosca cashnami nirca: “Chai punllacunapica, cai pachapi tiyaj rurashcalla dioscunataca, shuticunandimi tucuchisha. Cutinga, ama yarishpa causachunmi, chashna anchuchisha. Llullashpa villajcunatapash, gentecunapaj shunguta mapayachij ayatapashmi, cai llactamandaca anchuchisha.
3Maijambash villashpa catisha nijujpica, paipaj taita, mamallatami: ‘Mandaj Diospaj shutipimi villajuni nishpa llullashcamandaca, na ashtahuan causanguichu’ ninga. Paipaj taita, mamallatami, ama ashtahuan chashna villajuchun, napacha llaquishpa huañuchinga.
4Chai huatacunapica: Muscuipishna ricurcanchimi nishpa, llullashpa villajcunaca, imapash na pactajpimi ninanda pingai tucunajunga. Chai punllacunapica, chaqui pundacaman churajushpa, llullashpa villajcunaca, na ashtahuan tiyangachu.
5Chaimandami cashna ninajunga: ‘Ñucaca, na profetachu cani, pambapi tarpushpa causajllami cani. Ñucaca, chairalla viñaimandapachami pambapi tarpushpa causani’ ninajunga.
6Paitaca cashna nishpami tapunga: ‘¿Imashpata maquitaca chugrircangui?’ ningami. Shina nijpimi paica: ‘Ñucapaj cumbacunapaj huasipimi chugrichihuarca’ ninga” nijunmi.
Mandaj Dios cachamushca michijta chugrichishcamanda7Mandaj Diosca cashnami nirca:
“Huañuchij espadalla, Ñuca llamacunata michijtapash, Ñucapaj ali cumbatapash huañuchingapa shayarilla.
Chai michijta chugrichijpi, llamacuna calpajpica, huahua llamacunataca, Ñucami llaquichisha” ninmi.
8Mandaj Diosca cashnatapashmi nirca:
“Cai pachapi causajcunataca, quimsapi chaupishpami, ishcai chaupica, chaipillata huañushpa tucuringa.
Ashtahuangarin, shuj chaupishcallami causaj saquiringa.
9Chai puchushcataca, ninapimi churasha.
Culquita ninapi churashpa yacuyachinshnami churasha.
Ali curi cajta ricungapa churanshnami churasha.
Shina rurajpimi paicunaca, Ñuca shutipi mañanajunga.
Paicuna mañanajujtaca uyashami.
Paicunataca: ‘Ñuca agllashcacunami canguichi’ nishami.
Paicunaca: ‘Ñucanchita Mandaj Diosmi cangui’ ningami” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
