DANIEL 8 - Quichua Imbabura 2016

Jari llamatapash, jari chivotapash muscuipishna ricushcamanda

1Babilonia llactata jatun mandaj Belsasarca, ñami quimsa huatata mandajurca. Chai huatapimi, punda ricurishcashnallata, Daniel ñucaman muscuipishna ricurirca.

2Ñucaca, Elam shuti marcapi, llactata mandana Susa shuti pueblopimi carcani. Ulai shuti jatun yacu manñapi cashpami, muscuipishna cutin ricurcani.

3Vichai ricujpica, ishcai cachuyu shuj jari llamami, chai yacu manñapi ricurirca. Chai jari llamapaj cachucunaca, ishcandi jatun cashpapash, shujca ashtahuan jatunmi carca. Chai ashtahuan jatun cachuca, jipallami viñarca.

4Chai jari llamaca, indi huashajunman, janajman, uraman causajcunataca, paipaj cachucunahuan tupashpami chugrichijurca. Paipaj ñaupajpica, ima animalpash na chimbapura shayari usharcachu. Paipaj ñaupajmandaca, pipash na pacajui usharcachu. Chai jari llamaca, pai munashcata rurashpami, ashtahuan jatun tucurca.

5Chaita ricushpa ñuca yarijujpillatami, shuj jari chivoca, alpapi na sarushpa, indi huashajunmanda ninanda shamujujta ricurcani. Chai jari chivoca, paipaj ishcandi ñavipaj chaupi frentepimi, shuj jatun cachuta charirca.

6Chai chivoca, jatun yacu manñapi shayajujta ñuca ricushca, ishcai cachuyu jari llamapajmanmi, ninandapacha fiñarishpa jatun ushaihuan tucuchingapa calparca.

7Jari llamapajman ña chayashpaca, vichai shayarishpa tupashpami, chai jari llamapaj ishcandi cachucunata faquijta ricurcani. Shinamandami chai jari llamaca, chai jari chivohuan chimbapura shayarishpa macanajungapaca, na ushaita charijpi, paitaca alpapi urmachishpa sarujurca. Jari chivo chashna llaquichijujpi jarcangapaca, pipash na tiyarcachu.

8Chaimandami chai jari chivoca, ashtahuan jatun tucujurca. Ninan ushaita charishpa, tucuita mishajujpimi, paipaj jatun cachuca faquirirca. Chai cachupaj randica, cai pacha chuscundi suyucunamanmi chuscu jatun cachucuna viñarca.

9Chai chuscu cachucunamanda shuj cachupimi, shuj uchilla cachu viñarca. Chai cachuca uramambash, indi llujshimujmambash, Diospajlla juyailla llactamambashmi viñarca.

10Shinallata, jahua pachapi imalla tiyajcunapajman chayajtami jatun tucurca. Chaipi imalla tiyajcunatapash, luzerocunatapash, huaquingunataca alpaman urmachishpami paica sarujurca.

11Chai jipaca, jahua pachapi tucui imalla tiyajcunata Mandajtapashmi, jatun tucushpa jariyarca. Paica, Diosman punllandi ofrendacunata caranatapash anchuchishpami, Diospajlla huasitapash mapayachijurca.

12Chashna na alicunatalla rurajushpami, Diosman animalcunata punllandi cuna pushtupi, paipaj macanajuj runacunata churarca. Chashna Diosta na cazushpami, pai munashcata rurashpa tucuipi ali llujshijurca.

13Shina cajpimi, shuj ángel rimashpa, caishuj angelta, cashna nijujta uyarcani: “Cashna tucunta ricunchi, chaica punllandimi ofrendacunata Diosman cuna altarpica ricurin. ¿Ima punllacamanshi chaica tucuringa? ¿Ima punllacamanshi, Diospajlla huasipi chashna juchata rurachun Diosca saquinga? ¿Ima punllacamanshi Dios agllashca gentecunata llaquichinajuchun Diosca saquinga?” nishpami tapurca.

14Shina tapujpimi cashna nirca: “Ishcai huaranga quimsa patsaj chishicunata, tutamandacunatami chashna saquinga. Chai jipami, Diospaj huasica mapa illaj canga” nircami.

15Daniel ñucaca, tucui chaicunata muscuipishna ricushpa, chaicuna ima cajta yachangapa munashpa yarijujpimi, ñuca ñaupajpi, shuj runashnalla ñapash shayarimurca.

16Chai jipaca, Ulai shuti jatun yacu manñamandami, shuj runa cashna nishpa caparijta uyarcani: “Gabriel, muscuipishna ricushcata cai runaman ali villai” nijujtami uyarcani.

17Shina nishca jipaca, ñucapajmanmi chai angelca shamurca. Pai shamujpica manllarishpami, cungurishpa urai cumurircani. Ashtahuangarin paica, cashnami nihuarca: “Huañuna aichayuj runa, aliguta ricungui. Muscuipishna can ricushcacunaca, tucurimui punllacunapajmi” nihuarcami.

18Ñucata pai chashna nijujpica, puñushpami ñapash alpapi sirijurcani. Shina cajpimi, paipaj maquihuan tacarishpa jatarichihuarca.

19Chai jipami, cashna nihuarca:

“Ricui, tucurimui punllacunapi Dios fiñarishpa llaquichinatami villagrini. Can imatalla ricushcapash, tucurimui punllacunapajmi.

20Ishcai cachuta charij, chai jari llamaca, Media shuti, Persia shuti llactacunamanda, jatun mandajcunatami ricuchijun.

21Jari chivoca, Grecia shuti llactata jatun mandajtami ricuchijun. Chai chivopaj ishcandi ñavipaj chaupi frentepi tiyajushca jatun cachuca, chai llactapi punda tiyana jatun mandajtami ricuchijun.

22Shinallata, chai cachuta faquijpi, chaipaj randi chuscu cachucuna viñashcapash, chai jatun mandajpaj jipa chai llactamandallata, chuscu jatun mandajcuna llujshinatami ricuchijun. Chai jatun mandajcunaca, punda jatun mandaj runashna ninan ushaitaca na charingachu.

23Chai chuscu jatun mandajcunapaj mandana tucurijpica, Diosta na cazujcunapash ashtahuan na alicunatami ruranajunga. Chai punllacunapica, ninanda jariyashca, yachaisapa shuj jatun mandajmi jataringa.

24Paipaj ushaica, ashtahuan ashtahuanmi shinlliyashpa catinga. Ashtahuangarin, na paipaj ushaihuanlla, chashna shinlli cangachu. Jatun llaquicunata rurashpapash, ali llujshingallami. Pai munashcata rurashpami, ninan shinllicunatapash, Diospajlla causajcunatapash, huañuchishpa tucuchinga.

25Ali yachajushca cashpami, pitapash umachi ushanga. Paica, jatun tucushpami, ashtaca gentecunata umachishpa huañuchishpa tucuchinga. Mandajcunata Mandajhuambash macanajungapa jatarishpami, Paipaj maquipi huañuchi tucunga.

26Chishicunapi, tutamandacunapi ima tucunta, muscuipishna can ricushcapash, chashnapachami tucunga. Muscuipishna can ricushcataca pimambash ama villashpa saquilla. Chaicunaca, tauca huatacuna jipami pactanga” nihuarcami.

27Chai jipaca Daniel ñucaca, ninanda manllarishpa irquiyashpami, tauca punllacunata chashna carcani. Ña ali tucushpami, jatun mandajman imata ruranacunataca rurashpa catircani. Shinapash, muscuipishna ñuca ricushcacuna ima cajta na ali yachai ushashpami, manllaihuan llaquilla catijurcani.